AKP ភ្នំពេញ ថ្ងៃទី១២ ខែមីនា ឆ្នាំ២០២៦—ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានគូសបញ្ជាក់ថា ការរៀបចំពិព័រណ៍សៀវភៅដែលជាព្រឹត្តិការណ៍អមក្នុងទិវាជាតិអំណានជារៀងរាល់ឆ្នាំ សបញ្ជាក់ពីសក្ខីភាពនៃការប្តេជ្ញាចិត្តរបស់ក្រសួងអប់រំ យុវជន និងកីឡា ក្នុងការលើកកម្ពស់គុណភាពអប់រំ  តាមរយៈការបង្កើតទម្លាប់នៃការអាន និងការកសាងវប្បធម៌សិក្សាពេញមួយជីវិត។

ក្នុងពិធីកាត់ខ្សែបូសម្ពោធពិព័រណ៍សៀវភៅ ដែលបានរៀបចំឡើងដើម្បីអបអរសាទរទិវាជាតិអំណានលើកទី១១ ក្រោមប្រធានបទ «សំណេរ និងអំណានក្នុងបរិបទថ្មី» នារសៀលថ្ងៃទី១១ ខែមីនា ឆ្នាំ២០២៦ ឯកឧត្ដមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា ក្នុងបរិបទថ្មីនេះ ការពង្រឹងទំនាក់ទំនងរវាងសាលារៀន បណ្ណាល័យ អ្នកនិពន្ធ និងអ្នកអាន គឺជាកត្តាចាំបាច់បំផុត ព្រោះថាមានអ្នកអាន ទើបមានអ្នកនិពន្ធ។ ឯកឧត្តមថា ក្រសួងនឹងបន្តផ្តល់ឱកាសកាន់តែទូលំទូលាយដល់អ្នកនិពន្ធក្នុងការបង្ហាញស្នាដៃ ដើម្បីជំរុញការផលិតធនធានអំណានឱ្យកាន់តែសម្បូរបែប ដែលជាគ្រឹះក្នុងការជួយគាំទ្រដល់ការអនុវត្តកញ្ចប់អំណានដំបូងរបស់ក្រសួងឱ្យមានប្រសិទ្ធភាព សំដៅបណ្តុះស្មារតីស្នេហាអក្សរសាស្ត្រជាតិ និងការពារអត្តសញ្ញាណខ្មែរឱ្យបានគង់វង្ស។

ឯកឧត្តមបណ្ឌិតសភាចារ្យ ឧបនាយករដ្ឋមន្ត្រីបានលើកទឹកចិត្តដល់ក្មួយៗសិស្សានុសិស្ស និងយុវជនទាំងអស់ឱ្យខិតខំសិក្សាស្រាវជ្រាវពីវប្បធម៌ និងភាសារបស់ខ្លួនឱ្យបានស៊ីជម្រៅ ដោយអាចប្រើប្រាស់ឥទ្ធិពលរបស់អ្នកនិពន្ធល្បីៗជាកម្លាំងចលករក្នុងការអភិវឌ្ឍសមត្ថភាពខ្លួន។ ឯកឧត្តមបានសង្កត់ធ្ងន់ថា ភាសាជាតិអាចរីកចម្រើនទៅបានគឺអាស្រ័យលើស្មារតីអភិរក្ស និងអភិវឌ្ឍពីយើងទាំងអស់គ្នា។ តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ជួន ណារ៉ុន បានថ្លែងអំណរគុណយ៉ាងជ្រាលជ្រៅចំពោះក្រសួង ស្ថាប័នពាក់ព័ន្ធ ដៃគូសហការ អ្នកឧបត្ថម្ភ និងគ្រប់ភាគីទាំងអស់ ដែលបានរួមចំណែកយ៉ាងសកម្មក្នុងការរៀបចំព្រឹត្តិការណ៍ដ៏មានសារៈសំខាន់នេះ ដើម្បីអនាគតដ៏រុងរឿងនៃវិស័យអប់រំនៅកម្ពុជា។

សូមជម្រាបថា ពិព័រណ៍សៀវភៅនេះប្រព្រឹត្តទៅរយៈពេល៥ថ្ងៃគឺចាប់ពីថ្ងៃទី១១ ដល់ទី១៥ ខែមីនា ឆ្នាំ២០២៦ នៅវិទ្យាស្ថានបច្ចេកវិទ្យាកម្ពុជា ដែលបើកជូនសាធារណជនចូលទស្សនាដោយសេរី ដើម្បីលើកកម្ពស់វប្បធម៌អាននៅកម្ពុជា។ ក្នុងពិព័រណ៍នេះ នឹងមានការបង្ហាញជូននូវសៀវភៅជាច្រើនប្រភេទស្របតាមតម្រូវការរបស់អ្នកអាន ក្នុងនោះរួមទាំងសៀវភៅដែលជាស្នាដៃនិពន្ធដោយ ឯកឧត្ដមបណ្ឌិតសភាចារ្យ ឧបនាយករដ្ឋមន្ត្រីផងដែរ។ ដូច្នេះសូមអញ្ជើញចូលរួមឱ្យបានច្រើនកុះករ ដើម្បីលើកកម្ពស់សកម្មភាពអាននៅកម្ពុជា៕

ដោយ៖ ចាន់ សុភឿន (ប្រភព៖ ក្រសួងអប់រំ)