AKP ព្រះសីហនុ ថ្ងៃទី ០៩ ខែមីនា ឆ្នាំ២០២៦--ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុបានអញ្ជើញដឹកនាំកិច្ចប្រ ជុំពិនិត្យរបាយការណ៍ស្តីពីសំណើរបស់ក្រុមហ៊ុន គូ ប៊ុន (ខេមបូឌា) បាយអូថេកណូឡូជី ឯ.ក ស្នើសុំពង្វៀងប្រឡាយទឹក(អូរវាលស្បូវ) ស្ថិតនៅភូមិតាអោងធំ ឃុំសាមគ្គី ស្រុកព្រៃនប់ នារសៀលថ្ងៃចន្ទទី៩ ខែមីនា ឆ្នាំ២០២៦នេះ។
 
តាមតំណាងក្រុមហ៊ុន គូ ប៊ុន (ខេមបូឌា)បាយអូថេកណូឡូជី ឯ.ក ដែលបានដាក់ពាក្យស្នើសុំពង្វៀងប្រឡាយទឹក (អូរវាលស្បូវ) ដើម្បីរៀបចំអាងប្រព្រឹត្តកម្មទឹកកខ្វក់ថ្មី ឱ្យស្របទៅនឹងស្តង់ដាររបស់ក្រសួងបរិស្ថាន និងអាជ្ញាធរខេត្តព្រះសីហនុ។ 
ដោយបានលើកឡើងពីមន្ត្រីជំនាញ និងអាជ្ញាធរស្រុកព្រៃនប់រួចមក អង្គប្រជុំបានពិនិត្យឃើញថា ក្រុមហ៊ុនមានគោលបំណងតាមការណែនាំរបស់ក្រសួងបរិស្ថាន ក៏ដូចជាអាជ្ញាធរខេត្ត ក្នុងការរៀបចំអាងប្រព្រឹត្តិកម្មទឹកកខ្វក់ឱ្យស្របតាមស្តង់ដាររបស់ក្រសួងបរិស្ថាន ព្រោះការបង្ហូទឹកនាពេលកន្លងមក  មានផលប៉ះពាល់ដល់បរិស្ថានព្រែកកំពង់ស្មាច់។
   
ក្នុងឱកាសនោះ ឯកឧត្តម ម៉ាង ស៊ីណេត អភិបាលខេត្តព្រះសីហនុ បានធ្វើការឯកភាពតាមការលើកឡើងពីមន្ត្រីជំនាញ និងអាជ្ញាធរស្រុកព្រៃនប់នូវសំណើរស្នើសុំពង្វៀងប្រឡាយទឹក អូរវាលស្បូវ ស្ថិតនៅភូមិតាអោងធំ ឃុំសាមគ្គី ស្រុកព្រៃនប់នេះ។   
   
ទន្ទឹមនឹងនោះផងដែរ ឯកឧត្តម អភិបាលខេត្ត ក៏បានធ្វើការណែនាំដល់មន្ទីរធនធានទឹក ក៏ដូចជាអាជ្ញាធរស្រុកព្រៃនប់ត្រូវតាមដាន និងសហការជាមួយក្រុមហ៊ុនក្នុងការជីកពង្វៀងប្រឡាយទឹកអូវាលស្បូវ ដើម្បីធានាថា ការជីកប្រឡាយថ្មីវាមានទំហំសមាមាត្រទៅនឹងប្រឡាយចាស់ ដើម្បីធានាថា ប្រឡាយថ្មីមានលក្ខណសម្បត្តិគ្រប់គ្រាន់ ធានាដល់លំហូទឹកនៅរដូវប្រាំង ក៏ដូចជារដូវវស្សា មិនឱ្យមានការលិចលង់ទឹកនៅរដូវវស្សាសម្រាប់ប្រជាពលរដ្ឋដែលរស់នៅអាស្រ័យផលនៅជុំវិញប្រឡាយថ្មីនោះ៕ 

ដោយ ងូ សុមុនី