AKP កំពង់ធំ ថ្ងៃទី០៩ ខែមីនា ឆ្នាំ២០២៦--ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នាព្រឹកថ្ងៃទី០៩ ខែមីនា ឆ្នាំ២០២៦នេះ បានដឹកនាំសហការីទៅចូលរួមគោរពវិញ្ញាណក្ខន្ធសពវីរៈយុទ្ធជន ដែលបានពលីជីវិតក្នុងភារកិច្ចការពារបូរណភាពទឹកដីនៅតំបន់ព្រំដែនកម្ពុជា-ថៃ ដែលបានពលីជីវិតក្នុងពេលថ្មីៗកន្លងទៅនេះ នៅភូមិសាលាវិស័យ ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ ។ 

ឧត្តមសេនីយ៍ទោ សោម ស៊ុន បានគោរពវិញ្ញាណក្ខន្ធ និងបានថ្លែងនូវការសោកស្ដាយអាឡោះអាល័យជាទីបំផុត ចំពោះលោកនាយឯក ប៊ន ម៉ៅ អាយុ ២៧ ឆ្នាំ នៅអង្គភាពកងពលតូចអន្តរាគមន៍លេខ ១២៨  យោធភូមិភាគទី១ នៃបញ្ជាការដ្ឋានកងទ័ពជើងគោក ដែលបានពលីជីវិតក្នុងភារកិច្ចការពារជាតិ និងប្រជាជនកម្ពុជា និងបានបួងសួរឱ្យវិញ្ញាណក្ខន្ធរបស់លោកនាយឯក ប៊ន ម៉ៅ បានទៅកាន់សុគតិភពកុំបីឃ្លៀងឃ្លាតឡើយ។ 

ឧត្តមសេនីយ៍ទោ សោម ស៊ុន និងសហការីបានសំណេះសំណាលជាមួយក្រុមគ្រួសារសព ប្រកបដោយក្តីដឹងគុណចំពោះវីរៈភាព របស់វីរៈយុទ្ធជន ប៊ន ម៉ៅ ដែលបានលះបង់គ្រប់បែបយ៉ាង ដើម្បីការពារបូរណភាពទឹកដី ការពារជាតិ សាសនា ព្រះមហាក្សត្រ នៃព្រះរាជាណាចក្រកម្ពុជា និងបានជូនពរដល់ក្រុមគ្រួសារសព សូមបានប្រកបដោយសេចក្តីសុខ សេចក្តីចម្រើន និងទទួលបាននូវពុទ្ធពរទាំង៤ប្រការគឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយនឹងបានចូលរួមថវិកាមួយចំនួន ក្នុងពិធីបុណ្យសពនេះផងដែរ ។

ឧត្តមសេនីយ៍ សោម ស៊ុន តំណាងឱ្យនាយទាហាន នាយទាហានរង និងពលលទាហាននៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានចុះហត្ថលេខាលើសៀវភៅគ្រាំងមាស ទុកជាការចងចាំនូវគំរូវីរៈភាពដ៍អង់អាចខ្លាហានរបស់នាយឯកប៊ន ម៉ៅ និងជាកាគោរពដឹងគុណជានិច្ចតរៀងទៅ ដោយមិនអាចបំភ្លេចបានឡើយ៕

ដោយ  ស៊ុម វណ្ណា