AKP បន្ទាយមានជ័យ ថ្ងៃទី០៤ ខែធ្នូ ឆ្នាំ២០២៥-- អង្គការទស្សនៈពិភពលោក (World Vision International) បានរៀបចំវេទិការៀនសូត្រ និងឆ្លុះបញ្ចាំងថ្នាក់ខេត្តស្តីពី «ការអប់រំកុមារនៅបឋមសិក្សា» ក្នុងគោលបំណងសំខាន់ៗមួយចំនួន ដើម្បីចូលរួមលើកកម្ពស់គុណភាពនៃការអប់រំនៅកម្រិតបឋមសិក្សាក្នុងខេត្តបន្ទាយមានជ័យ នាថ្ងៃទី០៤ ខែធ្នូ ឆ្នាំ២០២៥ ក្រោមវត្តមានរបស់លោក ឈឿន ក្រៃយ៉ុង អភិបាលរងខេត្តបន្ទាយមានជ័យ តំណាងលោក អ៊ុ រាត្រី អភិបាលខេត្ត នៅមន្ទីរអប់រំ យុវជន និងកីឡា ខេត្តបន្ទាយមានជ័យ។

តាមសេចក្តីបញ្ជាក់របស់អង្គការទស្សនៈពិភពលោក វេទិកានេះមានគោលដៅឆ្លុះបញ្ចាំងពីវឌ្ឍនភាពនៃផែនការសកម្មភាព ដែលចេញពីវេទិការៀនសូត្រលើកទី២កន្លងមក។ ចែករំលែកបទពិសោធន៍នៃការអនុវត្តល្អៗ និងការរៀនសូត្រនានាពាក់ព័ន្ធនឹងលទ្ធផលនៃការរៀនសូត្ររបស់កុមារ។ ផ្តោតជាពិសេសលើការសិក្សារបស់កុមារបាត់បង់ឱកាសសិក្សា ឬកុមារងាយរងគ្រោះ និងកុមាររៀនយឺត។ ស្វែងរកការគាំទ្រពីអាជ្ញាធរ និងអ្នកពាក់ព័ន្ធ ក្នុងការឆ្លើយតបនឹងបញ្ហាប្រឈមចំពោះគុណភាពនៃការសិក្សារបស់កុមារទាំងនេះ។

លោកស្រី ងួន សោភ័ណ្ឌ ប្រធានតំបន់ប្រតិបត្តិប្រចាំខេត្តបន្ទាយមានជ័យ និងបាត់ដំបងនៃអង្គការទស្សនៈពិភពលោក បានគូសបញ្ជាក់ពីប្រវត្តិរបស់អង្គការដែលចាប់ផ្តើមតាំងពីឆ្នាំ១៩៧០ ដើម្បីចូលរួមចំណែកធ្វើឱ្យប្រសើរឡើងនូវសុខុមាលភាពរបស់កុមារ ដោយមិនប្រកាន់និន្នាការណាមួយឡើយ។ លោកស្រីក៏បានលើកឡើងពីយុទ្ធសាស្រ្ត៥ ឆ្នាំ២០២៣-២០២៧ ដែលអង្គការផ្តោតលើកម្មវិធីសំខាន់ៗចំនួន៣ គឺ៖ កម្មវិធីបច្ចេកទេសអប់រំ សុខភាព និងអាហារូបត្ថម្ភ កិច្ចការពារកុមារ និងការចូលរួម។

លោកស្រីបានបន្តថា តាមរយៈកម្មវិធីទាំងនេះ អង្គការមានបំណងធ្វើឱ្យប្រសើរឡើងនូវសុខុមាលភាពកុមារងាយរងគ្រោះចំនួន៥លាននាក់ នៅឆ្នាំ២០២៧ ខាងមុខនេះ នៅទូទាំង២០ រាជធានី-ខេត្ត។ សម្រាប់ខេត្តបន្ទាយមានជ័យផ្ទាល់នៅឆ្នាំ២០២៥ អង្គការបានចំណាយថវិកាជាង ២.៥លានដុល្លារ ដើម្បីអនុវត្តសកម្មភាពនានា។

ក្នុងឱកាសនោះ លោក ឈឿន ក្រៃយ៉ុង អភិបាលរងខេត្ត បានថ្លែងអំណរគុណដល់អង្គការទស្សនៈពិភពលោក បណ្តាញគាំទ្រគុណភាពអប់រំខេត្ត និងមន្ទីរអប់រំខេត្ត ចំពោះកិច្ចសហការរៀបចំវេទិកានេះ។ វេទិការៀនសូត្រ និងឆ្លុះបញ្ចាំងនេះ ពិតជាមានសារៈសំខាន់ក្នុងការ ផ្លាស់ប្តូរបទពិសោធន៍ និងស្វែងរកដំណោះស្រាយ ចំពោះបញ្ហាប្រឈមដែលរាំងស្ទះដល់ការអប់រំរបស់កុមារនៅបឋមសិក្សា។

លោកបានសន្យាក្នុងនាមរដ្ឋបាលខេត្តថា «រដ្ឋបាលខេត្តនឹងបន្តគាំទ្រ និងសហការជាមួយមន្ទីរអប់រំ និងដៃគូទាំងអស់ ដើម្បីធានាថា កុមារគ្រប់រូបនៅក្នុងខេត្ត ត្រូវទទួលបានការអប់រំក្នុងបរិយាកាសសុវត្ថិភាព មានសមធម៌ និងគុណភាព»។ លោកក៏បានផ្តល់អនុសាសន៍មួយចំនួន និងបានលើកទឹកចិត្តឱ្យរដ្ឋបាលស្រុកនានាដើរតួជាតួអង្គសំខាន់ ក្នុងការដឹកនាំ និងផ្តល់ការគាំទ្រដល់ផែនការសកម្មភាពទាំងអស់នេះ ដើម្បីសម្រេចបាននូវគោលដៅអប់រំរួមគ្នា៕

ដោយ ឈុន សារ៉ាត