AKPកំពង់ចាម ថ្ងៃទី០៧ មីនា ឆ្នាំ២០២៦ -- អភិបាលនៃគណៈអភិបាលខេត្តកំពង់ចាម​ ឯកឧត្ដម​ អ៊ុន​ ចាន់ដា​ បានថ្លែងថា ស្ត្រីជាបុរេលក្ខខណ្ឌ និងជាធាតុផ្សំមិនអាចខ្វះបាន សម្រាប់ការអភិវឌ្ឍ សង្គមជាតិប្រកបដោយចីរភាព ស្ថិរភាព និងវិបុលភាពសង្គម ព្រោះស្ត្រីបានរួមចំណែកយ៉ាងសកម្ម​ ក្នុងកិច្ចខិតខំប្រឹងប្រែង​ ដើម្បីកសាង និងថែរក្សាសន្តិភាព ព្រមទាំងបានចូលរួមក្នុងកិច្ចអន្តរាគមន៍ជាបន្ទាន់​ ក្នុងការការពារ និងលុបបំបាត់នូវរាល់ឧបសគ្គរារាំង​ ដែលមានផលប៉ះពាល់ជាអវិជ្ជមានដល់ស្ត្រី និងគ្រួសារ។ 

ឯកឧត្តមអភិបាលខេត្តថ្លែងបែបនេះ ក្នុងឱកាស អញ្ជើញចូលរួមជាអធិបតី ក្នុងឱកាសអបអរសាទរខួប អុស្សាវរីយ៍លើកទី១១៥​ នៃទិវាអន្តរជាតិនារី ៨មីនា ក្រោមប្រធានបទ«សន្តិភាពនិងសន្តិសុខសម្រស់ស្រ្តី​ និងគ្រួសារ​»​ រួមជាគណៈអធិបតី ដោយ ឯកឧត្តម ខ្លូត ផន ប្រធានក្រុមប្រឹក្សាខេត្ត និងលោកជំទាវ ញូង ចរិយា អ៊ុនចាន់ដា នាព្រឹកថ្ងៃទី​៧​ ខែមិនា​ ឆ្នាំ​២០២៦​ នៅសាលាខេត្តកំពង់ចាម ។

ឯកឧត្ដម​ អ៊ុន​ ចាន់ដា​  បានបញ្ជាក់ថា ស្ត្រី បានដើរតួនាទីយ៉ាងសំខាន់ ដែលមានលក្ខណៈសម្បត្តិ និងគុណតម្លៃជាច្រើន រួមមាន ស្ត្រីមានភាពល្អ ដោយការយល់ដឹង ចរិយាសម្បត្តិ ចំណេះដឹង និងគុណធម៌ ។ស្ត្រីតំណាង ឱ្យជីវិត ដែលជាការលះបង់ក្នុងការងារប្រចាំថ្ងៃ នៅក្នុងគ្រួសារ និងសង្គម បង្ហាញពីភាពខ្លាំង និងការគោរពស្រឡាញ់។

ឯកឧត្តម អ៊ុន ចាន់ដា បានអំពាវនាវដល់ស្ត្រីខ្មែរគ្រប់រូប ត្រូវបង្កើនឆន្ទៈមុតស្រួច ក្នុងការវិវត្តន៍លូតលាស់ជាមួយប្រាជ្ញា និងបទពិសោធឈរលើគន្លងផ្លូវគតិបណ្ឌិតដើម្បីកសាងសង្គមមួយដែលមានបរិយាបន្ន សមធម៌ និង សុខដុមរមនា ស្របតាមចក្ខុ វិស័យនៃយុទ្ធសាស្ត្របញ្ចកោណ ដំណាក់កាលទី១ ដោយធានាបាននូវប្រសិទ្ធភាព និងភាពស៊ីជម្រៅក្នុងការអនុវត្ត​ផងដែរ​៕

 ដោយ ៖ឆាយ ម៉ុត