AKP កំពង់ស្ពឺ ថ្ងៃទី៨ ខែមីនា ឆ្នាំ២០២៦--ឯកឧត្តម សាន់ សារ៉ន រដ្ឋលេខាធិការក្រសួងពាណិជ្ជកម្ម តំណាងឯកឧត្តមបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានអង្គការមូលនិធិអភិវឌ្ឍន៍មុស្លីមកម្ពុជា (CMDF)  បានអញ្ជើញជួបសំណេះសំណាល និងចែកកញ្ចប់អាហារស្រាយបួសខែរ៉ាម៉ាឌន ជូនបងប្អូនប្រជាពលរដ្ឋ ចំនួន២០០ គ្រួសារ នាព្រឹកថ្ងៃទី៨ ខែមីនា ឆ្នាំ២០២៦ នៅភូមិចំការដូង សង្កាត់ច្បារមន ក្រុងច្បារមន ខេត្តកំពង់ស្ពឺ ដែលជាអំណោយរបស់អង្គការសប្បុរធម៌កាតា(Qatar Charity) ផ្តល់ជូនតាមរយៈអង្គការ CMDF សម្រាប់ខែបួសរ៉ាម៉ាឌន ឆ្នាំ២០២៦។ ជាមួយគ្នាដែរ ឯកឧត្តម ក៏បានប្រគល់ផ្លែល្មើចំនួន ៣០ កេស ជូនវិហារ ស៊ូរ៉ាវឥស្លាម(ម៉ាស្ជិទនូរុកៅហ្វីក) នៅខេត្តកំពង់ស្ពឺ ដែលជាអំណោយរបស់ មជ្ឈមណ្ឌលជួយសង្គ្រោះ និងមនុស្សធម៌របស់ ព្រះចៅ សាល់ម៉ាន ពិន អាប់ឌុលអាហ្ស៊ីស ព្រះមហាក្សត្រអារ៉ាប៊ីសាអូឌីត (KSRelief) ។

ក្នុងឱកាសនោះ ឯកឧត្តម សាន់ សារ៉ន បានថ្លែងថា អង្គការសប្បុរធម៌កាតា បានផ្តល់ជំនួយកញ្ចប់អាហារស្រាយបួសជូនសហគមន៍ឥស្លាមកម្ពុជា តាមរយៈអង្គការ CMDF ក្នុងរយៈពេល២ ឆ្នាំចុងក្រោយនេះ ដោយឆ្នាំនេះមានចំនួន ១ ០០០កញ្ចប់ និងមានក្រសួងគរុភ័ណ្ឌសាសនា និងកិច្ចការឥស្លាមកាតា(AWQAF) បានផ្តល់ជូន ចំនួន ១ ៥០០ កញ្ចប់ ដើម្បីចែកជូនប្រជាពលរដ្ឋក្នុងខែបួសរ៉ាម៉ាឌនផងដែរ។ ឯកឧត្តមរដ្ឋលេខាធិការ បានលើកឡើងថា អំណោយដែលផ្តល់ជូននាពេលនេះ មិនអាចជួយសម្រាលបន្ទុកជីវភាពគ្រួសាររបស់ប្រជាពលរដ្ឋ ក្នុងរយៈពេលយូរអង្វែងនោះទេ ប៉ុន្តែ នេះជាទឹកចិត្តរបស់សប្បុរសជន នៃប្រទេសឥស្លាមនានា ក្នុងនាមឥស្លាមដូចគ្នា។ ប៉ុន្ដែ អ្វីដែលសំខាន់នោះ ប្រជាពលរដ្ឋត្រូវតែខិតខំប្រកបមុខរបរ ដើម្បីបង្កើនសេដ្ឋកិច្ចក្នុងគ្រួសារបន្ថែមទៀត។

ជាមួយគ្នានេះ ឯកឧត្តម រដ្ឋលេខាធិការបានបន្ថែមថា រាជរដ្ឋាភិបាលក្រោមការដឹកនាំដ៏ឈ្លាសវៃ របស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានខិតខំប្រឹងប្រែងដឹកនាំប្រទេស ធ្វើយ៉ាងណាដើម្បីឱ្យប្រជាពលរដ្ឋមានជីវភាពរស់នៅធូរធា សេដ្ឋកិច្ចមានការកើនឡើងបន្ថែមទៀត រក្សាបាននូវសុខសន្តិភាព ព្រមទាំងបានធ្វើឱ្យមានសុខដុមនីយកម្មជាតិសាសន៍ និងសាសនា ដោយគ្មានការរើសអើងពូជសាសន៍ និងជម្លោះសាសនាឡើយ៕

ដោយ៖ ម៉ែន ប៊ុនធីម/AKP កំពង់ស្ពឺ