AKP បន្ទាយមានជ័យ ថ្ងៃទី១២ ខែមីនា ឆ្នាំ២០២៦-- ការដាំស្តារព្រៃលិចទឹកឡើងវិញ មិនមែនគ្រាន់តែជាការដាំដើមឈើឱ្យតែរួចពីដៃនោះទេ ប៉ុន្តែវាគឺជាយុទ្ធសាស្ត្រដ៏សំខាន់ និងវែងឆ្ងាយក្នុងការស្រោចស្រង់ជម្រកមច្ឆាជាតិ និងរក្សាតុល្យភាពបរិស្ថានបឹងទន្លេសាប។នេះជាការថ្លែងរបស់ឯកឧត្តម ខូវ មាស នាព្រឹកថ្ងៃទី១២ ខែមីនា ឆ្នាំ២០២៦នេះ នៅក្នុងកិច្ចប្រជុំស្វែងរកធាតុចូល និងវាយតម្លៃទីតាំងជាក់ស្តែង សម្រាប់ការរៀបចំផែនការដាំស្តារព្រៃលិចទឹកឡើងវិញ នៅក្នុងភូមិសាស្ត្រខេត្តបន្ទាយមានជ័យដើម្បីធានានិរន្តរភាពប្រព័ន្ធអេកូឡូស៊ី។

កិច្ចប្រជុំនេះ ក៏មានការអញ្ជើញចូលរួមពីលោក ឃ្លោក នួយ អភិបាលរងខេត្ត តំណាង ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ អភិបាល អភិបាលរងក្រុង-ស្រុក មន្ទីរអង្គភាពពាក់ព័ន្ធ និងមន្ត្រីបច្ចេកទេសជាច្រើនរូប។
ឯកឧត្តមខូវ មាស បានបញ្ជាក់ថា "យើងត្រូវធ្វើការវាយតម្លៃឱ្យបានច្បាស់លាស់លើដីដែលបានដកហូត និងដីដែលរងការរំលោភបំពានកន្លងមក ដើម្បីរៀបចំផែនការដាំដុះឱ្យចំគោលដៅ និងមានបច្ចេកទេសត្រឹមត្រូវ ធានាថា ដើមឈើដែលដាំហើយនឹងលូតលាស់ក្លាយជាជម្រកដ៏មានសុវត្ថិភាពសម្រាប់ត្រីពងកូន"។
    
តំណាងឱ្យរដ្ឋបាលខេត្ត លោក ឃ្លោក នួយ បានសម្តែងនូវការគាំទ្រយ៉ាងពេញទំហឹងចំពោះគម្រោងស្តារព្រៃលិចទឹកនេះ។ លោកបានលើកឡើងថា ខេត្តបន្ទាយមានជ័យបានត្រៀមខ្លួនរួចជាស្រេចក្នុងការសហការជាមួយអាជ្ញាធរទន្លេសាប ដើម្បីកំណត់និយាមកា និងការពារផ្ទៃដីព្រៃលិចទឹកដែលនៅសេសសល់។ លោកបានជំរុញឱ្យអាជ្ញាធរមូលដ្ឋាន ពិសេសក្រុង-ស្រុកដែលជាប់នឹងតំបន់បឹងទន្លេសាបត្រូវបង្កើនការយកចិត្តទុកដាក់ខ្ពស់ក្នុងការទប់ស្កាត់ការទន្ទ្រានថ្មីៗ និងត្រៀមលក្ខណៈសម្បត្តិសម្រាប់យុទ្ធនាការដាំកូនឈើនាពេលខាងមុខនេះ។    
កិច្ចប្រជុំបានសម្រេចលើចំណុចសំខាន់ៗមួយចំនួន រួមមានការចុះវាស់វែង និងកំណត់ព្រំប្រទល់ បញ្ជូនក្រុមការងារបច្ចេកទេសចុះពិនិត្យទីតាំងជាក់ស្តែងភ្លាមៗក្រោយកិច្ចប្រជុំ។ ការជ្រើសរើសប្រភេទពូជឈើជ្រើសរើសប្រភេទដើមឈើដែលធន់នឹងទឹក និងផ្ដល់អត្ថប្រយោជន៍ខ្ពស់ដល់ប្រព័ន្ធអេកូឡូស៊ីក្នុងតំបន់។ការអប់រំផ្សព្វផ្សាយបន្តបញ្ជ្រាបការយល់ដឹងដល់ប្រជាពលរដ្ឋក្នុងមូលដ្ឋានឱ្យស្រឡាញ់ និងចូលរួមការពារព្រៃលិចទឹក ដែលជា "ឆ្នាំងបាយ" មិនចេះរីងស្ងួតរបស់ពួកគេ។

ការដាំស្តារព្រៃលិចទឹកឡើងវិញនេះ ត្រូវបានគេរំពឹងថា នឹងជួយកាត់បន្ថយឥទ្ធិពលនៃការប្រែប្រួលអាកាសធាតុ ការពារការបាក់ច្រាំង និងបង្កើនទិន្នផលត្រីធម្មជាតិ ដែលជាប្រភពចំណូលដ៏សំខាន់សម្រាប់ប្រជាពលរដ្ឋក្នុងខេត្តបន្ទាយមានជ័យ ក៏ដូចជាទូទាំងប្រទេសផងដែរ៕

ដោយ ឈុន សារ៉ាត