AKP ភ្នំពេញ ថ្ងៃទី១២ ខែមីនា ឆ្នាំ ២០២៦ -- ថ្លែងក្នុងពិធីបើកព្រឹត្តិការណ៍ដើរ “ដើម្បីសន្តិភាពយូរអង្វែង សម្រាប់យើងទាំងអស់គ្នា” ក្នុងយុទ្ធនាការអបអរសាទរខួបលើកទី១១៥ ទិវាអន្តរជាតិនារី ៨មីនា ឆ្នាំ២០២៦ ដោយធ្វើដំណើរដោយថ្មើរជើងពីមុខវត្តបទុមវតីរាជវរារាម ឆ្ពោះទៅ វត្តភ្នំដូនពេញ ដោយមានអ្នកចូលរួមជិត២ ០០០នាក់ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ស្ត្រីទីមួយកម្ពុជាបានលើកឡើងអំពីតម្លៃនៃសន្តិភាព ដោយសង្កត់ធ្ងន់ថា សន្តិភាពមិនមែនមានន័យត្រឹមតែការបញ្ចប់សង្គ្រាមនោះទេ ប៉ុន្តែវាគឺជាសុវត្ថិភាព និងក្តីសង្ឃឹមក្នុងជីវិតរស់នៅប្រចាំថ្ងៃរបស់ស្ត្រី និងកុមារគ្រប់រូប។

លោកជំទាវបណ្ឌិតបានបន្តទៀតថា សម្រាប់ម្តាយម្នាក់ សន្តិភាពគឺនៅពេលដែលម្តាយឱបកូនដោយគ្មានការភ័យខ្លាច គ្មានការរត់ចាកចេញពីលំនៅឋាន ព្រោះថាមានតែលំនៅឋាននេះហើយ ដែលជាទីសុខសាន្តសម្រាប់យើងទាំងអស់គ្នា។ សម្រាប់ក្មេងស្រីម្នាក់វិញ សន្តិភាពគឺជាការជឿជាក់ក្នុងការអភិវឌ្ឍន៍ខ្លួន ការចូលរួមដោយគ្មានការរើសអើង ហើយជាការទទួលបាននូវការផ្តល់កតិ្តយសប្រកបដោយក្តីសង្ឃឹម។ សម្រាប់គ្រួសារ សន្តិសុខគឺជាបរិយាកាសប្រកបដោយភាពសុខុដុមរមនា ការជួយគាំទ្រគ្នាទៅវិញទៅមក និងជាស្ថេរភាពដែលអនុញ្ញាតឱ្យកូនៗរីកលូតលាស់ទៅជាពលរដ្ឋល្អសម្រាប់សង្គមជាតិ។

ជាមួយគ្នានេះផងដែរ លោកជំទាវបណ្ឌិតបានគួសបញ្ជាក់ថា រាល់ជំហានរបស់យើងដើររួមគ្នាដើម្បីសន្តិភាពយូរអង្វែងសម្រាប់យើងទាំងអស់គ្នា ជាជំហានដែលនិយាយថា យើងជ្រើសរើសសន្តិភាពជំនួសឱ្យអំពើហិង្សា សាមគ្គីភាពជំនួសឱ្យការបែកបាក់ ក្តីសង្ឃឹមជំនួសឱ្យការភ័យខ្លាច ហើយជាជំហានដែលនិយាយថា យើងមិនទុកឱ្យស្ត្រី កុមារីនិងគ្រួសារណាម្នាក់ឈរតែម្នាក់ឯងនៅពេលលំបាកឡើយ។ ជាងនេះទៅទៀត លោកជំទាវបានអំពាវនាវដល់បងប្អូនជនរួមជាតិ សូមបន្តរួមគ្នាលើកកម្ពស់វប្បធម៌សន្តិភាព អហិង្សា ការគោរពឱ្យតម្លៃគ្នាទៅវិញទៅមក និងដោយសេចក្តីថ្លៃថ្នូរ៕ 

ដោយ ទូច វលក័្ខណ