AKP កំពង់ចាមថ្ងៃទី ១០មីនាឆ្នាំ ២០២៦--ឯកឧត្ដម អ៊ុន ចាន់ដា អភិបាលខេត្តកំពង់ចាម នារសៀលថ្ងៃទី ១០ ខែមីនា ឆ្នាំ ២០២៦ នេះ បាន ដឹកនាំកិច្ចប្រជុំ ស្តីពីការត្រួតពិនិត្យវឌ្ឍនភាពការងាររៀបចំព្រឹត្តិការណ៍សង្ក្រាន្តកំពង់ចាម ក្នុងឱកាសបុណ្យចូលឆ្នាំថ្មីប្រពៃណីជាតិ ខាងមុខនេះក្រោមការចូលរួមពីអស់លោកលោកស្រី ជាអភិបាលរងខេត្ត អស់លោក ជាប្រធានមន្ទីរអង្គភាពជុំវិញនិងអភិបាលក្រុងស្រុកទាំង១០។

ថ្លែងក្នុងក្នុងកិច្ចប្រជុំ ឯកឧត្តមអ៊ុន ចាន់ថា បានលើកឡើងថា ដេីម្បី ចូលរួមអបអរសាទរ បុណ្យចូលឆ្នាំថ្មីប្រពៃណីជាតិ ខាងមុខនេះនិងពិធីទទួលទេវតាឆ្នាំថ្មី កក៏ដូចជាការបង្កើតបរិយាកាសសប្បាយរីករាយដល់បងប្អូនប្រជាពលរដ្ឋ និងចូលរួមចំណែកលើកកម្ពស់វប្បធម៌ប្រពៃណីជាតិខ្មែរ រដ្ឋបាលខេត្តគ្រោងនឹងរៀបចំព្រឹត្តិការណ៍សង្ក្រាន្តកំពង់ចាម ដើម្បី បង្ក ភាព សប្បាយរីករាយ ជូន ដល់ប្រជាពលរដ្ឋ មកលេងកំសាន្ត ដោយមានការរៀបចំនូវលេងល្បែងប្រជាប្រិយ ការប្រគុំតន្ត្រីសម័យនាពេលរាត្រី និងលេងកម្សាន្ត ជាច្រើនផងដែរ។

ឯកឧត្ដម អភិបាលខេត្ត បានគូសបញ្ជាក់ថា ដោយ មាន ការ ណែនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា សម្រាប់ ពិធីបុណ្យចូលឆ្នាំ ថ្មី ប្រពៃណីជាតិ នឹងឈានចូលមកដល់ នាពេលខាងមុខឆាប់នេះ រដ្ឋបាលខេត្តនឹងរៀបចំព្រឹត្តិការណ៍សង្ក្រាន្តកំពង់ចាម រយៈពេល ៤ថ្ងៃ ចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៦ នៅសួនច្បារមុខ សាលាខេត្តកំពង់ចាម ចាប់ពីម៉ោង១៤.០០នាទីតទៅ ព្រមទាំង រៀបចំ នៅតាមបណ្តា ស្រុក និង នៅតាមទីតាំងរមណីយដ្ឋាន ទីវត្តអារាមនានាក្នុងខេត្តកំពង់ចាម ដើម្បី បង្ក ភាព សប្បាយរីករាយ ជូន ដល់ប្រជាពលរដ្ឋ មកលេងកំសាន្ត ដោយមានការរៀបចំនូវលេងល្បែងប្រជាប្រិយ ការប្រគុំតន្ត្រីសម័យនាពេលរាត្រី និងលេងកម្សាន្តពិសេសគឺព្រឹត្តិការណ៍ លៀសហាលចំនួន៥តោន។

ឯកឧត្តមអ៊ុន ចាន់ដាបានធ្វើការណែនាំដល់អាជ្ញាធរគ្រប់លំដាប់ថ្នាក់ ពិសេសអាជ្ញាធរមូលដ្ឋានគ្រប់លំដាប់ថ្នាក់ត្រូវយកចិត្តទុកដាក់ខ្ពស់ សន្តិសុខសណ្តាប់ធ្នាប់សាធារណៈនៅតាមមូលដ្ឋានរបស់ខ្លួន និងត្រូវរៀបចំឲ្យ មានព្រឹត្តិការណ៍ នៅតាមបណ្តាលស្រុកនិមួយៗ ដើម្បីបង្កើតបរិយាកាសសប្បាយរីករាយជាមួយប្រជាពលរដ្ឋរបស់ខ្លួនហើយអ្វីដែលត្រូវយកចិត្តទុកខ្ពស់និង គឺសន្តិសុខសណ្តាប់ធ្នាប់សាធារណៈនៅមូលដ្ឋានធ្វើយ៉ាងណាឲ្យពិធីបុណ្យចូលឆ្នាំថ្មីប្រពៃណីជាតិខ្មែរយើង ប្រកបដោយសប្បាយរីករាយក្រោមម្លប់សុខសន្តិភាព ក្រោមការដឹកនាំរបស់សម្តេចបវរធិបតីហ៊ុន ម៉ាណែត ជានាយករដ្ឋមន្ត្រី ប្រជាពលរដ្ឋរស់នៅប្រកបដោយសុខសន្តិភាពនិងសប្បាយរីករាយ៕

ដោយ៖ ឆា មុត