AKP ភ្នំពេញ ថ្ងៃទី០៩ ខែមីនា ឆ្នាំ២០២៦-- គណៈប្រតិភូគណៈកម្មការផែនការ វិនិយោគ កសិកម្ម រុក្ខាប្រមាញ់ នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយមនៃព្រឹទ្ធសភា ព្រឹកថ្ងៃទី០៩ ខែមីនា ឆ្នាំ២០២៦ បានចុះសិក្សាស្វែងយល់ និងប្រមូលព័ត៌មានពាក់ព័ន្ធនឹងវិស័យជាសមត្ថកិច្ចរបស់ខ្លួននៅក្នុងខេត្តកំពត។

ក្នុងឱកាសនោះ ឯកឧត្តមបណ្ឌិត ម៉ុង ឫទ្ធី ប្រធានគណៈកម្មការបានជម្រាបជូនថ្នាក់ដឹកនាំខេត្តថា ការចុះសិក្សាស្វែងយល់ និងប្រមូលព័ត៌មានដែលពាក់ព័ន្ធនឹងវិស័យជាសមត្ថកិច្ចរបស់គណៈកម្មការនាពេលនេះ ដូចជា៖ ១. ការអនុវត្តគោលនយោបាយរបស់រាជរដ្ឋាភិបាល និងវឌ្ឍនភាពការងាររបស់ខេត្ត ២. ការងារ និងលទ្ធផលតាមវិស័យដែលពាក់ព័ន្ធទៅនឹងសមត្ថកិច្ចរបស់គណៈកម្មការដូចជា ផែនការ វិនិយោគ កសិកម្ម ធនធានទឹក អភិវឌ្ឍន៍ជនបទ និងបរិស្ថាន ៣. បញ្ហាប្រឈម និងសំណូមពររបស់ឃុំ សង្កាត់ ទាក់ទងនឹងវិស័យកសិកម្ម ធនធានទឹក អភិវឌ្ឍន៍ជនបទ បរិស្ថាន និងភូមិឃុំ សង្កាត់មានសុវត្ថិភាព ៤. ការផ្សព្វផ្សាយច្បាប់ និងលិខិតបទដ្ឋានគតិយុត្ត ដែលពាក់ព័ន្ធទៅនឹងការពង្រឹងវិស័យនីតិរដ្ឋនៅកម្ពុជា និង៥. ស្វែងយល់អំពីប្រតិបត្តិការវិស័យឯកជន និងបញ្ហាប្រឈមនានា។

ជាការឆ្លើយតប ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពត បានជម្រាបជូនអំពីវឌ្ឍនភាពរបស់ខេត្ត ដែលកំពុងមានការរីកចម្រើនគួរឱ្យកត់សម្គាល់ ដោយបានប្រែក្លាយខ្លួនជាប៉ូលទេសចរណ៍ដ៏សំខាន់តាមរយៈការអភិវឌ្ឍរមណីយដ្ឋាន និងឆ្នេរកម្សាន្តថ្មីៗ ព្រមទាំងពង្រឹងហេដ្ឋារចនាសម្ព័ន្ធយុទ្ធសាស្ត្រដូចជា កំពង់ផែពហុបំណង និងកំពង់ផែទេសចរណ៍អន្តរជាតិ ដែលជំរុញវិស័យដឹកជញ្ជូន និងទាក់ទាញភ្ញៀវទេសចរ។

ទន្ទឹមនឹងនេះ ខេត្តកំពតនៅតែរក្សាបាននូវតួនាទីជាមជ្ឈមណ្ឌលផលិតស៊ីម៉ងត៍ដ៏ធំបំផុតរបស់ប្រទេស និងជាមោទនភាពនៃកសិផល GI ល្បីឈ្មោះដូចជា ម្រេច និងទុរេន ដែលរួមចំណែកបង្កើនចំណូលសេដ្ឋកិច្ចគ្រួសារ។ ជារួម ខេត្តកំពតកំពុងវិវត្តន៍ប្រកបដោយតុល្យភាពពីខេត្តកសិកម្ម ទៅជាខេត្តដែលរួមបញ្ចូលគ្នារវាងឧស្សាហកម្មធុនធ្ងន់ និងសេវាកម្មទេសចរណ៍កម្រិតខ្ពស់៕

ដោយ៖ ចាន់ សុភឿន (ប្រភព៖ ព្រឹទ្ធសភា)