AKP ភ្នំពេញ ថ្ងៃទី១១ ខែមីនា ឆ្នាំ២០២៦-- ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និងជាប្រធានគណៈកម្មាធិការទទួលស្គាល់គុណភាពថែទាំព្យាបាល នៃក្រសួងសុខាភិបាល បានលើកឡើងក្នុងកិច្ចប្រជុំលើកទី១ របស់គណៈកម្មាធិការទទួលស្គាល់គុណភាពថែទាំព្យាបាល នៃក្រសួងសុខាភិបាល (គ.ទ.គ.ស.) នាថ្ងៃទី១១ ខែមីនា ឆ្នាំ២០២៦ ថា គណៈកម្មាធិការទទួលស្គាល់គុណភាពថែទាំព្យាបាល នៃក្រសួងសុខាភិបាល សំដៅរក្សាបាននូវ “វប្បធម៌នៃការវាយតម្លៃលើលទ្ធផលនៃភាពគត់មុត” នៃសេវាសុខាភិបាល នៅគ្រប់មូលដ្ឋានសុខាភិបាលទាំងសាធារណៈ និងឯកជន។

កិច្ចប្រជុំនេះមានគោលបំណងពិនិត្យឯកភាព និងផ្តល់អនុសាសន៍លើចំណុចចម្បងៗមួយចំនួន៖ ១) ផែនការសកម្មភាពឆ្នាំទី១ (ឆ្នាំ២០២៦) របស់ គ.ទ.គ.ស.។ ២) ផែនការកែសម្រួលស្តង់ដាទទួលស្គាល់គុណភាពសេវារបស់មន្ទីរពេទ្យ និងមណ្ឌលសុខភាព ដែលនឹងដាក់ឱ្យប្រើប្រាស់សម្រាប់មូលដ្ឋានសុខាភិបាលសាធារណៈ និងឯកជន។ ៣) ការកំណត់នូវកម្រិតនៃការផ្តល់ការទទួលទទួលស្គាល់គុណភាពរបស់មូលដ្ឋានសុខាភិបាល ដែលនឹងចូលរួមក្នុងការវាយតម្លៃកែលម្អគុណភាព របស់ គ.ទ.គ.ស.។ ៤) ការស្នើសុំអនុសាសន៍ចំពោះតម្រូវការ ពីអ្នកជំនាញនៃប្រព័ន្ធទទួលស្គាល់គុណភាព របស់ គ.ទ.គ.ស. ពីខាងក្រៅបន្ថែម។

គណៈកម្មាធិការទទួលស្គាល់គុណភាពសេវាថែទាំព្យាបាលនៃក្រសួងសុខាភិបាល (គ.ទ.គ.ស) នឹងដើរតួនាទីជាយន្តការឯករាជ្យ ក្នុងការធានាស្តង់ដាគុណភាពសេវាសុខាភិបាល ទាំងក្នុងវិស័យសាធារណៈ និងឯកជន នៅទូទាំងព្រះរាជាណាចក្រកម្ពុជា។ ប្រព័ន្ធទទួលស្គាល់គុណភាពនេះ នឹងជួយលើកកម្ពស់សមត្ថភាពមូលដ្ឋានសុខាភិបាល ពង្រឹងការគ្រប់គ្រង ដើម្បីផ្តល់នូវសេវាប្រកបដោយគុណភាព សុវត្ថិភាព ស័ក្តិសិទ្ធិភាព និងកាន់តែបង្កើនទំនុកចិត្តពីសំណាក់ប្រជាពលរដ្ឋចំពោះប្រព័ន្ធសុខាភិបាលជាតិ៕

ដោយ ទេស ច័ន្ទសុធារី (ប្រភព៖ ក្រសួងសុខាភិបាល)