AKP ភ្នំពេញ ថ្ងៃទី០៧ ខែមីនា ឆ្នាំ ២០២៦ — ឯកឧត្តមបណិ្ឌតសភាចារ្យ ហ៊ាន សាហ៊ីប រដ្ឋលេខាធិការ និង ជាប្រធានគណៈកម្មការបញ្ជីសារពើភណ្ឌទ្រព្យសម្បត្តិរដ្ឋ “គ.ប.ទ.” បានដឹកនាំកិច្ចប្រជុំពិភាក្សាលើការតាមដាន ត្រួតពិនិត្យ និង វាយតម្លៃ លើការគ្រប់គ្រង និង ការប្រើប្រាស់ទ្រព្យសម្បត្តិរដ្ឋ សម្រាប់ផ្ទៃក្នុងក្រសួងសេដ្ឋកិច្ច និងហិរញ្ញវត្ថុប្រចាំឆ្នាំ ២០២៥ ក្នុងគោលបំណង ១). តាមដាន និង ត្រួតពិនិត្យលើវឌ្ឍនភាព និង បញ្ហាប្រឈម នៃការគ្រប់គ្រង់ និង ការប្រើប្រាស់ទ្រព្យសម្បត្តិរដ្ឋ, ២). ដាក់ចេញវិធានការដោះស្រាយបញ្ហាប្រឈម និង ៣). ទិសដៅអនុវត្តការងារនៅឆ្នាំបន្ទាប់ ។

កិច្ចប្រជុំនេះ បានប្រព្រឹត្តទៅនៅថ្ងៃទី៦ ខែមីនា ឆ្នាំ ២០២៦ នៅសណ្ឋាគារឆ្នេរសុខា ខេត្តព្រះសីហនុ ដោយមានការអញ្ជើញចូលរួមពី ឯកឧត្តមរដ្ឋលេខាធិការ លោកជំទាវអនុរដ្ឋលេខាធិការ ឯកឧត្តមអគ្គលេខាធិការ ឯកឧត្តម លោក លោកស្រី តំណាងអង្គភាពប្រើប្រាស់ទ្រព្យសម្បត្តិរដ្ឋ នៅថ្នាក់កណ្តាល និង ថ្នាក់មូលដ្ឋានទាំង ២៥ រាជធានី ខេត្ត នៃក្រសួងសេដ្ឋកិច្ច និង ហិរញ្ញវត្ថុ, លេខាធិការដ្ឋាន គ.ប.ទ. និង មន្ត្រីជំនាញពាក់ព័ន្ធ ដោយមានអ្នកចូលរួមប្រមាណ ៣៥០ រូប ។

ជាកិច្ចចាប់ផ្តើម, ឯកឧត្តមបណ្ឌិតសភាចារ្យ បានគូសរំលេចអំពីសាវតារ និង វឌ្ឍនភាពសំខាន់ៗពាក់ព័ន្ធនឹង ការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ, ការរៀបចំ និង ការកត់ត្រាបញ្ជីសារពើភណ្ឌទ្រព្យសម្បត្តិរដ្ឋ, ការផ្ទេរការប្រើប្រាស់ទ្រព្យសម្បត្តិរដ្ឋ, ការកាន់កាប់ដីរដ្ឋ, ការចុះបញ្ជីដីរដ្ឋ និង ការធ្វើបណ្ណកម្មសិទ្ធិដីរដ្ឋ, ការដាក់ជួលទីតាំងដី និង អគាររដ្ឋ និង ការស្នាក់នៅបណ្តោះអាសន្នលើទីតាំងដីរដ្ឋ និង អគាររដ្ឋ ។ ជាមួយគ្នានេះ, ឯកឧត្តមបណ្ឌិតសភាចារ្យ បានគូសរំលេចអំពីភាពចាំបាច់លើការគ្រប់គ្រងទ្រព្យសម្បត្តិរដ្ឋ ដែលជាកិច្ចការងារអាទិភាពមួយរបស់រាជរដ្ឋាភិបាល និង ជាផែនការសកម្មភាព ក្នុងកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ព្រមទាំងបានផ្សព្វផ្សាយ «សារាចរលេខ ០២១ សហវ.សរ.អថ ចុះថ្ងៃទី ២៤ ខែ ធ្នូ ឆ្នាំ ២០២៥ ស្តីពីការអនុវត្តច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៦» ។

ឯកឧត្តមបណ្ឌិតសភាចារ្យ បានសង្កត់ធ្ងន់អំពី ការអនុវត្តយន្តការ វិធានការ និង គោលការណ៍ នៃការកាន់កាប់ ការតាមដាន និង ការប្រើប្រាស់ទ្រព្យសម្បត្តិរដ្ឋ ដោយឈរលើគោលការណ៍ច្បាប់ និង លិខិតបទដ្ឋានគតិយុត្តជាធរមាន និង ក្រោមការចង្អុលបង្ហាញ និង ការម្រេចដ៏ខ្ពង់ខ្ពស់របស់ ឯកឧត្តមអគ្គបណ្ឌិតសភាចា្យ ឧបនាយករដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ។

