AKP ភ្នំពេញ ថ្ងៃទី១២ ខែមីនា ឆ្នាំ២០២៦-- តាមសំណើពីក្រសួងសង្គមកិច្ច អតីតយុទ្ធជន និងយុវនីតិសម្បទា ក្រុមការងារក្រសួងសាធារណការ និងដឹកជញ្ជូន ដឹកនាំដោយ ឯកឧត្តម ស៊ឹង សុគង់ អនុរដ្ឋលេខាធិការ និងក្រុមការងារក្រសួងសង្គមកិច្ច អតីតយុទ្ធជន និងយុវនីតិសម្បទា ដឹកនាំដោយឯកឧត្តម អ៊ុង សម្បត្តិ អគ្គលេខាធិការ ក្រុមប្រឹក្សាសកម្មភាពជនពិការ បានរួមគ្នាចុះពិនិត្យការរៀបចំ និងកែលម្អហេដ្ឋារចនាសម្ព័ន្ធផាសុកវត្ថុ សម្រាប់ជនមានពិការភាព និងមនុស្សចាស់នៅតាមទីតាំង ឈប់សម្រាកទាំង៨កន្លែងនៃផ្លូវល្បឿនលឿនភ្នំពេញ-ក្រុងព្រះសីហនុ កាលពីថ្ងៃពុធ ទី១១ ខែមីនា ឆ្នាំ២០២៦ ដោយមានការចូលរួមពីថ្នាក់ដឹកនាំ និងមន្រ្តីបច្ចេកទេសរបស់ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុផងដែរ។

ដំណើរការបេសកកម្មនេះគឺធ្វើឡើងដើម្បីចុះទៅពិនិត្យ៖ ១). ហេដ្ឋារចនាសម្ព័ន្ធតាមទីតាំងជាក់ស្តែងដូចជាចំណតរថយន្ត ផ្លាកសញ្ញា ជម្រាល បន្ទប់អនាម័យ បន្ទប់ទឹក និងធ្នាក់ដៃជាដើម។ ២). បង្កើនការយល់ដឹងអំពីផាសុកវត្ថុសម្រាប់ជនមានពិការភាព ជនចាស់ជរា កុមារ និងស្រ្តីមានផ្ទៃពោះ ដល់ភាគីពាក់ព័ន្ធ ថ្នាក់ដឹកនាំ និងមន្រ្តីបច្ចេកទេស ជាពិសេសផ្តោតលើការរចនាជាសាកលសម្រាប់មនុស្សគ្រប់រូប (Universal Design for Everyone)។ ៣). កត់ត្រានូវចំណុចដែលបានរកឃើញដើម្បីធ្វើជារបាយការណ៍ និងលើកអនុសាសន៍កែលម្អនៅពេលខាងមុខដើម្បីឱ្យមនុស្សគ្រប់គ្នាអាចចេញចូលនឹងប្រើប្រាស់បាន។

ក្រុមការងារក្រុមប្រឹក្សាសកម្មភាពជនពិការក៏បានចែកជូនសៀវភៅបទដ្ឋានបច្ចេកទេស ហេដ្ឋារចនាសម្ព័ន្ធរូបវន្ត ដើម្បីបង្កលក្ខណៈងាយស្រួលសម្រាប់ជនមានពិការភាព ដល់ក្រុមការងារចូលរួមផងដែរ ដើម្បីជាមូលដ្ឋានសម្រាប់ការសាងសង់គម្រោងនានាដែលគិតគូរដល់ជនមានពិការភាព។

សូមបញ្ជាក់ផងដែរថា ផ្លូវល្បឿនលឿនមានចម្ងាយ១៨៧,៥គីឡូម៉ែត្រ ពីរាជធានីភ្នំពេញទៅក្រុងព្រះសីហនុ មានចំណតឈប់សម្រាកចំនួន៤ គឺចំណតទី១ (កំពង់ស្ពឺកើត) ត្រង់គីឡូម៉ែត្រលេខ៤០ ចំណតទី២ (កំពង់ស្ពឺលិច) ត្រង់គីឡូម៉ែត្រលេខ៦៣ ចំណតទី៣ (កំពង់សិលា) ត្រង់គីឡូម៉ែត្រលេខ១០៩ និងចំណតទី៤ ត្រង់គីឡូម៉ែត្រលេខ១៥៦ (ព្រៃនប់)៕

ដោយ ទេស ច័ន្ទសុធារី (ប្រភព៖ ក្រសួងសាធារណការ)