AKP ភ្នំពេញ៖ ថ្ងៃទី១២ ខែមីនា ឆ្នាំ២០២៦ -- ដោយសារតែសង្គ្រាមរវាងអាមេរិក និងអ៊ីស្រាអែល ជាមួយប្រទេសអ៊ីរ៉ង់បានធ្វើឱ្យតម្លៃប្រេងពិភពលោកហក់ឡើងយ៉ាងគំហុក ជាមួយគ្នានេះប្រទេសកម្ពុជាក៏ទទួលរងពីឥទ្ធិពលនេះដែរ។ ដោយឡែកនៅក្នុងភូមិសាស្ត្ររាជធានីភ្នំពេញវិញ ក្នុងចំណោមស្ថានីយ៍ប្រេង៤៤៧កន្លែង មានស្ថានីយ៍ប្រេងប្រមាណជិត៥០កន្លែងប៉ុណ្ណោះត្រូវបានផ្កាកអាជីវកម្មរបស់ខ្លួន ជាបណ្តោះអាសន្ន តែមិនបង្កឱ្យមានចលាចលក្នុងសង្គមឡើយ។នេះជាការបញ្ជាក់របស់លោក ងី ប៊ុនលី ប្រធានមន្ទីររ៉ែ និងថាមពលរាជធានីភ្នំពេញ។

នៅក្នុងកិច្ចប្រជុំសាមញ្ញលើកទី២២របស់ក្រុមប្រឹក្សារាជធានីភ្នំពេញ អាណត្តិទី៤ នាព្រឹកថ្ងៃទី១២ ខែមីនា ឆ្នាំ២០២៦នេះ  ក្រោមវត្តមាន ឯកឧត្ដម ម៉ប់ សារិន ប្រធានក្រុមប្រឹក្សារាជធានីភ្នំពេញ និងឯកឧត្ដម ហួត ហៃ អភិបាលរងតំណាង ឯកឧត្ដម ឃួង ស្រេង អភិបាលរាជធានីភ្នំពេញ នៅសាលារាជធានីភ្នំពេញ លោក ងី ប៊ុនលី ប្រធានមន្ទីររ៉ែ និងថាមពលរាជធានីភ្នំពេញបានឱ្យដឹងថា៖ នៅរាជធានីភ្នំពេញមានស្ថានីយ៍ប្រេងឥន្ទនៈ ចំនួន៤៤៧កន្លែង ខណៈមានសង្គ្រាម រវាងអាមេរិក និងអ៊ីស្រាអែល ជាមួយប្រទេសអ៊ីរ៉ង់ បានធ្វើឱ្យតម្លៃប្រេងហក់ឡើង  ហើយធ្វើឱ្យស្ថានីយ៍ប្រេងចំនួនជិត ៥០កន្លែងត្រូវបានផ្កាកអាជីវកម្ម ដោយសារមានបញ្ហាពីការផ្គត់ផ្គង់។ ប៉ុន្តែទោះបីជាយ៉ាងនេះក្តី វាមិនបង្កឱ្យមានចលាចល ក្នុងសង្គមឡើយ។ស្ថានីយ៍ប្រេងឥន្ទនៈធំៗ ដែលបើកអាជីវកម្មធម្មតា មិនមានតម្លើងតម្លៃស្រេចតែចិត្តនោះទេ គឺបានគោរព តម្លៃទៅតាមការណែនាំរបស់ក្រសួងពាណិជ្ជកម្មទាំងអស់។

    
នៅក្នុងឱកាសនោះដែរ ឯកឧត្ដម ម៉ប់ សារិន ប្រធានក្រុមប្រឹក្សារាជធានីភ្នំពេញបានស្នើឱ្យអាជ្ញាធរខណ្ឌទាំង១៤ ចុះតាមដានសភាពការណ៍នៅតាមស្ថានីយ៍ប្រេង ក្នុងមូលដ្ឋានរបស់ខ្លួនជាប្រចាំ ដើម្បីឱ្យម្ចាស់ស្ថានីយ៍ប្រេង គោរពទៅតាមតម្លៃដែលក្រសួងពាណិជ្ជកម្មបានកំណត់។

   
ឯកឧត្ដម ហួត ហៃ អភិបាលរងរាជធានី បានបញ្ជាក់ផងដែរថា៖ ពាក់ព័ន្ធនឹងតម្លៃប្រេងឥន្ទនៈនាពេលនេះ ឯកឧត្ដម ឃួង ស្រេង អភិបាលរាជធានីភ្នំពេញ បានយកចិត្តទុកដាក់ណាស់ ដោយបានណែនាំឱ្យមន្ត្រីពាក់ព័ន្ធតាមដានជាប្រចាំ ដោយកាលពីមុន ១០ថ្ងៃបញ្ជាក់តម្លៃម្តង តែសម្រាប់ពេលនេះត្រឹមតែ៣ថ្ងៃ ត្រូវបញ្ជាក់តម្លៃម្តង ដើម្បីធ្វើយ៉ាងណាកុំឱ្យតម្លៃប្រេងឡើងថ្លៃហួសពីការកំណត់តម្លៃរបស់ក្រសួងពាណិជ្ជកម្ម។ 

    
ទាក់ទងនឹងការបោសសំអាតបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) គណ:បញ្ជាការ ឯកភាព រដ្ឋបាលរាជធានីភ្នំពេញ បានចុះប្រតិបត្តិការជាប្រចាំ មិនថាពេលថ្ងៃ ឬយប់ឡើយ សំដៅធ្វើយ៉ាងណាបោសសម្អាតឱ្យអស់ ទៅតាមផែនការរបស់ឯកឧត្ដម អភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ នៅពាក់កណ្តាលខែមីនា ឆ្នាំ២០២៦នេះ កុំឱ្យមានបទល្មើសបន្ដទៀត៕ 

ដោយ សួស សំរិត