AKP ភ្នំពេញ ថ្ងៃទី៦ ខែមីនា ឆ្នាំ២០២៦ -- ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន (អ.ជ.ប.គ.ញ.)បានថ្លែងបញ្ជាក់ថា ក្រសួងសុខាភិបាល ក្រសួងសង្គមកិច្ច អតីតយុទ្ធជន និងយុវនីតិសម្បទា និងស្ថាប័នពាក់ព័ន្ធ បានបន្តពង្រឹងប្រសិទ្ធភាពនៃការព្យាបាល ស្តារនីតិសម្បទា និងសមាហរណកម្មអ្នកញៀនគ្រឿងញៀន ដោយបានគ្រប់គ្រងអ្នកញៀន និងអ្នកប្រើប្រាស់ចំនួន ២៨ ២៨៧នាក់ (នៅឆ្នាំ២០២៤ មានចំនួន ២៧ ៤៧៧ នាក់)ច្រើនជាង ៨១០នាក់ កើនឡើង ២,៩៥% ខណៈអ្នកប្រើប្រាស់គ្រឿងញៀន ដែលបានបញ្ជូនទៅតុលាការមានចំនួន ១ ៤៣១ នាក់។ ការថ្លែងបញ្ជាក់របស់ឯកឧត្តម នាយឧត្តមសេនីយ៍បែបនេះក្នុងពិធីបើកសន្និបាតបូកសរុបលទ្ធផលការងាឆ្នាំ២០២៥ និងលើកទិសដៅការងារឆ្នាំ២០២៦ នាថ្ងៃទី៥ ខែមីនា ឆ្នាំ២០២៦ នៅសណ្ឋាគារសុខា ភ្នំពេញ។

ឯកឧត្តម នាយឧត្តមសេនីយ៍ មាស វិរិទ្ធ បានមានប្រសាសន៍ថា ក្នុងចំណោមអ្នកញៀន និងអ្នកប្រើប្រាស់ទាំង២៨ ២៨៧នាក់ គឺមានអ្នកបាននិងកំពុងទទួលសេវាព្យាបាលនិងស្តារនីតិសម្បទាក្នុងមជ្ឈមណ្ឌលចំនួន ៨ ៧៨៨ នាក់ អ្នកដែលបានធ្វើសមារណកម្មចូលក្នុងសហគមន៍វិញមានចំនួន ១០ ៦៤០នាក់ និងអ្នកញៀនគ្រឿងញៀនដែលបានមកទទួលសេវាព្យាបាលតាមមូលដ្ឋានសុខាភិបាលសាធារណៈមានចំនួន៧ ៤២៨ នាក់។ 

តាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀនបានឱ្យដឹងថា ក្នុងគោលដៅអនុវត្តគោលការណ៍ «សម្អាតផ្ទះយើង» និង«សម្អាតចកចេញពីផ្ទៃបឹង» មកដល់ពេលនេះមានមន្រ្តីរាជការចំនួន ១៣១ ៤៧៣ នាក់ បានធ្វើតេស្តរហ័សរកសារធាតុញៀនក្នុងទឹកមូត្រ ក្នុងនោះរកឃើញ អ្នកវិជ្ជមានចំនួន១០៤នាក់ បណ្ដេញចេញចំនួន១០៣នាក់ និងកំពុងបន្តនីតិវិធីចំនួន១នាក់។ ដោយឡែកក្នុងឆ្នាំ២០២៥នេះ មានចំនួន ១២ ៧៦៦នាក់ បានធ្វើតេស្តរហ័សរកសារធាតុញៀនក្នុងទឹកមូត្រ ក្នុងនោះរកឃើញ អ្នកវិជ្ជមានចំនួន៥នាក់ បណ្តេញចេញ ចំនួន៥នាក់។ 

ទាក់ទងនឹងកម្មវិធីទូរសព័្ទដៃ NoDrug ដែលអាជ្ញាធរជាតិប្រយុទ្ធប្រឆាំងគ្រឿងញៀនបានដាក់ឱ្យប្រើប្រាស់នៅទូទាំងប្រទេសនោះ ឯកឧត្តម នាយឧត្តមសេនីយ៍ មាស វិរិទ្ធ បានលើកឡើងថា កម្មវិធីនេះបានក្លាយជាមធ្យោបាយដ៏ល្អទាន់សម័យ និងពេញនិយមសម្រាប់មហាជនទូទៅធ្វើទំនាក់ទំនងជាមួយអាជ្ញាធរមានសមត្ថកិច្ច និងរាយការណ៍ពីបញ្ហាបទល្មើសគ្រឿងញៀនដែលកើតមាននៅតាមសហគមន៍ ដើម្បីសុំកិច្ចអន្តរាគមន៍ពីអាជ្ញាធរមានសមត្ថកិច្ចជួយ ដោះស្រាយបញ្ហាឱ្យបានទាន់ពេលវេលា។ ឯកឧត្តម នាយឧត្តមសេនីយ៍ក៏បានអះអាងថា មកទល់បច្ចុប្បន្ននេះមានអ្នកទាញយកកម្មវិធីនេះទុកប្រើប្រាស់ ប្រមាណជិត៧ម៉ឺននាក់។ ជាក់ស្តែង តាមរយៈកម្មវិធីទូរស័ព្ទដៃ NoDrug អង្គភាពជំនាញបានទទួលរបាយការណ៍ពីបញ្ហាផ្សេងៗ និងបទល្មើសគ្រឿងញៀននៅតាមមូលដ្ឋានចំនួនសរុប ២ ៩២០ករណី ក្នុងនោះបានដោះស្រាយរួចចំនួន ១ ៧២៣ករណី កំពុងដោះស្រាយចំនួន ៣៥៦ករណី ព័ត៌មានមិនត្រឹមត្រូវចំនួន ២១៦ករណី ការសាកល្បងចំនួន ៩១ករណី ព័ត៌មានផ្សេងៗចំនួន ១៨៣ករណី និងព័ត៌មានដដែលចំនួន ៣៥១ករណី៕

ដោយ៖ រិទ្ធី