AKP ថ្ងៃទី០៩ ខែមីនា ឆ្នាំ២០២៦--ឯកឧត្តម ឧត្តមសេនីយ៍ទោ សែម រតនា អនុប្រធានទី១ គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាព ថ្ងៃទី០៨ ខែមីនា ឆ្នាំ២០២៦  បានអញ្ជើញទទួលដំណើរមាតុភូមិនិវត្តន៍របស់កងកម្លាំងចំនួន ១៤៧នាក់ នៃកងវិស្វកម្មពហុជំនាញលេខ៤៨៦ បំពេញបេសកកម្មរក្សាសន្តិភាពអង្គការសហប្រជាជាតិនៅសាធារណរដ្ឋអាហ្រ្វិកកណ្តាល និងពិធីជូនដំណើរកងកម្ទេចគ្រាប់មិនទាន់ផ្ទុះលេខ៩៨ ទី៤ ចំនួន ៦០នាក់ ដែលត្រូវទៅបំពេញបេសកកម្មរក្សាសន្តិភាពអង្គការសហប្រជាជាតិនៅសាធារណរដ្ឋអាហ្រ្វិកកណ្តាល នាអាកាសយានដ្ឋានអន្តរជាតិតេជោ។

ក្នុងឱកាសនោះ ឯកឧត្តម ឧត្តមសេនីយ៍ទោ សែម រតនា បានស្វាគមន៍យ៉ាងកក់ក្តៅចំពោះមាតុភូមិនិវត្តន៍របស់កម្លាំងទាំង ១៤៧នាក់ នៃកងវិស្វកម្មពហុជំនាញលេខ៤៨៦ ដែលបានបំពេញបេសកកម្មរក្សាសន្តិភាពអង្គការសហប្រជាជាតិនៅសាធារណរដ្ឋអាហ្រ្វិកកណ្តាលប្រកបដោយជោគជ័យ និងបានវិលត្រឡប់មកកាន់មាតុភូមិវិញនាពេលនេះ ខណៈដែលកងអនុសេនាធំកម្ទេចគ្រាប់មិនទាន់ផ្ទុះលេខ៩៨ ទី៤ ចំនួន ៦០នាក់នឹងធ្វើដំណើរទៅកាន់តំបន់បេសកកម្ម និងក្លាយជាគ្រួសារមួយរបស់អង្គការសហប្រជាជាតិ។ ឯកឧត្តមបានក្រើនរំលឹកបងប្អូនទាំងអស់ឱ្យរួបរួមសាមគ្គីឯកភាពគ្នាជាធ្លុងមួយជាមួយយុទ្ធមិត្តគ្រប់រូប និងត្រូវបង្កើនកិច្ចសហប្រតិបត្តិការឱ្យបានល្អ។

ជាមួយគ្នានោះដែរ ឯកឧត្តម ឧត្តមសេនីយ៍ទោ សែម រតនា បានថ្លែងអំណរគុណដល់គ្រប់ក្រសួង ស្ថាប័នទាំងអស់ ជាពិសេសក្រសួងសុខាភិបាល ដែលតែងតែមានវត្តមានក្នុងការជួយធ្វើតេស្តរកជម្ងឺគ្រុនចាញ់ដល់កងកម្លាំងមាតុភូមិនិវត្តន៍។ ចំពោះកងអនុសេនាធំកម្ទេចគ្រាប់មិនទាន់ផ្ទុះលេខ៩៨ ទី៤ ចំនួន ៦០នាក់ ដែលត្រូវធ្វើយុទ្ធដំណើរទៅកាន់តំបន់បេសកកម្ម ឯកឧត្តម ឧត្តមសេនីយ៍ទោ បានរំលឹកឱ្យមានការចងចាំ និងប្រតិបត្តិឱ្យបានខ្ជាប់ខ្ជួននូវប្រសាសន៍ណែនាំដ៏ខ្ពង់ខ្ពស់របស់ប្រមុខថ្នាក់ដឹកនាំដែលថា “ទៅគ្រប់ មកគ្រប់” “នៅឱ្យគេស្រឡាញ់ ចាកចេញឱ្យគេនឹករលឹក” និង “សាមគ្គីរស់ បែកបាក់សាមគ្គីស្លាប់” ជាដើម ។ហើយនៅពេលឡើងយន្តហោះបងប្អូនត្រូវម្ចាស់ការលើសម្ភារខ្លួនឯងដោយត្រួតពិនិត្យឱ្យបានគ្រប់ជ្រុងជ្រោយ មិនត្រូវនាំយកវត្ថុហាមឃាត់ឡើងលើយន្តហោះជាដាច់ខាត និងត្រូវចេះរៀបចំអង្គុយជាក្រុម ដែលត្រូវមានអ្នកចេះភាសាអង់គ្លេស ដើម្បីជួយទំនាក់ទំនងការងារ និងការបំពេញបែបបទឯកសារនៅពេលមានតម្រូវការ។ 

នៅពេលចុះយន្តហោះបងប្អូនត្រូវបែងចែកភារកិច្ចក្នុងការយកសម្ភារបុគ្គល និងសម្ភាររួមទៅរៀបចំឱ្យមានស្តង់ដារ និងអនាម័យនៅតាមកន្លែងស្នាក់នៅ និងក្នុងបន្ទាយ ដោយមានបង់លេខសំគាល់ឱ្យបានត្រឹមត្រូវ រួមគ្នាថែរក្សាឱ្យបានហ្មត់ចត់ និងចាត់ទុកទ្រព្យសម្បត្តិអង្គភាពដូចជាទ្រព្យរបស់យើងដូច្នោះដែរ៕

ដោយ៖ ចាន់ សុភឿន