AKP បន្ទាយមានជ័យ ថ្ងៃទី១០ ខែមីនាឆ្នាំ២០២៦--ក្រោមស្មារតីមនុស្សធម៌ និងការគិតគូរខ្ពស់ចំពោះសុខទុក្ខរបស់ប្រជាពលរដ្ឋដែលជួបគ្រោះមហន្តរាយធម្មជាតិ សាខាកាកបាទក្រហមកម្ពុជាខេត្តបន្ទាយមានជ័យ បាននាំយកអំណោយសង្គ្រោះបន្ទាន់ទៅចែកជូនគ្រួសារដែលរងគ្រោះដោយខ្យល់កន្ត្រាក់ចំនួន ៩គ្រួសារ ស្ថិតក្នុងភូមិប្រាសាទត្បែង ឃុំបន្ទាយឆ្មារ ស្រុកថ្មពួក។

តំណាងឱ្យ ឯកឧត្តម អ៊ុំ រាត្រី ប្រធានគណៈកម្មាធិការសាខាខេត្ត និងដោយមានការចាត់តាំងផ្ទាល់ ក្រុមប្រតិបត្តិសាខា សហការជាមួយអនុសាខាស្រុកថ្មពួក បានចុះទៅដល់មូលដ្ឋានកាលពីថ្ងៃចន្ទ ទី០៩ ខែមីនា ឆ្នាំ២០២៦។ ក្នុងឱកាសនោះ លោកស្រី មឿត លាបភា នាយិការងសាខាខេត្ត បានពាំនាំនូវប្រសាសន៍ផ្តាំផ្ញើសួរសុខទុក្ខដោយក្តីនឹករឭកបំផុតពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ឯកឧត្តម ឌិត ទីណា ប្រធានកិត្តិយសសាខាខេត្តឯកឧត្តម អ៊ុំ រាត្រី ប្រធានគណៈកម្មាធិការសាខាខេត្ត។

លោកស្រីបានបញ្ជាក់ថា សម្តេចកិត្តិព្រឹទ្ធបណ្ឌិត ជានិច្ចកាលតែងតែតាមដាន និងគិតគូរពីសុខទុក្ខរបស់បងប្អូនប្រជាពលរដ្ឋគ្រប់ទិសទី ជាពិសេសអ្នកដែលរងគ្រោះ និងងាយរងគ្រោះបំផុត ដោយមិនទុកនរណាម្នាក់ចោលឡើយ ស្របតាមពាក្យស្លោក «ទីណាមានទុក្ខលំបាក ទីនោះមានកាកបាទក្រហមកម្ពុជា»។

សម្ភារៈ និងអំណោយមនុស្សធម៌ដើម្បីជួយសម្រាលការលំបាកចំពោះមុខ គ្រួសាររងគ្រោះទាំង ៩ ទទួលបានអំណោយក្នុងមួយគ្រួសារៗរួមមាន អង្ករ ២៥ គីឡូក្រាម, មី ១ កេស, ត្រីខ ១ យួរ, ទឹកត្រី ១ យួរ, ទឹកស៊ីអ៊ីវ ១ យួរ, មុង ១, ភួយ ១, ក្រមា ១, សារុង ១, ថវិកាឧបត្ថម្ភមួយចំនួន។

ក្រៅពីការផ្តល់ជំនួយ លោកស្រីនាយិការង ក៏បានក្រើនរំលឹកដល់បងប្អូនប្រជាពលរដ្ឋឱ្យបង្កើនការប្រុងប្រយ័ត្នចំពោះសុខភាពផ្ទាល់ខ្លួន តាមរយៈ ការរស់នៅស្អាត ប្រកាន់ខ្ជាប់អនាម័យ ហូបស្អាត ផឹកស្អាត និងរស់នៅស្អាត។

វិធានការសុខាភិបាល អនុវត្តតាមការណែនាំរបស់ក្រសួងសុខាភិបាល ដើម្បីការពារខ្លួនពីជំងឺឆ្លង និងជំងឺមិនឆ្លងផ្សេងៗ ដែលកំពុងរីករាលដាល។

ការត្រៀមលក្ខណៈ តាមដានព័ត៌មានអាកាសធាតុ ដើម្បីបង្ការគ្រោះថ្នាក់ដែលបង្កឡើងដោយខ្យល់កន្ត្រាក់ ឬគ្រោះធម្មជាតិផ្សេងៗទៀត។

សកម្មភាពនេះ បានបង្ហាញយ៉ាងច្បាស់ពីសាមគ្គីភាព និងការឆ្លើយតបយ៉ាងទាន់ពេលវេលារបស់កាកបាទក្រហមកម្ពុជា ក្នុងការជួយសង្គ្រោះប្រជាពលរដ្ឋនៅគ្រប់កាលៈទេសៈ៕

ដោយ៖ ឈុន សារ៉ាត