AKP ភ្នំពេញ ថ្ងៃទី០៩ ខែមីនា ឆ្នាំ២០២៥--ការប្រកួតកីឡាជឺជីតស៊ូ ជ្រើសរើសជើងឯកថ្នាក់ជាតិ ប្រចាំឆ្នាំ២០២៥នេះបានបិទបញ្ចប់ដោយជោគជ័យ ខណៈអ្នកពាក់ព័ន្ធនានាត្រូវបានចាត់ទុកថា ជាគ្រូសារកីឡាជឺជីតស៊ូដែលបានរួមគ្នាជំរុញឱ្យព្រឹត្តិការណ៍ប្រកួតប្រកបដោយសេចក្តីថ្លៃថ្នូ និងមានក្រមសីលធម៌វិជ្ជាជីវៈ ស័ក្តិសមជាកីឡាករកម្រិតខ្ពស់។

នេះជាការគូសបញ្ជាក់របស់លោក សំអុន បូរមី អគ្គលេខាធិការ សហព័ន្ធកីឡាជឺជីតស៊ូកម្ពុជា ក្នុងឱកាសបិទការប្រកួតកីឡាជឺជីតស៊ូ ជើងឯកថ្នាក់ជាតិ ប្រចាំឆ្នាំ២០២៥ កាលពីល្ងាចថ្ងៃទី០៨ ខែមីនា ឆ្នាំ២០២៦ នៅសាលសាកលវិទ្យាល័យភូមិន្ទភ្នំពេញ ក្រោមវត្តមានឯកឧត្តម ថោង បញ្ញាធន ប្រធានសហព័ន្ធកីឡាជឺជីតស៊ូកម្ពុជា និងតំណាងក្រសួងអប់រំ យុវជន និងកីឡា ព្រមទាំងតំណាងគណៈកម្មាធិការជាតិអូឡាំពិកកម្ពុជា (NOCC)។

លោកអគ្គលេខាធិការបានបញ្ជាក់ថា ការប្រកួតកីឡាជឺជីតស៊ូ ជ្រើសរើសជើងឯកថ្នាក់ជាតិ ប្រចាំឆ្នាំ២០២៥នេះចំនួនកីឡាករ កីឡការិនីកើនឡើងដល់ ២៣០នាក់មកពី១៨ក្លឹប។កាលពីរៀបចំការប្រកួតជើងឯកថ្នាក់ជាតិ លើកទី១ ឆ្នាំ២០២២ ចំនួនក្លឹបមានត្រឹមតែ៧ មានកីឡាករ កីឡាការិនីសរុប ៦៥នាក់ប៉ុណ្ណោះ ហើយនៅឆ្នាំបន្តបន្ទាប់បន្តកើនឡើងនូវចំនួនកីឡាករ កីឡាការិនី និងក្លឹបផងដែរ។

លោកអគ្គលេខាធិការបន្ថែមថា អ្វីដែលពិសេស ការប្រកួតឆ្នាំនេះមិនត្រឹមតែចំនួនកីឡាករ កីឡការិនីកើនឡើងច្រើនប៉ុណ្ណោះទេ ប៉ុន្តែថែមទាំងរៀបចំបានល្អជាមួយនឹងគុណភាពបច្ចេកទេសក៏កាន់តែល្អប្រសើរផងដែរ ក្រោមការបន្តដឹកនាំពីប្រធានសហព័ន្ធកីឡាជឺជីតស៊ូ អាណត្តិថ្មី គឺឯកឧត្តម ថោង បញ្ញាធន ដែលជំរុញឱ្យព្រឹត្តិការណ៍ថ្នាក់ជាតិមួយនេះពង្រឹងបានគុណភាពគ្រប់គ្រងបច្ចេកទេស តាមរយៈការធ្វើទំនើបកម្មផ្នែកផ្សេងៗ។ លោកបានកោតសរសើរ និងវាយតម្លៃខ្ពស់ចំពោះកីឡាករ កីឡាការិនីទាំងអស់ចូលរួមប្រកួតអស់ពីសមត្ថភាព ប្រកបដោយសេចក្តីថ្លៃថ្នូរ និងសុច្ចរឹតភាព ស្របតាមស្មារតីកីឡា។

អគ្គលេខាធិការបានថ្លែងអំណរគុណដល់រាជរដ្ឋាភិបាល ក្រសួងអប់រំ យុវជន និងកីឡា និង NOCC ដែលបានជួយសហការសម្របសម្រួលជំរុញចលនាកីឡានៅកម្ពុជា។ ជាមួយគ្នានេះលោកវាយតម្លៃខ្ពស់ចំពោះមន្ត្រីបច្ចេកទេស ដែលបានលះបង់កម្លាំងកាយចិត្ត និងពេលវាលាដ៏មានតម្លៃក្នុងការរៀបចំព្រឹត្តិការណ៍នេះ ការចូលរួមរបស់អ្នកទាំងអស់គ្នាគឺជាដើមទុនដ៏សំខាន់ដើម្បីផលិតចេញជារូបភាពដ៏អស្ចារ្យនេះ។

បន្ថែមពីលើនេះ តំណាងសហព័ន្ធរូបនេះបានថ្លែងអំណរគុណចំពោះមហាគ្រួសារកីឡាជឺជីតស៊ូទាំងអស់ ដៃគូអភិវឌ្ឍន៍ និងអ្នកឧបត្ថម្ភ គឺជាការរួមចំណែកដ៏សំខាន់ ដែលជាខ្យល់ដង្ហើមនៃការអភិវឌ្ឍវិស័យកីឡានៅកម្ពុជា។ សមិទ្ធផលទាំងអស់នេះបានស្តែងចេញនូវស្មារតីសាមគ្គីជាតិ និងការជឿជាក់លើទិសដៅ ចក្ខុវិស័យរបស់សហព័ន្ធ ក៏ដូចជាការប្រើប្រាស់ថវិកាគាំទ្រចំទិសដៅ ដោយមានតម្លាភាព និងគណនេយ្យភាព ការចាត់ចែង និង ប្រើប្រាស់ ធនធានមនុស្សត្រូវតាមជំនាញ និងសមត្ថភាព ប្រកបដោយទំនុកចិត្ត និងសិល្បៈ យុទ្ធសាស្ត្រនៃការការដឹកនាំបែបថ្មីមួយ៕

ដោយ ហេង ណាលីន (រូបភាព៖ NOCC)