AKP ភ្នំពេញ ថ្ងៃទី០៩ ខែមីនា ឆ្នាំ២០២៦-- អគ្គលេខាធិការនៃអគ្គលេខាធិការដ្ឋានក្រសួងមហាផ្ទៃ បានជំរុញឱ្យមន្រ្តីទាំងអស់ចូលរួមសហការគ្នា គាំទ្រ និងអនុវត្តគោនយោបាយពាក់ព័ន្ធនឹងសមាភាពយេនឌ័រ ហើយបន្តអភិវឌ្ឍន៍សមត្ថភាព សិក្សាស្រាវជ្រាវ និងពង្រឹងជំនាញវិជ្ជាជីវៈ ដើម្បីចូលរួមឱ្យសកម្មក្នុងការអភិវឌ្ឍអង្គភាព និងក្រសួង ព្រោះការចូលរួមរបស់ស្ត្រីក្នុងតួនាទីដឹកនាំ និងការសម្រេចចិត្តនេះ គឺជាសូចនាករមួយនៃភាពរីកចម្រើន និងភាពរឹងមាំរបស់ស្ថាប័ន។

ក្នុងពិធីអបអរសាទរខួបលើកទី១១៥ ទិវាអន្តរជាតិ ០៨មីនា ក្រោមប្រធានបទ “សន្តិភាព និងសន្តិសុខ សម្រាប់ស្រ្តីនិងគ្រួសារ” នៅទីស្ដីការក្រសួង ព្រឹកថ្ងៃទី០៩ ខែមីនា ឆ្នាំ២០២៦ ឯកឧត្តម ឧត្តមសេនីយ៍ឯក ផាត សុផានិត អគ្គលេខាធិការ នៃអគ្គលេខាធិការដ្ឋានក្រសួងមហាផ្ទៃបានកោតសរសើរ និងវាយតម្លៃខ្ពស់ចំពោះក្រុមការងារយេនឌ័រនៃអគ្គលេខាធិការដ្ឋាន ដែលទទួលបានលទ្ធផលបានសម្រេចជាច្រើននាពេលកន្លងមកនេះ និងបានជំរុញឱ្យមន្រ្តីទាំងអស់ចូលរួមសហការគ្នាគាំទ្រ និងអនុវត្តគោនយោបាយពាក់ព័ន្ធនឹងសមាភាពយេនឌ័រឱ្យបានពេញលេញបន្ថែមទៀត៕

ដោយ៖ ចាន់ សុភឿន (ប្រភព៖ ក្រសួងមហាផ្ទៃ)