AKP តាកែវ ថ្ងៃទី12 ខែមីនា ឆ្នាំ2026--កងរាជអាវុធហត្ថខេត្តតាកែវ បានបើកកិច្ចប្រជុំត្រួតពិនិត្យ ការអនុវត្តតួនាទីភារកិច្ច ប្រចាំសប្ដាហ៍ទី១ ខែមីនា ឆ្នាំ២០២៦ និងទិសដៅសប្ដាហ៍បន្ត។ពិធីនេះរៀបចំឡើង នៅសាលប្រជុំ បញ្ជាការដ្ឋានកងរាជអាវុធហត្ថខេត្តតាតាកែវ កាលពីព្រឹកថ្ងៃពុធ ទី១១ ខែមីនា ឆ្នាំ២០២៦។អញ្ជើញជាអធិបតីក្នុងពិធីនោះលោក សេង មហា មេបញ្ជាការកងរាជអាវុធហត្ថខេត្តតាកែវ ព្រមទាំងមានការអញ្ជើញចូលរួមពីលោកលោកស្រីមេបញ្ជាការរង នាយសេនាធិការ នាយសេនាធិការរង ប្រធានមន្ទីរទាំង៧ នាយការិយាល័យពាក់ព័ន្ធ ប្រធានអង្គភាពនគរបាលយុត្តិធម៌ លោកស្រីប្រធានអនុប្រធានក្រុមការងារយេនឌ័រ លោកមេបញ្ជាការកងអនុសេនាធំចល័ត និងមន្ត្រីកងរាជអាវុធហត្ថចូលរួមជាច្រើនរូបផងដែរ។

មានប្រសាសន៍សំណេះសំណាលក្នុងពិធីនោះ លោកឧត្តមសេនីយ៍ត្រី សេង មហា បានសង្កត់ធ្ងន់លើការបន្តការអនុវត្តបទបញ្ជារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក៏ដូចជាបទបញ្ជារបស់ ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ក្នុងការបង្ក្រាបបទល្មើសឆបោកតាមប្រព័ន្ធអនឡាញ(Online Scams)។ជាមួយគ្នានេះដែរ លោកក៏បានផ្សព្វផ្សាយបទបញ្ជារបស់ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ និងជាប្រធានគណៈបញ្ជាការឯកភាពរដ្ឋបាលខេត្តតាកែវ អំពីការបង្ការ ទប់ស្កាត់ និងបង្ក្រាបបទល្មើស Online Scams នៅក្នុងភូមិសាស្ត្រខេត្តតាកែវ។

លោកឧត្តមសេនីយ៍ត្រី សេង មហា ក៏បានធ្វើការណែនាំឲ្យប្រធានមន្ទីរទាំង៧ ពង្រឹងកម្លាំងដែលមានភារកិច្ចប្រចាំការលើ លេខពិសេសទាន់ហេតុការណ៍(Hotline) ២៤ម៉ោងលើ២៤ម៉ោង សម្រាប់ទទួលព័ត៌មាន ឬពាក្យបណ្តឹងពីប្រជាពលរដ្ឋដោយផ្ទាល់ និងទាន់ពេលវេលា។ កម្លាំងទាំងអស់ត្រូវបន្តពង្រឹងការអនុវត្តច្បាប់ សារាចរណែនាំ និងបទបញ្ជានានា ព្រមទាំងបំពេញតួនាទីភារកិច្ចតាមឋានានុក្រម។ ពិសេសត្រូវបន្តអនុវត្តន៍ ផែនការល្បាតចល័តក្នុងភូមិសាស្រ្ត ដើម្បីបង្ការនិងបង្ក្រាបរាល់បទល្មើស ដូចជា បទល្មើសគ្រឿងញៀន ការបង្ក្រាបក្មេងទំនើង ការជួញដូរមនុស្ស និងល្បែងស៊ីសងខុសច្បាប់។

លោកមេបញ្ជាការកងរាជអាវុធហត្ថខេត្តតាកែវ ក៏បានសង្កត់ធ្ងន់លើការបន្តពង្រឹងទៅលើកម្លាំងត្រៀមអន្តរាគមន៍ ២៤ម៉ោងលើ២៤ម៉ោង ការងារប្រចាំបញ្ជា និងប្រចាំការ។ ការិយាល័យជំនាញត្រូវរៀបចំកិច្ចប្រជុំ ត្រួតពិនិត្យការអនុវត្តតួនាទីភារកិច្ច ការធ្វើកំណែទម្រង់ ការកសាងអង្គភាព និងទិសដៅការងារក្នុងសប្ដាហ៍បន្ត។ត្រូវបន្តរក្សា សាមគ្គីភាពផ្ទៃក្នុង ឱ្យបានល្អប្រសើរ ដើម្បីធានាបាននូវសន្តិសុខ សណ្តាប់ធ្នាប់សាធារណៈ និងសុវត្ថិភាពជូនប្រជាពលរដ្ឋនៅក្នុងខេត្តតាកែវ៕

តាកែវ អ៊ុច សៀង