AKP ភ្នំពេញ ថ្ងៃទី១២ ខែមីនា ឆ្នាំ២០២៦-- លោក ខូវ មាស អគ្គលេខាធិការរងអាជ្ញាធរទន្លេសាបនៃក្រសួងធនធានទឹក និងឧតុនិយម និងមន្ត្រីជំនាញនៃអាជ្ញាធរទន្លេសាប នៅថ្ងៃទី១១ ខែមីនា ឆ្នាំ២០២៦ បានដឹកនាំកិច្ចប្រជុំពិភាក្សាជាមួយអង្គភាពពាក់ព័ន្ធនៃរដ្ឋបាលខេត្តបាត់ដំបង ស្តីពី ការរៀបចំផែនការដាំស្តារព្រៃលិចទឹកឡើងវិញនៅតំបន់ជុំវិញបឹងទន្លេសាប ក្នុងភូមិសាស្ត្រខេត្តបាត់ដំបង។

លោក ខូវ មាស បានលើកឡើងថា គោលបំណងនៃកិច្ចប្រជុមានចំនួនបីចំណុច៖ ទី១. បទបង្ហាញដោយមន្រ្តីជំនាញអាជ្ញាធរទន្លេសាប អំពីផែនការដាំស្តារព្រៃលិចទឹកឡើងវិញ ក្នុងតំបន់រងការទន្ទ្រាន តំបន់ព្រៃរេចរិល តំបន់ភ្លើងឆេះព្រៃ ក្នុងភូមិសាស្រ្តខេត្តបាត់ដំបង ទី២. ពិភាក្សាប្រមូលធាតុចូលបន្ថែមពីមន្ទីរជំនាញពាក់ព័ន្ធ ដើម្បីរៀបចំបច្ចុប្បន្នភាពផែនការអនុវត្តកិច្ចការដាំស្តារព្រៃលិចទឹកឡើងវិញឱ្យសមស្របតាមស្ថានភាពជាក់ស្តែងនៅក្នុងមូលដ្ឋានប្រកបដោយប្រសិទ្ធភាព និងទី៣. ចែករំលែកទិន្នន័យព័ត៌មាន ផ្លាស់ប្តូរបទពិសោធន៍ និងបច្ចេកទេសនានា ពាក់ព័ន្ធកិច្ចការដាំស្តារព្រៃលិចទឹកឡើងវិញ។

លោកប្រធានអង្គប្រជុំក៏បានបញ្ជាក់ពីសារៈសំខាន់នៃតំបន់បឹងទន្លេសាប និងជាពិសេសកិច្ចការដាំស្តារព្រៃលិចទឹកឡើងវិញ ដែលរាជរដ្ឋាភិបាលបានប្រគល់កិច្ចការងារនេះដល់អាជ្ញាធរទន្លេសាប ក្នុងការរៀបចំផែនការ ការអនុវត្តការងារ និងបានថ្លែង អំណរគុណដល់ថ្នាក់ដឹកនាំរដ្ឋបាលខេត្តបាត់ដំបង បានផ្តល់កិច្ចសហការណ៍យ៉ាងល្អក្នុងការសម្របសម្រួលដល់ក្រុមការងារជំនាញអាជ្ញាធរទន្លេសាប ដើម្បីធានាបាននូវប្រសិទ្ធភាពការងារ។

កិច្ចប្រជុំបានពិភាក្សាយ៉ាងផុសផុល ដោយមានការចូលរួមផ្តល់ព័ត៌មានធាតុចូលល្អៗជាច្រើនពីមន្ទីរជំនាញពាក់ព័ន្ធ រដ្ឋបាល ស្រុក ឃុំ ដែលស្ថិតក្នុងភូមិសាស្រ្តតំបន់៣ និងស្នើឱ្យមានការពិភាក្សារួមគ្នាជាបឋមដើម្បីកំណត់ទីតាំងអាទិភាពសម្រាប់ការដាំស្តារឡើងវិញ។ ក្រុមការងារបានបន្តចុះពិនិត្យទីតាំងជាក់ស្តែងនៃតំបន់ដែលត្រូវដាំស្តារព្រៃលិចទឹកឡើងវិញក្នុងភូមិសាស្រ្ត តំបន់ចុងតាអួរ ភូមិព្រែកត្រប់ ឃុំព្រែកនរិន្ទ ស្រុកឯកភ្នំ។ 

កិច្ចប្រជុំនោះមានការចូលរួមពីលោក ហេង វណ្ណនី អភិបាលរងខេត្តបាត់ដំបង មន្ទីរជំនាញពាក់ព័ន្ធមានដូចជា៖ មន្ទីរបរិស្ថាន មន្ទីរកសិកម្ម រុក្ខាប្រមាញ់ និងនេសាទ មន្ទីរធនធានទឹក និងឧតុនិយម មន្ទីររៀបចំដែនដី នគរូបនីយកម្ម សំណង់ និងសុរិយោដី មន្ទីរអភិវឌ្ឍន៍ជនបទ រួមទាំងអាជ្ញាធរ ស្រុក ឃុំ ពាក់ព័ន្ធតំបន់បឹងទន្លេសាប ដែលមានសមាសភាព សរុបចំនួន៤០រូប៕

ដោយ ណយ នឿន (ប្រភព៖ អាជ្ញាធរទន្លេសាប)