AKP ភ្នំពេញ ថ្ងៃទី០៨ ខែមីនា ឆ្នាំ២០២៦ -- ទិវារត់ប្រណាំងស្ត្រី ១០គីឡូម៉ែត្រ អបអរទិវាសិទ្ធិនារីអន្តរជាតិ៨មីនាទាក់ទាញបានកីឡាករ កីឡាការិនីជាង ៤០០០នាក់ ក្នុងនោះអ្នករត់ជាស្ត្រីប្រមាណ ៦៥% ខណៈចំនួននេះបានកើនឡើង២០%បើធៀបនឹងឆ្នាំ២០២៥កន្លងទៅ ដោយព្រឹត្តិការណ៍នេះបានប្រារព្ធធ្វើឡើងនៅព្រឹកថ្ងៃទី០៨ ខែមីនា ឆ្នាំ២០២៦ នៅសួនច្បារមុខវត្តបទុមបតី រាជធានីភ្នំពេញ។

លោកជំទាវ កុយ ពិសី រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានគណៈកម្មការស្ត្រី និងកីឡាអមគណៈកម្មាធិការជាតិអូឡាំពិកកម្ពុជា (NOCC) បានគូសបញ្ជាក់ថា អ្នករត់ប្រណាំងទាំងបុរស និងស្ត្រីបានចូលរួមរត់ប្រណាំង អបអរសាទរទិវាសិទ្ធិនារីអន្តរជាតិ៨មីនា លើកទី១១៥ ឆ្នាំ២០២៦ ដែលបានបង្ហាញពីការរួបរួមសាមគ្គីគ្នា ក្នុងវិស័យកីឡា ដើម្បីសុខភាព មិត្តភាព សាមគ្គីភាព និងបរិយាបន្ន។ កាលពីយើងចូលរួមលេងកីឡាបានច្រើន នោះសុខភាពយើងល្អមាំមួន ប្រាជ្ញាស្មារតីភ្លឺថ្លា ហើយបើកាលណាសុខភាពប្រជាពលរដ្ឋបានល្អ ក៏យើងអាចប្រកបការងារបានល្អប្រសើរ ក្នុងការរួមចំណែកអភិវឌ្ឍប្រទេសជាតិផងដែរ។

លោកជំទាវ កុយ ពិសី មានប្រសាសន៍ទៀតថា បច្ចុប្បន្ន វិស័យកីឡាមានភាពផុលផុសខ្លាំងណាស់ ហើយស្ត្រីក៏បានដើរតួនាទីយ៉ាងសំខាន់ក្នុងវិស័យនានា ដូចបុរសដែរ ក៏ដូចជាវិស័យកីឡា។ លោកជំទាវបានបង្ហាញនូវមោទនភាពចំពោះការចូលរួមរបស់ស្ត្រីក្នុងវិស័យកីឡា ហើយលោកជំទាវនឹងបន្តជំរុញឱ្យមានការចូលរួមពីក្មេងស្រី ស្ត្រីចូលរួមលេងកីឡាឱ្យបានកាន់តែច្រើនបន្ថែមទៀត ដើម្បីសុខភាពខ្លួនឯង សុខដុមរម្យនាក្នុងសង្គមជាតិ។

ជាមួយគ្នានេះ លោក សែម ផល្លា នាយកចាត់ការទូទៅទិវារត់ប្រណាំងនៅកម្ពុជាបានលើកឡើងថា ទិវារត់ប្រណាំងស្ត្រី ១០គីឡូម៉ែត្រ ឆ្នាំ២០២៦ ក្នុងថ្ងៃបុណ្យសិទ្ធិនារីអន្តរជាតិ៨មីនានេះ គឺទទួលបានការចូលរួមកើនឡើង២០% បើបៀបនឹងឆ្នាំមុន។ ចំនួនសរុបឆ្នាំនេះមានអ្នករត់ជាតិ-អន្តរជាតិជាង ៤០០០នាក់ ហើយក្នុងនោះអ្នករត់ជាស្ត្រីមានរហូតដល់៦៥% ខណៈអ្នករត់ជាបុរស មាន២៥%។ 

ការរៀបចំឆ្នាំនេះទទួលបានភាពជោគជ័យជាងឆ្នាំមុនៗ ដោយសារអ្នកចូលរួមកើនឡើងច្រើនជាងឆ្នាំមុន ហើយការរៀបចំផ្លូវរត់ដំណើរការដោយរលូន មិនមានបញ្ហាអ្វីកើតឡើងនោះទេ។ កីឡាករ កីឡាការិនីទាំងអស់បានបង្ហាញក្តីរីករាយក្នុងការចូលរួមរត់ប្រណាំងនេះ។ បន្ថែមពីលើនេះ លោក សែម ផល្លា ក៏បានបង្ហាញនូវឆន្ទៈយ៉ាងមោះមុតថា នៅឆ្នាំ២០២៧ខាងមុខ គណៈកម្មការរៀបចំនឹងប្រឹងប្រែងរៀបចំឱ្យកាន់តែល្អប្រសើរ និងបំផុសស្មារតីដល់មហាជនចូលរួមរត់ប្រណាំងឱ្យបានច្រើនជាងឆ្នាំ២០២៦ ដោយលោកបានដាក់គោលដៅថានឹងអាចកើនឡើងដល់ ៥០០០នាក់ តាមរយៈការបំផុសផ្សព្វផ្សាយឱ្យកាន់តែទូលាយ ជាពិសេសបើកការចុះឈ្មោះឱ្យបានច្រើនខែ មុនព្រឹត្តិការណ៍ចូលមកដល់។

នាយកចាត់ការទូទៅរូបនេះក៏បានថ្លែងអំណរគុណយ៉ាងជ្រាលជ្រៅចំពោះកីឡាករ កីឡាការិនីទាំងអស់ ដែលតែងតែចូលរួមរត់ប្រណាំងយ៉ាងសកម្មនៅគ្រប់ព្រឹត្តិការណ៍រត់ប្រណាំងទាំងអស់ ក្រោមការរៀបចំរបស់ NOCC និងដៃគូសហការព្រមទាំងម្ចាស់ឧបត្ថម្ភគាំទ្រទាំងអស់ ដោយការចូលរួមទាំងអស់នេះពិតជាមានគុណតម្លៃធំធេងណាស់ ក្នុងការជំរុញឱ្យព្រឹត្តិការណ៍របស់យើងដំណើរការដោយរលូន និងជោគជ័យដ៏ធំធេងប្រកបដោយអត្ថន័យយ៉ាងជ្រាលជ្រៅ៕

ដោយ ហេង ណាលីន (រូបភាព៖ យឹម សុវឌ្ឍនា)