AKPបន្ទាយមានជ័យថ្ងៃទី៧ខែមីនាឆ្នាំ២០២៦ -- ក្នុងបរិយាកាសពោរពេញដោយក្តីរំភើប និងមោទនភាពជាអនេក វិទ្យាល័យអូរអំបិលក្រុងសិរីសោភ័ណបានរៀបចំពិធីដង្ហែពានរង្វាន់ «សាលារៀនគំរូ សម្តេចមហាបវរធិបតី» សម្រាប់ឆ្នាំសិក្សា ២០២៤-២០២៥ យ៉ាងអធិកអធម នាព្រឹកថ្ងៃទី០៧ ខែមីនា ឆ្នាំ២០២៦ ក្រោមវត្តមានលោក ស្រេង សុផល អភិបាលនៃគណៈអភិបាលក្រុងសិរីសោភ័ណ ខេត្តបន្ទាយមានជ័យ។

ពិធីនេះក៏មានការអញ្ជើញចូលរួមពីសំណាក់ លោកអភិបាលរងក្រុង តំណាងមន្ទីរអប់រំ យុវជន និងកីឡាខេត្ត លោកប្រធានការិយាល័យអប់រំក្រុង លោកចៅសង្កាត់អូរអំបិល គណៈកម្មការគ្រប់គ្រងសាលារៀន លោកគ្រូ-អ្នកគ្រូ សិស្សានុសិស្ស និងអាជ្ញាធរពាក់ព័ន្ធយ៉ាងច្រើនកុះករ ដែលបានបង្ហាញពីសាមគ្គីភាព និងការឱ្យតម្លៃខ្ពស់លើសមិទ្ធផលវិស័យអប់រំក្នុងមូលដ្ឋាន។

ថ្លែងក្នុងឱកាសដ៏វិសេសវិសាលនោះ លោក ស្រេង សុផល បានសម្តែងនូវការអបអរសាទរយ៉ាងក្តៅគគុកចំពោះវិទ្យាល័យអូរអំបិល ដែលបានខិតខំប្រឹងប្រែងរហូតសម្រេចបានជោគជ័យដ៏ត្រចះត្រចង់នេះ។ 

លោកអភិបាលក្រុងបានសង្កត់ធ្ងន់ថា«ពានរង្វាន់សាលារៀនគំរូ សម្តេចមហាបវរធិបតី មិនមែនជារឿងចៃដន្យឡើយ ប៉ុន្តែវាគឺជាផ្លែផ្កានៃការលះបង់ កិច្ចសហការ និងការអនុវត្តយ៉ាងខ្ជាប់ខ្ជួននូវស្តង់ដារសាលារៀនគំរូទាំង ៥ យ៉ាង ដែលរាជរដ្ឋាភិបាលអាណត្តិទី៧ បានដាក់ចេញ ដើម្បីពង្រឹងគុណភាពអប់រំ ចាប់ពីថ្នាក់មូលដ្ឋានទៅ»។

លោកបានបន្តទៀតថា ជ័យលាភីនេះគឺជាសក្ខីភាពបញ្ជាក់ពីការគ្រប់គ្រងល្អ ការបង្រៀនមានប្រសិទ្ធភាព និងការចូលរួមយ៉ាងសកម្មពីសហគមន៍ ដែលធ្វើឱ្យសាលារៀនក្លាយជាថ្នាលបណ្តុះបណ្តាលធនធានមនុស្សដ៏រឹងមាំសម្រាប់ខេត្តបន្ទាយមានជ័យ ក៏ដូចជាសម្រាប់ប្រទេសជាតិទាំងមូល។
 អ្វីដែលកាន់តែពិសេសនោះ ជ័យលាភីពានរង្វាន់សាលារៀនគំរូនេះ បានធ្លាក់មកដល់វិទ្យាល័យអូរអំបិល ចំពេលដែលគ្រឹះស្ថានសិក្សាមួយនេះកំពុងប្រារព្ធខួបលើកទី ៣០ នៃការកកើត (១៩៩៦-២០២៦)។

 រយៈពេល៣ទសវត្សរ៍មកនេះ វិទ្យាល័យអូរអំបិលបានឆ្លងកាត់ការវិវឌ្ឍជាច្រើនដំណាក់កាល ហើយពានរង្វាន់ «សម្តេចមហាបវរធិបតី» នាពេលនេះ គឺជាការចារឹកទុកក្នុងប្រវត្តិសាស្ត្រថ្មីមួយ ដែលបង្ហាញពីភាពរីកចម្រើនឥតឈប់ឈរ និងការប្តេជ្ញាចិត្តខ្ពស់ក្នុងការលើកកម្ពស់សេចក្តីថ្លៃថ្នូរនៃវិជ្ជាជីវៈគ្រូបង្រៀន និងចំណេះដឹងសិស្សានុសិស្ស។
  
ក្នុងពិធីដង្ហែពានរង្វាន់នេះ សិស្សានុសិស្ស និងលោកគ្រូអ្នកគ្រូបានបង្ហាញនូវស្នាមញញឹម និងមោទនភាព ដែលឆ្លុះបញ្ចាំងពីឆន្ទៈក្នុងការបន្តថែរក្សាតម្លៃនៃសាលារៀនគំរូនេះឱ្យបានគង់វង្ស និងកាន់តែប្រសើរឡើងថែមទៀតសម្រាប់ឆ្នាំសិក្សាបន្តបន្ទាប់។

សូមបញ្ជាក់ថា ពានរង្វាន់សាលារៀនគំរូ សម្តេចមហាបវរធិបតី គឺជាការលើកទឹកចិត្តដ៏ខ្ពង់ខ្ពស់ពីសំណាក់ប្រមុខរាជរដ្ឋាភិបាលកម្ពុជា ក្នុងគោលដៅជំរុញឱ្យសាលារៀននៅទូទាំងប្រទេស ពង្រឹងវិន័យ បរិស្ថានសិក្សា និងគុណផលនៃការសិក្សាឱ្យឆ្លើយតបទៅនឹងស្តង់ដារអប់រំកម្រិតខ្ពស់៕

ដោយ ៖ឈុនសារ៉ាត