AKP បន្ទាយមានជ័យ ថ្ងៃទី១២ ខែមីនា ឆ្នាំ២០២៦--ក្នុងស្មារតីប្តេជ្ញាចិត្តខ្ពស់ដើម្បីការពារសុវត្ថិភាពជូនប្រជាពលរដ្ឋ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានដាក់ចេញនូវការណែនាំយ៉ាងម៉ឺងម៉ាត់ដល់អាជ្ញាធរ និងសមត្ថកិច្ចគ្រប់លំដាប់ថ្នាក់ ត្រូវបន្តសហការគ្នាជាធ្លុងមួយ ដើម្បីលុបបំបាត់អំពើជួញដូរមនុស្ស និងបទល្មើសឆបោកតាមប្រព័ន្ធអនឡាញឱ្យមានប្រសិទ្ធភាពបំផុត។

ការថ្លែងជំរុញបែបនេះបានធ្វើឡើងក្នុងឱកាសដែលខេត្តបន្ទាយមានជ័យរៀបចំ ពិធីអបអរសាទរទិវាជាតិប្រឆាំងការជួញដូរមនុស្ស ១២ ធ្នូ ឆ្នាំ២០២៥ ខួបលើកទី១៩ ក្រោមប្រធានបទ «រួមគ្នា ដើម្បីកម្ពុជាគ្មានអំពើជួញដូរមនុស្ស និងអំពើឆបោកតាមប្រព័ន្ធអនឡាញ»។ ពិធីនេះបានប្រព្រឹត្តទៅនៅរសៀលថ្ងៃពុធ ទី១១ ខែមីនា ឆ្នាំ២០២៦ នៅសាលប្រជុំ "ធំ" សាលាខេត្ត។

ក្នុងសុន្ទរកថាដ៏មានអត្ថន័យ ឯកឧត្តម អ៊ុំ រាត្រី បានសង្កត់ធ្ងន់ថា បច្ចុប្បន្នអំពើជួញដូរមនុស្សមិនត្រឹមតែតាមរយៈការបង្ខិតបង្ខំកម្លាំងពលកម្ម ឬផ្លូវភេទប៉ុណ្ណោះទេ ប៉ុន្តែបានវិវត្តទៅជា «អំពើឆបោកតាមប្រព័ន្ធអនឡាញ» ដែលជាបញ្ហាប្រឈមថ្មី និងស្មុគស្មាញ។ យើងមិនត្រូវបណ្តែតបណ្តោយឱ្យខេត្តរបស់យើង ក្លាយជាកន្លែងជ្រកកោននៃក្រុមឧក្រិដ្ឋជនទាំងនេះឡើយ។ អាជ្ញាធរក្រុង-ស្រុក កងកម្លាំងប្រដាប់អាវុធ និងមន្ទីរពាក់ព័ន្ធ ត្រូវបង្កើនការតាមដាន ក្តាប់ព័ត៌មាន និងបង្ក្រាបឱ្យបានទាន់ពេលវេលា។

ជាមួយនោះ   ឯកឧត្តមអភិបាលខេត្តក៏បានអំពាវនាវដល់ប្អូនៗសិស្សានុសិស្ស និងយុវជនទាំងអស់ ត្រូវមានការប្រុងប្រយ័ត្នខ្ពស់ចំពោះការអូសទាញការងារដែលមានប្រាក់ខែខ្ពស់ខុសពីធម្មតា និងការឆបោកតាមបណ្តាញសង្គមផ្សេងៗ ដែលអាចឈានទៅដល់ការជួញដូរមនុស្ស។

សូមបញ្ជាក់ថា ពិធីនេះមិនត្រឹមតែជាការរំលឹកខួបប៉ុណ្ណោះទេ ប៉ុន្តែគឺជាការដាស់តឿនស្មារតីដល់មន្ត្រីអនុវត្តច្បាប់ និងសាធារណជនឱ្យយល់ដឹងកាន់តែច្បាស់អំពីផលវិបាកនៃបទល្មើសនេះ។ ថ្នាក់ដឹកនាំខេត្តបានបង្ហាញជំនឿចិត្តថា តាមរយៈការចូលរួមយ៉ាងសកម្មពីគ្រប់ភាគីពាក់ព័ន្ធ បន្ទាយមានជ័យនឹងបន្តធ្វើជាខេត្តគំរូក្នុងការបង្ការ និងទប់ស្កាត់រាល់ទម្រង់នៃអំពើជួញដូរមនុស្ស ដើម្បីសម្រេចបាននូវចក្ខុវិស័យ «កម្ពុជាគ្មានអំពើជួញដូរមនុស្ស»៕

ដោយ ឈុន សារ៉ាត