AKP ភ្នំពេញ ថ្ងៃទី១០ ខែមីនា ឆ្នាំ២០២៦--ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា រួមនិងសប្បុរសជន រសៀលថ្ងៃទី០៩ ខែមីនា ឆ្នាំ២០២៦ បានអញ្ជើញសាកសួរសុខទុក្ខលោកគ្រូ អ្នកគ្រូ និងនិស្សិតដែលរងផលប៉ះពាល់ដោយសារសង្គ្រាមនាពេលកន្លងមក ដែលមិនទាន់អាចវិលត្រឡប់ទៅផ្ទះសម្បែងវិញ។ 

នាឱកាសនេះ ឯកឧត្តមបណ្ឌិតសភាចារ្យ បានប្រគល់ថវិកាឧបត្ថម្ភមួយចំនួនជូនដល់លោកគ្រូ អ្នកគ្រូ ជាការថ្លែងអំណរគុណចំពោះទឹកចិត្តតស៊ូខិតខំប្រឹងប្រែងបំពេញភារកិច្ចក្នុងការបង្រៀនសិស្ស និងលើកទឹកចិត្តឱ្យបន្តយកចិត្តទុកដាក់គាំទ្រដល់ការរៀន និងបង្រៀនឱ្យបានល្អប្រសើរបន្ថែមទៀត។

 ឯកឧត្តមបានលើកឡើងថា បន្ថែមពីលើការផ្តល់ជូននូវថវិកាគាំទ្រដែលទទួលបានពីសប្បុរសជននានា តាមរយៈមូលនិធិសប្បុរសធម៌របស់ក្រសួងអប់រំ យុវជន និងកីឡា ថ្ងៃនេះក្រសួងបាននាំយកនូវអំណោយជាសម្ភារសិក្សា សម្ភារប្រើប្រាស់ចាំបាច់ និងគ្រឿងឧបភោគបរិភោគប្រគល់ជូនផ្ទាល់ដល់និស្សិតដែលរងផលប៉ះពាល់ ព្រមទាំងបានស្វែងយល់ពីតម្រូវការ និងពិនិត្យមើលស្ថានភាពជាក់ស្តែងរបស់និស្សិត ក៏ដូចជាស្ថានភាពរបស់សាលារៀន សំដៅបន្តផ្តល់ការគាំទ្រឱ្យកាន់តែប្រសើរ។

ឯកឧត្តមបណ្ឌិតសភាចារ្យ បានក្រើនរំលឹកដល់និស្សិតទាំងអស់ សូមឱ្យបន្តយកចិត្តទុកដាក់ប្រឹងប្រែងសិក្សាក្រេបជញ្ជក់ចំណេះដឹង អភិវឌ្ឍសមត្ថភាពដើម្បីទទួលបានអនាគតភ្លឺស្វាង ហើយប្រសិនបើជួបការលំបាក និងគិតចង់បោះបង់ការសិក្សា សូមជួបពិភាក្សាជាមួយលោកគ្រូ អ្នកគ្រូជាមុនសិន ដើម្បីជួយរកដំណោះស្រាយ ដោយក្រសួងរង់ចាំគាំទ្រដល់លោកគ្រូ អ្នកគ្រូ និងសិស្ស និស្សិតជាប់ជានិច្ច ទោះក្នុងកាលៈទេសៈណាក៏
ដោយ។

ឯកឧត្តមបណ្ឌិតសភាចារ្យ ហង់ជួន ណារ៉ុន បានបញ្ជាក់ជាថ្មីនូវការបន្តគាំទ្រឱ្យអស់ពីលទ្ធភាពដល់បុគ្គលិកអប់រំ លោកគ្រូ អ្នកគ្រូ និងសិស្សនិស្សិតទាំងអស់ ដែលរងផលប៉ះពាល់ក្នុងកិច្ចសហការជាមួយភាគីពាក់ព័ន្ធ និងការចូលរួមចំណែកពីសប្បុរសជនពីគ្រប់មជ្ឈដ្ឋាន៕

ដោយ៖ ចាន់ សុភឿន (ប្រភព៖ ក្រសួងអប់រំ)