AKP ភ្នំពេញ៖ ថ្ងៃទី០៨ ខែមីនា ឆ្នាំ២០២៦ – សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ បានអញ្ជើញ អុជធូប ថ្វាយគ្រឿងសក្ការៈ នៅរូបសំណាក លោកតាឌី បន្ទាប់មកបានបន្តដំណើរទស្សនា សួនតេជោសន្តិភាព ស្ថិតនៅតំបន់ទេសចរណ៍ ទំនប់៩៥ ស្ថិតនៅជើងភ្នំត្បែង ក្នុងភូមិទំនប់ សង្កាត់ប៉ាលហាល ក្រុងព្រះវិហារ និងបានគាំទ្រគំនិតច្នៃប្រឌិត អាជ្ញាធរខេត្ដព្រះវិហារ រៀបចំរមណីយដ្ឋានសួនតេជោសន្តិភាពនេះ ឱ្យក្លាយទៅជាតំបន់ទេសចរណ៍ទំនើបសម្រាប់ទាក់ទាញភ្លៀវទេសចរណ៏ ជាតិ និងអន្ដរជាតិ. នារសៀលថ្ងៃអាទិត្យ ៥រោច ខែផល្គុន ឆ្នាំម្សាញ់ សប្តស័ក ព.ស. ២៥៦៩ ត្រូវនឹង ថ្ងៃទី៨ ខែមីនា ឆ្នាំ២០២៦។

ឯកឧត្តម គីម រិទ្ធី អភិបាលខេត្តព្រះវិហារ ក៏បានគោរពជម្រាបជូនសម្តេចផងដែរថាទំនប់ ៩៥ គឺជារមណីយដ្ឋានទេសចរណ៍បែបធម្មជាតិដ៏ពេញនិយមមួយស្ថិតនៅភូមិទំនប់ ៩៥ សង្កាត់ប៉ាលហាល ក្រុងព្រះវិហារ ខេត្តព្រះវិហារ ចម្ងាយប្រហែល ៤ គីឡូម៉ែត្រពីក្រុងព្រះវិហារ ។ ទីតាំងនេះល្បីល្បាញដោយសារទេសភាពមាត់ទឹកដ៏ស្រស់ស្អាត អាចគយគន់សម្រស់ភ្នំត្បែង និងជាកន្លែងសម្រាកលំហែកាយចុងសប្តាហ៍ដ៏មានសក្តានុពល។ បច្ចុប្បន្នទំនប់ ៩៥ បាននឹងកំពុង កែច្នៃ និងអភិវឌ្ឍជា "សួនតេជោសន្តិភាព" ដើម្បីក្លាយជាតំបន់ទេសចរណ៍ថ្មីប្លែកក្នុងខេត្តព្រះវិហារ។

សម្តេចកិត្តិសង្គហបណ្ឌិត ម៉ែន សំអន ក៏បានគាំទ្រ និងគំនិតច្នៃប្រឌិតរបស់ ឯកឧត្តម គីម រិទ្ធី អភិបាលខេត្ត ព្រះវិ ហារ ដោយបានយកចិត្តទុកដាក់ក្នុងការលើកសោភណ្ឌភាពខេត្ត តាមរយៈ ការទាក់ទាញនូវទេសចរណ៍ចូលមកទស្សនាតំបន់រមណីដ្ឋានផ្សេងៗ ក៏ដូចជា តំបន់ទំនប់៩៥នេះ ដែលជាកត្តាជម្រុញ កំណើនសេដ្ឋកិច្ច កាត់បន្ថយភាពក្រីក្រ និងលើកកម្ពស់ជីវភាពរស់នៅរបស់ប្រជាពលរដ្ឋដែលបានរស់ នៅតំបន់នោះផងដែរ ៕

ដោយ៖ សួស សំរិត