AKPបន្ទាយមានជ័យថ្ងៃទី១០ខែមីនាឆ្នាំ២០២៦---   
ក្នុងស្មារតីយកចិត្តទុកដាក់ខ្ពស់លើសុខទុក្ខ និងជីវភាពរស់នៅរបស់ប្រជាពលរដ្ឋដែលរងគ្រោះដោយសារវិវាទព្រំដែន នាព្រឹកថ្ងៃអង្គារ ទី១០ ខែមីនា ឆ្នាំ២០២៦នេះ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និង លោកជំទាវ ជា ផល្គុន រួមជាមួយ ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានអញ្ជើញជួបសំណេះសំណាល និងនាំយកអំណោយសង្គ្រោះបន្ទាន់ទៅចែកជូនគ្រួសារភៀសសឹកចំនួន ១,២៨៤គ្រួសារ នៅវត្តចាន់ស៊ី ឃុំកូប ស្រុកអូរជ្រៅ។     
ក្នុងឱកាសដ៏មានអត្ថន័យនោះ ឯកឧត្តម ជា សុមេធី បានពាំនាំនូវប្រសាសន៍សួរសុខទុក្ខយ៉ាងជ្រាលជ្រៅពីសំណាក់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ជូនដល់បងប្អូនប្រជាពលរដ្ឋទាំងអស់។ 

ឯកឧត្តមបានបញ្ជាក់យ៉ាងច្បាស់ថា «រាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតី តែងតែនៅជាប់ជាមួយបងប្អូនជានិច្ច។ យើងមិនទុកបងប្អូនចោលឱ្យនៅឯកោក្នុងមណ្ឌលសុវត្ថិភាពឡើយ។ ទោះបីស្ថានភាពព្រំដែននៅមានភាពស្មុគស្មាញ ប៉ុន្តែការគិតគូរពីសុវត្ថិភាព និងការហូបចុករបស់បងប្អូន គឺជាអាទិភាពចម្បងបំផុត»។   
ឯកឧត្តមរដ្ឋមន្ត្រី ក៏បានសង្កត់ធ្ងន់ពីការខិតខំប្រឹងប្រែងផ្នែកការទូត និងបច្ចេកទេស ដើម្បីដោះស្រាយបញ្ហាដីធ្លីដែលត្រូវបានភាគីថៃរំលោភបំពានដោយការដាក់របងលួស និងទូកុងទ័រន័រ ក៏ដូចជាការបោសសម្អាតគ្រាប់មិនទាន់ផ្ទុះ ដើម្បីឱ្យបងប្អូនអាចវិលត្រឡប់ទៅភូមិឋានវិញដោយសុវត្ថិភាពក្នុងពេលឆាប់ៗខាងមុខ។

 ជាកិច្ចស្វាគមន៍ ឯកឧត្តម អ៊ុ រាត្រី អភិបាលខេត្តបន្ទាយមានជ័យ បានជម្រាបជូនអំពីស្ថានភាពបច្ចុប្បន្នរបស់គ្រួសារភៀសសឹកទាំង ១,២៨៤គ្រួសារ ដែលកំពុងស្នាក់នៅបណ្តោះអាសន្ន។ ឯកឧត្តមអភិបាលខេត្តបានលើកឡើងថា អាជ្ញាធរខេត្តបាននិងកំពុងសហការយ៉ាងស្អិតរមួតជាមួយកងកម្លាំងប្រដាប់អាវុធ ដើម្បីការពារសន្តិសុខ និងសម្របសម្រួលជីវភាពប្រចាំថ្ងៃជូនពួកគាត់។ ឯកឧត្តមបានបញ្ជាក់ថា ការរស់នៅក្នុងមណ្ឌលសុវត្ថិភាពនេះ គឺជាវិធានការចាំបាច់ដើម្បីចៀសវាងគ្រោះថ្នាក់ពីគ្រាប់មិនទាន់ផ្ទុះ និងការរំលោភបំពានណាមួយពីភាគីម្ខាងទៀត។

ក្នុងពិធីទទួលអំណោយនេះ បងប្អូនប្រជាពលរដ្ឋភៀសសឹកបានបង្ហាញនូវអារម្មណ៍រំភើបដោយក្តុកក្តួល ជាខ្លាំង។ តំណាងពលរដ្ឋម្នាក់បានរៀបរាប់ថា«ពួកយើងពិតជាចង់ត្រឡប់ទៅផ្ទះវិញណាស់ ប៉ុន្តែដីស្រែចម្ការយើងឥឡូវជាប់បន្លាលួស និងមានគ្រាប់មីន។ ថ្ងៃនេះ ឃើញឯកឧត្តមរដ្ឋមន្ត្រី និងលោកអភិបាលខេត្តចុះមកផ្ទាល់ នាំយកស្បៀងអាហារ សម្ភារប្រើប្រាស់និងថវិកាមកជួយ ពួកយើងមានអារម្មណ៍ថាកក់ក្តៅណាស់។ យើងជឿជាក់លើរាជរដ្ឋាភិបាលថា នឹងជួយដោះស្រាយឱ្យពួកយើងបានវិលទៅរកជីវភាពដើមវិញ»។

អំណោយដែលបានចែកជូននាពេលនេះ រួមមាន៖ អង្ករ, មី, ទឹកត្រី, ទឹកស៊ីអ៊ីវ, ត្រីខ និងថវិកាមួយចំនួន និងសម្ភារប្រើប្រាស់ដែលជាការជួយសម្រាលទុក្ខលំបាកមួយគ្រា ក្នុងខណៈពេលដែលរាជរដ្ឋាភិបាលកំពុងបន្តកិច្ចការដោះស្រាយវិវាទព្រំដែនតាមផ្លូវច្បាប់ និងការទូត។    
ពិធីនេះបានបញ្ចប់ទៅក្រោមបរិយាកាសស្និទ្ធស្នាល និងពោរពេញដោយក្តីសង្ឃឹម ដែលសបញ្ជាក់ឱ្យឃើញពីសាមគ្គីភាពរវាងថ្នាក់ដឹកនាំ និងប្រជាជនក្នុងគ្រាមានអាសន្ន៕

ដោយ ៖ឈុនសារ៉ាត