AKP ភ្នំពេញ ថ្ងៃទី១១ ខែមីនា ឆ្នាំ២០២៦--

មជ្ឈមណ្ឌលចែករំលែកព័ត៌មានក្នុងការប្រយុទ្ធប្រឆាំងនឹងចោរសមុទ្រ និងការប្លន់នាវាប្រដាប់អាវុធនៅអាស៊ី (ReCAAP ISC)បានបើកកិច្ចប្រជុំក្រុមប្រឹក្សាភិបាលលើកទី២០ និងកម្មវិធីអបអរសាទរខួបអនុស្សាវរីយ៍លើកទី២០របស់ខ្លួននៅប្រទេសសឹង្ហបុរីរយៈពេល៣ថ្ងៃគឺចាប់ពីថ្ងៃទី១១ ដល់ថ្ងៃទី១៣ ខែមីនា ឆ្នាំ២០២៦ ។ដោយមានការចូលរួមពីអភិបាលតំណាងប្រទេសជាសមាជិកចំនួន២១ និងភាគីពាក់ព័ន្ធដទៃទៀតប្រមាណជា២០ស្ថាប័នក្នុងវិស័យដឹកជញ្ជូនតាមផ្លូវសមុទ្រ។ហើយកម្ពុជាក៏ជាសមាជិកនៅក្នុងក្រុមប្រឹក្សារបស់ស្ថាប័នមួយនេះដែរ។ 

កិច្ចប្រជុំនេះបានរៀបចំឡើងដើម្បីពិនិត្យមើលស្ថានភាពចោរសមុទ្រ និងចោរប្លន់នាវាប្រដាប់អាវុធនៅអាស៊ីដោយវិភាគរបាយការណ៍ និងវាយតម្លៃការគំរាមកំហែងក្នុងការធ្វើបច្ចុប្បន្នភាពផែនទីបង្ហាញផ្លូវរបស់មជ្ឈមណ្ឌលចែករំលែកព័ត៌មាន ReCAAP ISC និងផែនការសកម្មភាព១០ឆ្នាំ (២០២៧-២០៣៦) ផែនការសកម្មភាព និងថវិកាប្រចាំឆ្នាំ២០២៦ ផែនការសកម្មភាពរយៈពេល៣ឆ្នាំ (២០២៦-២០២៨) និងផែនការសម្រាប់ការកសាងសមត្ថភាព ដើម្បីបន្តពង្រឹងកិច្ចសហការជាមួយប្រទេសជាសមាជិក និងភាគីពាក់ព័ន្ធ។

ឯកឧត្តម ហេង សុធី អគ្គនាយកនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ និងជាអភិបាលប្រទេសកម្ពុជាប្រចាំ ReCAAP ISC ដែលបានអញ្ជើញទៅចូលរួមក្នុងកិច្ចប្រជុំនោះដែរបានមានប្រសាសន៍ថា កម្ពុជាប្តេជ្ញាបន្តពង្រឹងកិច្ចសហការឱ្យកាន់តែប្រសើរឡើងជាមួយបណ្តាប្រទេសសមាជិក ReCAAP ISC និងភាគីពាក់ព័ន្ធដើម្បីប្រយុទ្ធប្រឆាំងនឹងចោរសមុទ្រ និងចោរប្លន់នាវាប្រដាប់អាវុធនៅអាស៊ី និងការរក្សាបានសុខសន្តិភាព ស្ថេរភាព និងសន្តិសុខក្នុងតំបន់សម្រាប់ការដឹកជញ្ជូនតាមផ្លូវសមុទ្រ៕

ដោយ  វាសនា