AKP ភ្នំពេញ ថ្ងៃទី១០ ខែមីនា ឆ្នាំ២០២៦--ឯកឧត្តមបណ្ឌិត សាន វឌ្ឍនា រដ្ឋលេខាធិការក្រសួងអប់រំ យុវជន និងកីឡា រួមជាមួយ ឯកឧត្តម ជា សឿន សាកលវិទ្យាធិការ នៃសាកលវិទ្យាល័យជាតិមានជ័យ បានរៀបចំវគ្គការចែករំលែកបទពិសោធន៍លើការអភិវឌ្ឍធនធានរៀន និងបង្រៀន សម្រាប់កម្រិតឧត្តមសិក្សាជូនដល់បុគ្គលិកអប់រំ នៅតាមដេប៉ាតឺម៉ង់នីមួយៗ នៃសាកលវិទ្យាល័យ ខណៈដែលក្រសួងអប់រំ យុវជន និងកីឡា បានគូសបញ្ជាក់ថា ការអភិវឌ្ឍធនធានរៀន និងបង្រៀន សម្រាប់កម្រិតឧត្តមសិក្សាជាផ្នែកមួយដ៏ចាំបាច់នៃការសម្រេចបានគុណភាពអប់រំឧត្តមសិក្សា។

កម្មវិធីនេះបានផ្តោតលើការប្រើប្រាស់បច្ចេកវិទ្យា Agentic AI ជាជំនួយដល់ការវិភាគបញ្ហា និងបង្កើតចម្លើយដែលអាចគ្រប់គ្រងបាន  ហើយក្នុងរយៈពេល៣ខែខាងមុខនេះបុគ្គលិកអប់រំនីមួយៗបានតាំងចិត្តអភិវឌ្ឍធនធានរៀន  និងបង្រៀន  សម្រាប់កម្រិតឧត្តមសិក្សាឱ្យបានជោគជ័យ។ 

ឯកឧត្តមបណ្ឌិត សាន វឌ្ឍនា មានប្រសាសន៍ថា ជាគោលការណ៍ការអភិវឌ្ឍធនធានរៀន និងបង្រៀនសម្រាប់កម្រិតឧត្តមសិក្សានេះជារួមមុខវិជ្ជានីមួយៗត្រូវមាន ៖

១.សៀវភៅសិក្សាគោលនៃមុខវិជ្ជា ២.ធន ធានអំណានបន្ថែមដើម្បីពង្រីកពុទ្ធិ ៣.បទបង្ហាញសម្រាប់ដំណើរការរៀន ៤.វីដេអូទស្សនាទាននៃ មេរៀនដើម្បីកសាងបុរេពុទ្ធិ ៥.កម្រងសំណួរតេស្តសមត្ថភាព ៦.កម្រងមគ្គុទេសក៍ដឹកនាំការស្រាវជ្រាវ និងដោះស្រាយបញ្ហា  និង  ៧.កម្រងកិច្ចតែងការបង្រៀនដោយរំលេចសកម្មភាពស្រាវជ្រាវ៕ 

ដោយ៖ ចាន់ សុភឿន ,ប្រភព៖ ក្រសួងអប់រំ