AKP បន្ទាយមានជ័យ ថ្ងៃទី០៧ខែមីនាឆ្នាំ២០២៦ -- ក្នុងស្មារតីយកចិត្តទុកដាក់ខ្ពស់ចំពោះសុខុមាលភាព និងជីវភាពរស់នៅរបស់ប្រជាពលរដ្ឋដែលកំពុងរងគ្រោះដោយសារជម្លោះព្រំដែន លោក ជា យុទ្ធារុណ ប្រធានមន្ទីរអភិវឌ្ឍន៍ជនបទខេត្តបន្ទាយមានជ័យ រួមជាមួយលោក ហួត វិច្ឆ័យ ប្រធានការិយាល័យថែទាំសុខភាពជនបទស្តីទី បានអញ្ជើញចុះត្រួតពិនិត្យបញ្ចប់ការកែលម្អឡើងវិញនូវបង្គន់អនាម័យចំនួន ៦២បន្ទប់ ស្ថិតក្នុងវត្តបន្សាយចារាម (វត្តកណ្តោល) ស្រុកថ្មពួក កាលពីព្រឹកថ្ងៃសៅរ៍ ទី៧ ខែមីនា ឆ្នាំ២០២៦នេះ។

គម្រោងកែលម្អបង្គន់អនាម័យនេះ គឺជាកិច្ចសហការយ៉ាងជិតស្និទ្ធរវាង ក្រសួងអភិវឌ្ឍន៍ជនបទ និង អង្គការ UNICEF ដើម្បីផ្ដល់នូវសេវាអនាម័យស្អាត និងសុវត្ថិភាពជូនដល់ប្រជាពលរដ្ឋភៀសសឹកដែលមិនទាន់អាចវិលត្រឡប់ទៅលំនៅឋានវិញបាន។ ប្រជាពលរដ្ឋទាំងនោះ កំពុងស្នាក់នៅបណ្ដោះអាសន្ន បន្ទាប់ពីបានភៀសខ្លួនចេញពីការរំលោភបំពានដែនអធិបតេយ្យភាពពីសំណាក់យោធាថៃ ដែលបានមកដាក់បន្លាលួស ទូងកុងតឺន័រ និងបំផ្លាញផ្ទះសំបែងរបស់ពួកគាត់។
 
ក្នុងឱកាសនោះ លោក ជា យុទ្ធារុណ បានបញ្ជាក់យ៉ាងច្បាស់ពីគោលជំហររបស់រាជរដ្ឋាភិបាល
"ការរៀបចំបង្គន់អនាម័យទាំង ៦២បន្ទប់នេះ គឺជាការបង្ហាញពីការគិតគូរយ៉ាងហ្មត់ចត់របស់រាជរដ្ឋាភិបាលកម្ពុជា ក៏ដូចជាអង្គការដៃគូ UNICEF ក្នុងការជួយសម្រាលទុក្ខលំបាករបស់បងប្អូនប្រជាពលរដ្ឋ។ ទោះបីស្ថិតក្នុងស្ថានភាពភៀសសឹកបណ្ដោះអាសន្ន ប៉ុន្តែបញ្ហាសុខភាព និងអនាម័យ គឺជាអាទិភាពដែលមិនអាចខ្វះបាន ដើម្បីបង្ការជំងឺដង្កាត់ផ្សេងៗ"។

 លោកប្រធានមន្ទីរក៏បានសង្កត់ធ្ងន់ផងដែរថា សកម្មភាពនេះក៏ជាផ្នែកមួយនៃការគាំទ្រស្មារតីដល់ប្រជាពលរដ្ឋដែលរងគ្រោះដោយសារទង្វើខុសច្បាប់របស់យោធាថៃ ដែលបានរំលោភលើបូរណភាពទឹកដីកម្ពុជា បង្កឱ្យមានការបាត់បង់ទ្រព្យសម្បត្តិ និងទីជម្រករបស់ពលរដ្ឋស្លូតត្រង់។ សារៈសំខាន់នៃគម្រោងសុខភាពសាធារណៈបង្គន់អនាម័យចំនួន ៦២បន្ទប់ នឹងកាត់បន្ថយការបន្ទោបង់ពាសវាលពាសកាល ដែលអាចបង្កជាជំងឺឆ្លងនៅក្នុងជម្រកបណ្ដោះអាសន្ន។ ការគាំទ្រផ្លូវចិត្តបង្ហាញឱ្យឃើញថា រដ្ឋាភិបាលមិនបោះបង់ពលរដ្ឋចោលក្នុងគ្រាមានអាសន្ន និងកំពុងខិតខំដោះស្រាយបញ្ហាព្រំដែនយ៉ាងសកម្ម។ កិច្ចសហប្រតិបត្តិការអន្តរជាតិតួនាទីរបស់អង្គការ UNICEF បានឆ្លុះបញ្ចាំងពីការទទួលស្គាល់នូវតម្រូវការចាំបាច់ផ្នែកមនុស្សធម៌សម្រាប់កុមារ និងគ្រួសារដែលងាយរងគ្រោះ។
 

ជាមួយនោះ លោកប្រធានមន្ទីរបានផ្ដាំផ្ញើឱ្យប្រជាពលរដ្ឋទាំងអស់ដែលកំពុងស្នាក់នៅបណ្ដោះអាសន្នក្នុងវត្តបន្សាយចារាម ជួយថែរក្សាអនាម័យ និងប្រើប្រាស់បង្គន់ទាំងនេះឱ្យបានត្រឹមត្រូវ ដើម្បីធានាបាននូវសុខភាពល្អ រង់ចាំរហូតដល់មានដំណោះស្រាយសមស្របដែលអាចឱ្យពួកគាត់វិលត្រឡប់ទៅកាន់លំនៅឋានវិញដោយសុវត្ថិភាព៕

ដោយ៖ឈុនសារ៉ាត