AKP កំពង់ធំ ថ្ងៃទី១២ ខែមីនា ឆ្នាំ២០២៦-- លោក សាយ គឹមឡម អភិបាលស្រុក និងជាប្រធានសមាគមអតីតយុទ្ធជន និងនិវត្តជនកម្ពុជាស្រុកស្ទោង បានលើកទឹកចិត្តដល់ប្រធានសមាគមអតីតយុទ្ធជន និងនិវត្តជនកម្ពុជាគ្រប់ឃុំ ត្រូវគិតគូរយកចិត្តទុកដាក់ខ្ពស់ដល់សុខទុក្ខ និងជីវភាពអតីតយុទ្ធជន និងនិវត្តជនគ្រប់រូប ក្នុងឱកាសដែលលោក និងសហការីអញ្ជើញជាអធិបតីភាពក្នុងពិធីប្រកាសតែងតាំងសមាសភាពសាខាសមាគមអតីតយុវជន និងនិវត្តជនកម្ពុជាឃុំនៃស្រុកស្ទោង ខេត្តកំពង់ធំ នាព្រឹកថ្ងៃទី១២ ខែមីនា ឆ្នាំ២០២៦។

លោក សាយ គឹមឡម បានបញ្ជាក់ថា ការបង្កើតសមាគមនេះឡើងគឺជាគំនិតផ្ដួចផ្ដើមយកចិត្តទុកដាក់ដ៏ខ្ពង់ខ្ពស់បំផុតពីសំណាក់សម្ដេចអគ្គមហាសេនាបតីតេជោ ហ៊ុន សែន ដែលជាការតបស្នងសងគុណយ៉ាងធំធេងបំផុតដល់អតីតយុទ្ធជន និងនិវត្តជនគ្រប់រូប ដែលបានខិតខំតស៊ូពុះពារលះបង់គ្រប់បែបយ៉ាងដើម្បីសង្គមជាតិដ៏ស្រស់បំព្រងនៃយើង។ លោកក៏បានលើកចិត្តដល់លោកមេឃុំ និងប្រធានសមាគមគ្រប់រូបត្រូវខិតខំផ្តល់សេវាជូនពលរដ្ឋ និងសមាជិកសមាជិកាអតីតយុទ្ធជន និងនិវត្តជនប្រកបដោយភាពស្មោះត្រង់ ស្និទ្ធស្នាល មានទំនួលខុសត្រូវខ្ពស់។ ត្រូវបង្កើនគុណភាពប្រសិទ្ធភាពការងារបន្ថែមទៀត ជាពិសេសត្រូវគោរពពេលវេលា និងម៉ោងរដ្ឋបាលឱ្យបានជាក់លាក់បំផុត។

ទន្ទឹមនឹងនេះ លោកអភិបាលស្រុកស្ទោងបានជំរុញដល់កងកម្លាំងអធិការនគរបាលស្រុក និងសហការីព្រមទាំងអង្គភាព ពាក់ព័ន្ធត្រូវសិក្សាស្រាវជ្រាវស្រង់ស្ថិតិឱ្យបានជាក់លាក់នូវប្រជាពលរដ្ឋដែលបានប្រើប្រាស់លុយរាប់ក្រៅប្រព័ន្ធ ដើម្បីបានជាមូលដ្ឋានក្នុងការទប់ស្កាត់ភាពមិនប្រក្រតីនានាជាពិសេសការរឹបអូសយកទ្រព្យសម្បត្តិរបស់ប្រជាពលរដ្ឋជាកូនបំណុល ដោយខុសច្បាប់ពីសំណាក់ម្ចាស់បំណុល។

លោកបានណែនាំដល់អាជ្ញាធរឃុំត្រូវពិនិត្យតាមដានដល់ស្ថានីយជញ្ជីងថ្លឹងស្រូវ និងទំនិញនានានៅក្នុងមូលដ្ឋានរបស់ខ្លួនដែលមានភាពមិនប្រក្រតីជូនដល់រដ្ឋបាលស្រុក ឬស្ថាប័នអង្គភាពមន្ទីរជំនាញពាក់ព័ន្ធដើម្បីមានវិធានការ និងអន្តរាគមន៍ ជាពិសេសគឺជាការជួយលើកកម្ពស់សេដ្ឋកិច្ចកសិករ និងម្ចាស់កសិដ្ឋានផងដែរ។

លោកអភិបាលស្រុកស្ទោងបានជម្រាបពីបច្ចុប្បន្នភាពសង្គ្រាមនៅមជ្ឈិមបូព៌ា និងសង្គ្រាមឈ្លានពានពីសំណាក់ប្រទេសថៃមកលើព្រះរាជាណាចក្រកម្ពុជា ក៏ដូចជាស្ថានភាពសេដ្ឋកិច្ចសកល និងសេដ្ឋកិច្ចនៃព្រះរាជាណាចក្រកម្ពុជាយើង ជូនសហការី និងមន្ត្រីក្រោមឱវាទ៕

ដោយ ស៊ុម វណ្ណា