AKP ភ្នំពេញ ថ្ងៃទី០៦ ខែមីនា ឆ្នាំ២០២៦--រាជរដ្ឋាភិបាលនឹងបញ្ចេញរថយន្តក្រុងចំនួន៦០០គ្រឿងដើម្បីធ្វើការដឹកជញ្ជូនប្រជាពលរដ្ឋទៅលេងស្រុកកំណើតនៅក្នុងឱកាសបុណ្យចូលឆ្នាំប្រពៃណីជាតិខ្មែរមុខនេះដោយមិនគិតថ្លៃ។ នេះបើតាមការបញ្ជាក់របស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។ ថ្លែងក្នុងពិធី“បិទសន្និបាតបូកសរុបលទ្ធផលការងារ ឆ្នាំ២០២៥ និងលើកទិសដៅកា រងារ ឆ្នាំ២០២៦ របស់អាជ្ញាធរ ជាតិប្រយុទ្ធប្រឆាំងគ្រឿងញៀន” នារសៀលថ្ងៃទី០៦ ខែមីនា ឆ្នាំ២០២៦នៅសណ្ឋាគារសុខាភ្នំពេញ សម្តេចបវរធិបតី ហ៊ុន ម៉ាណែត បានឱ្យដឹងថា តាមអភិបាលរាជធានីភ្នំពេញគ្រោងបញ្ចេញរថយន្តក្រុងចំនួន៥៨០គ្រឿង សម្រាប់ដឹកប្រជាពលរដ្ឋ ពីរាជធានី ទៅកាន់បណ្តាខេត្តនានានៅក្នុងឱកាសបុណ្យចូលឆ្នាំប្រពៃណីជាតិខ្មែរខាងមុខនេះ ប៉ុន្តែ សម្តេចស្នើឱ្យបញ្ចេញរថយន្តក្រុងចំនួន៦០០គ្រឿងតែម្តងសម្រាប់ដឹកជញ្ជួនប្រជាពលរដ្ឋទាំងទៅ ទាំងមកដោយមិនគិតថ្លៃ។ 
ជាមួយគ្នានោះដែរ សម្តេចធិបតីនាយករដ្ឋមន្ត្រី ក៏បានស្នើដល់បណ្តាក្រុមហ៊ុនឯកជននានាដែលធ្លាប់ផ្តល់ជាទឹកបរិសុទ្ធ ឬភេជ្ជៈផ្សេងៗ ដល់បងប្អូនប្រជាពលរដ្ឋពេលធ្វើដំណើរទៅស្រុកកំណើតនាបុណ្យចូលឆ្នាំខ្មែរកន្លងមក បន្តផ្តល់ជូនទៀតផងដែរ។ 
សូមជម្រាបថា កាលពីឆ្នាំ២០២៥ រដ្ឋបាលរាជធានីភ្នំពេញ បានត្រៀមរថយន្តក្រុងចំនួន ៥៩៧គ្រឿង នឹងបម្រើសេវាដឹកជញ្ជូនពលរដ្ឋរយៈពេល៦ថ្ងៃ គឺចាប់ពីថ្ងៃទី១២ ដល់១៧ ខែមេសា ឆ្នាំ២០២៥។ ក្នុងចំណោមរថយន្តក្រុងទាំចំនួន ៥៩៧គ្រឿងនេះ មាន១០០គ្រឿង បានដាក់ឱ្យប្រើប្រាស់សម្រាប់ប្រតិបត្តិការតម្រាយខ្សែរត់ក្នុងរាជធានីភ្នំពេញ។ ចំណែក ៤៩៧គ្រឿ ងទៀត បានដាក់ឱ្យបម្រើសេវាដឹកជញ្ជូនពលរដ្ឋ ចេញពីក្រុងភ្នំពេញ ទៅតាមបណ្ដា ខេត្ត និងពីបណ្តាខេត្តត្រឡប់មកភ្នំពេញវិញ។ ក្នុងរថយន្តក្រុងនីមួយៗ ក៏មានរៀបចំទឹកបរិសុទ្ធ ដោយឥតបង់ថ្លៃផងដែរ។
ជាមួយគ្នានេះ រដ្ឋបាលរាជធានីភ្នំពេញ បានអំពាវនាវឱ្យកម្មករ-និយោជិត និងពលរដ្ឋទាំងអស់ ងាកមកធ្វើដំណើរតាមរយៈរថយន្តក្រុង របស់រដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus) រាជធានីភ្នំពេញវិញ ដើម្បីកាត់បន្ថយការចំណាយ៕

ដោយ៖ ប៊ុនរិទ្ធ