AKP ភ្នំពេញ ថ្ងៃទី១២ ខែមីនា ឆ្នាំ២០២៦-- ឯកឧត្ដម សុខ ប៊ុនថា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា នៅថ្ងៃទី១២ ខែមីនា ឆ្នាំ២០២៦ បានអញ្ជើញជាអធិបតីភាពបើកវគ្គបណ្ដុះបណ្ដាលស្ដីពីការពង្រឹងសម្ថភាពសេវាគាំទ្រដែលមានការយល់ដឹងអំពីការប៉ះទង្គិចផ្លូវចិត្តដល់មន្ត្រីថ្នាក់ក្រោមជាតិ ដែករៀបចំដោយនាយកដ្ឋានគាំពារជនរងគ្រោះ សហការគាំទ្រដោយអង្គការ World Hope International (WHI) និងស្ថានទូតអង់គ្លេសប្រចាំរាជធានីភ្នំពេញ។

ឯកឧត្ដមរដ្ឋលេខាធិការបានលើកឡើងថា វគ្គបណ្តុះបណ្តាលនេះមានគោលបំណងសំខាន់ពីរគឺ៖ ទី១. ពង្រឹងសមត្ថភាពបង្កើនការយល់ដឹងអំពីការប៉ះទង្គិចផ្លូវចិត្តដល់មន្ត្រីអនុវត្តដែលធ្វើការងារជាមួយជនរងគ្រោះ និងទី២. ពង្រឹងសុខភាពផ្លូវចិត្ត តាមរយៈការយល់ដឹងពីរបៀបផ្តល់សេវាថែទាំសុខភាពផ្លូវចិត្តខ្លួនឯង ការកំណត់ដែនកំណត់ខ្លួនឯងក្នុងនាមជាអ្នកផ្តល់សេវាថែទាំ និងពង្រីកការយល់ដឹងបន្ថែមលើទស្សនវិជ្ជមាន ក្នុងការជួយដល់ជនរងគ្រោះ និងជនងាយរងគ្រោះប្រកបដោយប្រសិទ្ធិភាព។

ពិធីនេះមានការចូលរួមពីឯកឧត្ដមអនុរដ្ឋលេខាធិការ អភិបាលរងខេត្ត តំណាងវិទ្យាស្ថានជាតិសង្គមកិច្ច លោកប្រធាន អនុប្រធាននាយកដ្ឋានគាំពារជនរងគ្រោះ លោកប្រធាន អនុប្រធានមន្ទីរ ស.អ.យ. ខេត្ត សៀមរាប បាត់ដំបង បន្ទាយមានជ័យ ឧត្តរមានជ័យ ព្រះវិហារ កោះកុង និងខេត្តពោធិ៍សាត់ លោក លោកស្រីអភិបាលរងស្រុក មន្ត្រីជំនាញ នៃនាយកដ្ឋាន និងអង្គការដៃគូរសរុបចំនួន ៥០នាក់៕

ដោយ ណយ នឿន (ប្រភព៖ ក្រសួងសង្គមកិច្ច)