AKP ភ្នំពេញថ្ងៃទី១១ ខែមីនា ឆ្នាំ ២០២៦--លោក ខូវ មាស អគ្គលេខាធិការរង អាជ្ញាធរទន្លេសាប និងមន្ត្រីជំនាញនៃអាជ្ញាធរទន្លេសាប និងមន្ត្រីជំនាញនៃអាជ្ញាធរទន្លេសាប និងលោក លឹម សុខតូ អភិបាលរង ខេត្តពោធិ៍សាតនៅរសៀលថ្ងៃទី១០ ខែមីនា ឆ្នាំ២០២៦ បានអញ្ជើញចូលរួមដឹកនាំកិច្ចប្រជុំពិភាក្សាជាមួយអង្គភាពពាក់ព័ន្ធនៃរដ្ឋបាលខេត្តពោធិ៍សាត់ ស្តីពី ការរៀបចំផែនការដាំស្តារព្រៃលិចទឹកឡើងវិញនៅតំបន់ជុំវិញបឹងទន្លេសាប ក្នុងភូមិសាស្ត្រខេត្តពោធិ៍សាត់ ។

គោលបំណងនៃកិច្ចប្រជុំមានចំនួនបីគឺ ទី១ បទបង្ហាញដោយមន្រ្តីជំនាញអាជ្ញាធរទន្លេសាប អំពីផែនការដាំស្តារព្រៃលិចទឹកឡើងវិញ ក្នុងតំបន់រងការទន្ទ្រាន តំបន់ព្រៃរេចរិល តំបន់ភ្លើងឆេះព្រៃ ក្នុងភូមិសាស្រ្តខេត្តពោធិ៍សាត់ ទី២ ពិភាក្សាប្រមូលធាតុចូលពីមន្ទីរជំនាញពាក់ព័ន្ធ ដើម្បីរៀបចំផែនការដាំស្តារព្រៃលិចទឹកឡើងវិញ ព្រមទាំងធ្វើការកែលម្អផែនការអនុវត្តឱ្យសមស្របតាមស្ថានភាពជាក់ស្តែងនៅក្នុងមូលដ្ឋាន ទី៣ ការចែករំលែកព័ត៌មានទិន្នន័យពាក់ព័ន្ធ បទពិសោធន៍ និងបច្ចេកទេស នៃការដាំស្តារព្រៃលិចទឹកប្រកបដោយប្រសិទ្ធភាព។

ជាលទ្ធផលអង្គប្រជុំ បានពិភាក្សាយ៉ាងផុសផុល និងផ្តល់ធាតុចូលល្អៗ ហើយជាចុងក្រោយ អាជ្ញាធរទន្លេសាប សំណូមពរឱ្យ រដ្ឋាលឃុំ ស្រុក ដែលពាក់ព័ន្ធក្នុងតំបន់៣ នៃបឹងទន្លេសាប ធ្វើការកំណត់ទីតាំងអាទិភាពក្នុងការដាំស្តារឡើងវិញ ដើម្បីជួយសម្រួលដល់ក្រុមការងារជំនាញ របស់អាជ្ញាធរទន្លេសាប ពេលចុះអនុវត្តការងារ។ ជាទិសដៅបន្តក្រុមការងារនឹងចុះពិនិត្យ ទៅលើតំបន់អាទិភាពជាក់ស្តែង ក្នុងការដាំស្តារព្រៃលិចទឹកឡើងវិញ ដើម្បីដាក់ចូលក្នុងផែនការសកម្មភាពសម្រាប់អនុវត្តក្នុងឆ្នាំ២០២៦ និងឆ្នាំបន្តបន្ទាប់។

ក្នុងកិច្ចប្រជុំនោះមានការចូលរួមពី មន្ទីរជំនាញពាក់ព័ន្ធ មន្ទីរធនធានទឹក និងឧតុនិយម មន្ទីររៀបចំដែនដី នគរូបនីយកម្ម សំណង់ និងសុរិយោដី មន្ទីរបរិស្ថាន មន្ទីរកសិកម្ម រុក្ខាប្រមាញ់ និងនេសាទ មន្ទីរអភិវឌ្ឍន៍ជនបទ រួមទាំងអាជ្ញាធរស្រុក ឃុំពាក់ព័ន្ធតំបន់បឹងទន្លេសាប ដែលមានសមាសភាពសរុបចំនួន ៤៣រូប ៕

ដោយ៖ ណយ នឿន (ប្រភព៖អាជ្ញាធរទន្លេសាប)