ឯកឧត្តមបណ្ឌិតសភាចារ្យ បានគូសរំលេចថា កិច្ចប្រជុំនាថ្ងៃនេះ ពុំមែនគ្រាន់តែជាការផ្សព្វផ្សាយ និង លើកពីវឌ្ឍនភាព លើការងារគ្រប់គ្រងទ្រព្យសម្បត្តិរដ្ឋសម្រាប់ផ្ទៃក្នុងក្រសួង ប៉ុណ្ណោះទេ, ប៉ុន្តែ ជាឱកាសសម្រាប់អង្គភាពប្រើប្រាស់ទ្រព្យសម្បត្តិរដ្ឋ ទាំងនៅថ្នាក់កណ្តាល និង នៅថ្នាក់មូលដ្ឋាន អាចលើកយកបញ្ហាជាក់ស្តែង និង កង្វល់នានា ដែលសាមីអង្គភាពតែងបានជួបប្រទះក្នុងពេលអនុវត្តការងារ ដើម្បីពិនិត្យពិភាក្សារួមគ្នា សំដៅចូលរួមដោះស្រាយបញ្ហាប្រឈមនៃការគ្រប់គ្រង់ និង ការប្រើប្រាស់ទ្រព្យសម្បត្តិរដ្ឋ ឱ្យកាន់តែមានប្រសិទ្ធភាព និង គ្រប់ជ្រុងជ្រោយ ។

ឯកឧត្តមបណ្ឌិតសភាចារ្យ បានវាយតម្លៃខ្ពស់ចំពោះគំនិតផ្ដួចផ្ដើម និង កិច្ចខិតខំប្រឹងប្រែងក្នុងការអនុវត្តការងារ របស់ក្រុមការងារលេខាធិការដ្ឋាន គ.ប.ទ. ព្រមទាំងបានថ្លែងអំណរគុណដល់គ្រប់អង្គភាពប្រើប្រាស់ក្រោមឱវាទក្រសួង ដែលបានចូលរួមយ៉ាងសកម្ម ក្នុងការអនុវត្តការងារគ្រប់គ្រងទ្រព្យសម្បត្តិរដ្ឋ សំដៅលើកកម្ពស់ប្រសិទ្ធិភាព តម្លាភាព និង អនុលោមភាពនៃការគ្រប់គ្រង ការប្រើប្រាស់ និង ការចាត់ចែងទ្រព្យសម្បត្តិរដ្ឋ សម្រាប់ផ្ទៃក្នុងក្រសួង, ជាពិសេស សំដៅបន្តកសាងភាពជាគំរូ ដល់ក្រសួង-ស្ថាប័នផ្សេងទៀត ។

ជាមួយគ្នានេះ, ឯកឧត្តមបណ្ឌិតសភាចារ្យ ប្រធានអង្គប្រជុំ បានដាក់ទិសដៅការងារបន្ត និង ផ្តល់អនុសាសន៍ ដូចខាងក្រោម៖

- គ្រប់អង្គភាពប្រើប្រាស់ នៃ កសហវ. ត្រូវរៀបចំ និង កត់ត្រាបញ្ជីសារពើភណ្ឌទ្រព្យសម្បត្តិរដ្ឋរបស់ខ្លួន ប្រកបដោយប្រសិទ្ធភាព គ្រប់ជ្រុងជ្រោយ និង គុណភាព ស្របតាមឧត្តរមានុវត្តន៍អន្តរជាតិ និង ស្វ័យប្រវត្តិកម្ម 

- បន្តពង្រឹងយន្តការការជម្រះបញ្ជីទ្រព្យសម្បត្តិរដ្ឋ ចេញពីបញ្ជីសារពើភណ្ឌទ្រព្យសម្បត្តិរដ្ឋ តាមយន្តការ និង អនុវត្តតាមលក្ខខណ្ឌ និង នីតិវិធីជាធរមាន

- សហការជិតស្និតជាមួយលេខាធិការដ្ឋាន គ.ប.ទ. និង អង្គភាពប្រើប្រាស់នៃ កសហវ. ព្រមទាំងផ្តល់ព័ត៌មាន ឱ្យបានច្បាស់លាស់ និង ជាក់លាក់ ដើម្បីចាត់វិធានការ និង លើកជាដំណោះស្រាយសមស្រប

- ចំពោះអង្គភាពប្រើប្រាស់ ដែលមានទីតាំងដីរដ្ឋ និង អគារទំនេរ ត្រូវពិនិត្យលទ្ធភាពដាក់ជួលទីតាំងនោះ ដើម្បីកៀរគរចំណូលចូលថវិកាជាតិ, រួចគោរពរាយការណ៍ជារបាយការណ៍ជូនថ្នាក់ដឹកនាំក្រសួង ពិនិត្យ និង សម្រេច តាមរយៈគណៈកម្មការបញ្ជីសារពើភណ្ឌទ្រព្យសម្បត្តិរដ្ឋ- បន្តពង្រឹង និង កសាងសមត្ថភាពជូនមន្រ្តីទទួលបន្ទុក តាមរយៈការចាត់បញ្ជូនឱ្យចូលរួមវគ្គបណ្តុះបណ្តាលពាក់ព័ន្ធនានា ព្រមទាំងរៀបចំឱ្យមានមន្រ្តីបង្គោល លើការគ្រប់គ្រងទ្រព្យសម្បត្តិរដ្ឋ ប្រចាំអង្គភាពសាមី ៕

ដោយ៖ ទូច វលក័្ខណ (ប្រភព៖ ក្រសួងសេដ្ឋកិច្ច)