AKP ភ្នំពេញ ថ្ងៃទី១១ ខែមីនា ឆ្នាំ២០២៦ -- ឯកឧត្តម​ ឃួន​ ផុនរតនៈ​ ឯកអគ្គរាជទូត​កម្ពុជាប្រចាំសាធារណរដ្ឋកូរ៉េ​ បានដឹកនាំកិច្ចប្រជុំផ្ទៃក្នុងស្ថានទូត​ ដេីម្បីផ្សព្វផ្សាយខ្លឹមសារសំខាន់ៗនៃសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦​ របស់ក្រសួងការបរទេស​ និងសហប្រតិបត្តិការអន្តរជាតិ​កាលពីពេលថ្មីៗនេះ។

យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ (កបទ.សអ) បានបិទបញ្ចប់សន្និបាតបូកសរុប លទ្ធផលការងារប្រចាំឆ្នាំរយៈពេលពីរថ្ងៃ ដែលបានប្រព្រឹត្តទៅពីថ្ងៃទី៥ ដល់ថ្ងៃទី ៦ ខែមីនា ឆ្នាំ២០២៦ នៅរាជធានី ភ្នំពេញ ដើម្បីពិនិត្យឡើងវិញនូវវឌ្ឍនភាព និងសមិទ្ធផល ដែលសម្រេចបានក្នុងឆ្នាំ២០២៥ និងលើកទិសដៅ ការងារសម្រាប់ឆ្នាំ២០២៦។

សន្និបាតបូកសរុបលទ្ធផលការងារ បានប្រព្រឹត្តទៅក្រោមអធិបតីភាពដ៏ខ្ពង់ខ្ពស់ របស់ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ និងមានការ ចូលរួមពីសំណាក់ប្រធានបេសកកម្មកម្ពុជានៅបរទេស និងមន្ត្រីការទូតរបស់ក្រសួង។

ក្នុងឱកាសនោះដែរ តំណាង មន្ត្រីជាន់ខ្ពស់មកពីស្ថាប័នពាក់ព័ន្ធ ក៏ត្រូវបានអញ្ជើញចូលរួមធ្វើបទបង្ហាញនិងចូលរួមក្នុងពិធីបើក និងពិធីបិទនៃ អង្គសន្និបាតផងដែរ។

ឯកឧត្តមឧបនាយករដ្ឋមន្ត្រី បានគូសបញ្ជាក់ពីការវិវត្តនៃតួនាទីរបស់កម្ពុជា ជាតួអង្គប្រកបដោយបុរេ សកម្មនិងគោរពច្បាប់ នៅលើឆាកអន្តរជាតិ ព្រមទាំងកិច្ចខិតខំប្រឹងប្រែងរបស់កម្ពុជាក្នុងការពង្រីកទំនាក់ទំនង ការទូត ដោយរក្សាទំនាក់ទំនងផ្លូវការជាមួយប្រទេសចំនួន ១៧៥ និងមានស្ថានតំណាងកម្ពុជាចំនួន ៤៦ នៅ ទូទាំងពិភពលោក។ 

ឯកឧត្តមឧបនាយករដ្ឋមន្ត្រី ក៏បានលើកឡើងពីការប្តេជ្ញាចិត្តយ៉ាងមុតមាំរបស់កម្ពុជា ក្នុងការ គាំទ្រពហុភាគីនិយម និងតួនាទីបុរេសកម្មរបស់កម្ពុជា ក្នុងការលើកកម្ពស់សណ្តាប់ធ្នាប់អន្តរជាតិ ដោយផ្អែកលើ ច្បាប់។

សន្និបាតបូកសរុបលទ្ធផលការងារប្រចាំឆ្នាំនេះ ក៏មានកិច្ចប្រជុំចង្អៀតដែលផ្តោតការពិភាក្សាលើការផ្លាស់ ប្តូរសណ្តាប់ធ្នាប់អន្តរជាតិ និងផលបច្ច័យ ជម្រើសយុទ្ធសាស្ត្ររបស់កម្ពុជាសម្រាប់អនាគត និងការជញការ សេដ្ឋកិច្ចកម្ពុជា ក៏ដូចជាកំណែទម្រង់ផ្ទៃក្នុង ផ្ទៃក្នុង សំដៅពង្រឹងធនធានមនុស្សនិងសមត្ថភាពស្ថាប័ន ដើម្បីដោះស្រាយ បញ្ហាប្រឈមដែលកំពុងកើតមាន។

ឯកឧត្តមឧបនាយករដ្ឋមន្ត្រី ក៏បានសង្កត់ធ្ងន់លើសារៈសំខាន់នៃការពង្រឹងគោលនយោបាយការបរទេស បុរេសកម្ម និងការប្រាស្រ័យទាក់ទងជាយុទ្ធសាស្ត្រ ដើម្បីពង្រឹងភាពធន់របស់កម្ពុជា ក្នុងការការពារផលប្រយោជន៍ ស្នូលរបស់ជាតិ រួមមានការរក្សាអព្យាក្រឹតភាព ឯករាជ្យភាព អធិបតេយ្យ និងបូរណភាពទឹកដី ព្រមទាំងលើក កម្ពស់សន្តិភាព ឯកភាពជាតិ និងវឌ្ឍនភាពសង្គម-សេដ្ឋកិច្ច។ 

ចំពោះទំនាក់ទំនងជាមួយប្រទេសជិតខាង ឯកឧត្តមឧបនាយករដ្ឋមន្ត្រី បានសង្កត់ធ្ងន់លើជំហរជាគោលការណ៍របស់កម្ពុជាក្នុងការស្វែងរកដំណោះស្រាយ ដោយសន្តិវិធីចំពោះជម្លោះព្រំដែន និងទំនាស់នានា ស្របតាមច្បាប់អន្តរជាតិ និងកិច្ចព្រមព្រៀងទ្វេភាគី ព្រមទាំង លើកកម្ពស់ការជឿជាក់ និងទំនុកចិត្តគ្នា ភាពជាអ្នកជិតខាងល្អ និងកិច្ចសហប្រតិបត្តិការឈ្នះ-ឈ្នះ។

ឯកឧត្តមឧបនាយករដ្ឋមន្ត្រី បានអញ្ជើញផ្តល់កិត្តិយសបំពាក់គ្រឿងឥស្សរិយយសជូនថ្នាក់ដឹកនាំ និងមន្ត្រី រាជការក្រសួង ចំពោះការចូលរួមចំណែក និងកិច្ចខិតខំប្រឹងប្រែងបំពេញការងារ៕

ដោយ ៖ ប៊ុនរិទ្ធ