AKP ភ្នំពេញ ថ្ងៃទី១២ ខេមីនា ឆ្នាំ២០២៦-- ក្រុមការងាររបស់អង្គការ WWF-កម្ពុជា ប្រចាំនៅតំបន់ទេសភាពខ្ពង់រាបភាគខាងកើត (EPL) រួមជាមួយមន្ត្រីមន្ទីរបរិស្ថានខេត្ត  និងសមាជិកសហគមន៍មូលដ្ឋាន បានរៀបចំដំណើរទស្សនកិច្ចសម្រាប់ Abigail Fryer អនុប្រធានបេសកកម្ម នៃស្ថានទូតចក្រភពអង់គ្លេសប្រចាំទីក្រុងភ្នំពេញ ទៅកាន់ស្នាក់ការល្បាតត្រពាំងត្មៀរ ក្នុងដែនជម្រកសត្វព្រៃស្រែពក។ 

បើតាមប្រភពពីអង្គការ WWF បានឱ្យដឹងនៅថ្ងៃទី១១ ខែមីនា ឆ្នាំ២០២៦នេះថា  នៅអំឡុងពេលទស្សនកិច្ចនេះ គណៈប្រតិភូបានស្វែងយល់ពីការងារប្រចាំថ្ងៃរបស់មន្ត្រីអនុរក្ស មានដូចជា ការងារល្បាត ពិនិត្យ និងតាមដានសត្វព្រៃ និងការទប់ស្កាត់សកម្មភាពខុសច្បាប់នៅក្នុងតំបន់ការពារ។ មន្ត្រីឧទ្យានុរក្សក៏បានចែករំលែកពីបញ្ហាប្រឈមដែលពួកគេជួបប្រទះនៅទីវាល និងបានលើកឡើងពីតម្រូវការការគាំទ្របន្ថែម ដើម្បីពង្រឹងសមត្ថភាព និងប្រសិទ្ធភាពក្នុងការអនុវត្តការងារ។

ក្នុងដំណើរទស្សនកិច្ចនេះផងដែរ ក៏មានសកម្មភាពដាំកូនឈើ ដែលជាផ្នែកមួយនៃកម្មវិធីស្តារព្រៃឈើរបស់អង្គការ WWF-កម្ពុជា ។ ដំណើរទស្សនកិច្ចនេះបានបង្ហាញពីសារៈសំខាន់នៃការគាំទ្រដល់មន្ត្រីអនុរក្ស និងភាពជាដៃគូអន្តរជាតិ ក្នុងការការពារ និងអភិរក្សព្រៃឈើ និងជីវៈចម្រុះនៅកម្ពុជា ៕ 

ដោយ ណយ នឿន (ប្រភព៖WWF)