AKP ព្រះសីហនុ ថ្ងៃទី០៩ ខែមីនា ឆ្នាំ២០២៦-- ឯកឧត្តម ម៉ាង ស៊ីណេត អភិបាល នៃគណៈអភិ បាលខេត្ត និងជាប្រធានអនុគណៈកម្មាធិការវិនិយោគខេត្តព្រះសីហនុបានដឹកនាំកិច្ចប្រជុំអនុគណៈកម្មាធិការវិនិយោគខេត្តព្រះសីហនុ ដើម្បីពិនិត្យ និងអនុម័តលើសំណើរសុំនាំចូលដោយពន្ធគយ អាករពិសេស និងអាករតម្លៃ បន្ថែមជាបន្ទុករបស់រដ្ឋនូវគ្រឿងម៉ាស៊ីន សម្ភារៈបរិក្ខារ វត្ថុធាតុដើម និងសារធាតុគីមី របស់ក្រុមហ៊ុន ECOARBOR (CAMBODIA) CO., LTD ផលិតគ្រឿងសង្ហារឹមមានដូចជា ទូ គ្រឿងបង្គុំគ្រប់ប្រភេទ ដែលមានទីតាំងស្ថិតនៅភូមិត្រពាំងគា ឃុំជើងគោ ស្រុកព្រៃនប់ ខេត្តព្រះសីហនុ នារសៀលថ្ងៃចន្ទទី០៩ ខែមីនា ឆ្នាំ២០២៦ ។
    
ក្រុមហ៊ុន អ៊ីកូអេប័រ (ខេមបូឌា) ឯ.ក ECOARBOR (CAMBODIA) CO., LTD វិនិយោគផលិតគ្រឿង សង្ហារិម ទូ និងគ្រឿងបង្គំគ្រប់ប្រភេទ ដែលមានទុនវិនិយោគ ៤.៧៩៩.៥៣៥ដុល្លារអាមេរិក។ ក្រុមហ៊ុនធ្វើការវិនិយោគលើផ្ទៃដីទំហំ ៥៣.៨២៤ម៉ែត្រការ៉េ និងទំហំអគារ ៣៩.៩២៥ម២ (មានស្រាប់) តម្រូវការពលកម្មក្នុងស្រុក ៦៣៨នាក់ និងបរទេស ១៥នាក់។  ក្រុមហ៊ុន ECOARBOR (CAMBODIA) CO., LTD. ទទួលបានវិញ្ញាបនបត្រចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់លេខ ០០៤/២៥ អ.វ.វ.ប.ប ចុះថ្ងៃទី២ ខែឧសភា ឆ្នាំ២០២៥ របស់អនុគណៈកម្មាធិការវិនិយោគខេត្ត ដោយទទួលបានការលើកទឹកចិត្តរយៈពេល ៣ឆ្នាំ រួមមានការលើកលែងពន្ធលើប្រាក់ចំណូល ការលើកលែងប្រាក់រំដោះលើពន្ធប្រាក់ចំណូល ពន្ធអប្បរមា អាករនាំចេញ អាករពិសេស អាករលើតម្លៃបន្ថែម និងនាំចូលដោយពន្ធជាបន្ទុករបស់រដ្ឋ។ ការស្នើសុំលើកទី៣ មកអនុគណៈកម្មាធិការវិនិយោគខេត្ត ដែលបានទទួលនៅថ្ងៃទី២៥ ខែកុម្ភៈ ឆ្នាំ២០២៦ និងបានបង់ថ្លៃសេវាសាធារណៈនៅអង្គភាពច្រកចេញចូលតែមួយសាលាខេត្ត តាមច្បាប់កំណត់រួចរាល់។ 
   
តាមការស្នើសុំនាំចូលរបស់ក្រុមហ៊ុន រួមមាន៖ ១. MACHINERY & EQUIPMENTS មានចំនួន៣៦គ្រឿង, ២. RAW MATERIALS & ACCESSORIES មានចំនួន៤ចំណុច និង CHEMICAL មានចំនួន១១ ដូចក្នុងតារាង Master List (ត្រង់ចំណុច នេះ ស្នើសុំសាខាគយ និង រដ្ឋាករមានមតិយោបល់) ។  
   
បន្ទាប់ពីបានស្តាប់មតិ យោបល់ពីមន្ត្រីបច្ចេកទេស ក៏ដូចជាមន្ត្រីជំនាញរួចមក ឯកឧត្តម ម៉ាង ស៊ីណេត អភិបាលខេត្តព្រះសីហនុបានគាំទ្រឯកភាពនូវសំណើសុំការនាំចូលនូវគ្រឿងម៉ាស៊ីន សម្ភារបរិក្ខាវត្ថុធាតុដើម និងសារធាតុគីមីរបស់ក្រុមហ៊ុន ECOARBOR (CAMBODIA) CO., LTD និងបានស្នើឱ្យមន្ត្រីជំនាញពាក់ព័ន្ធជួយសម្របសម្រួល ដើម្បីធានាដល់ដំណើរការនាំចូលគ្រឿងម៉ាស៊ីន សម្ភារបរិក្ខាវត្ថុធាតុដើម និងសាធាតុគីមីស្របតាមលក្ខណបច្ចេកទេស និងស្តង់ដារគុណភាព ៕ 

ដោយ ងូ សុមុនី