AKP ភ្នំពេញ ថ្ងៃទី០៤ ខែធ្នូ ឆ្នាំ២០២៥-- រាជបណ្ឌិត្យសភាកម្ពុជារៀបចំបាឋកថាស្ដីពី «ឱកាសសិក្សានៅវិទ្យាស្ថានពូសស្គីនសហព័ន្ធរុស្ស៊ី» ដែលឧទ្ទេសនាមដោយលោក វ្លា ឌីមៀរ មីសយូកេវិច (Vladimir Misyukevich) និងលោកស្រី ហ្គុលណាស់ ម៉ាដាណូវ៉ា (Gulnaz Mardanova) និងមានអញ្ជើញថ្លែងមតិស្វាគមន៍ដោយឯកឧត្ដមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា កាលពីថ្ងៃទី០៣ ខែធ្នូ ឆ្នាំ២០២៥។

បាឋកថាស្ដីពី «ឱកាសសិក្សានៅវិទ្យាស្ថានពូសស្គីនសហព័ន្ធរុស្ស៊ី» ត្រូវបានរៀបចំឡើងក្នុងគោលបំណងណែនាំឱ្យនិស្សិតកម្ពុជាស្គាល់អំពីវិទ្យាស្ថានភាសារុស្ស៊ី ពូសស្គីននៃសហព័ន្ធរុស្ស៊ី ក្នុងគោលបំណងមានចំណេះដឹងភាសារុស្ស៊ី និងឈានទៅស្វែងរកឱកាសសិក្សានៅសហព័ន្ធរុស្ស៊ី។

ឯកឧត្ដមបណ្ឌិតសភាចារ្យ សុខ ទូច បានមានប្រសាសន៍លើកឡើងថា វិទ្យាស្ថានពូសស្គីននៃសហព័ន្ធរុស្ស៊ី ត្រូវបានបង្កើតឡើងនៅឆ្នាំ១៩៦៦ នៅក្រោយការបង្កើតរាជបណ្ឌិត្យសភាកម្ពុជាលើកដំបូង ប៉ុន្តែវិទ្យាស្ថាននេះបានបន្តដំណើរការរបស់ខ្លួនរហូតមកដល់បច្ចុប្បន្ន ដែលមានកេរ្តិ៍ឈ្មោះល្បីខាងការបណ្ដុះបណ្ដាលភាសាអន្តរជាតិលើពិភពលោក។

ឯកឧត្ដមបណ្ឌិតសភាចារ្យបានថ្លែងលើកឡើងថា ប្អូនៗនិស្សិតដែលមានបំណងសិក្សានៅប្រទេសរុស្ស៊ី ត្រូវតែរៀនភាសារុស្ស៊ីជាមុន ព្រោះនៅក្នុងប្រទេសរុស្ស៊ី រាល់ការបង្រៀននិងរៀនទាំងអស់ សុទ្ធតែធ្វើឡើងជាភាសារុស្ស៊ី។ សម្រាប់យុវជនដែលមានបំណងឬគ្មានបំណងទៅសិក្សានៅប្រទេសរុស្ស៊ីក៏ដោយ សុទ្ធតែអាចសិក្សាអំពីភាសារុស្ស៊ីបាន ព្រោះភាសានេះជាភាសាអន្តរជាតិ ដែលប្រើប្រាស់នៅក្នុងអង្គការសហប្រជាជាតិ។ ការសិក្សាភាសានៃប្រទេសឬជាតិសាសន៍នីមួយៗ ពិតជាមានសារៈសំខាន់ណាស់ នៅពេលដែលយើងសិក្សាស្រាវជ្រាវ ឬសរសេរសារណា/និក្ខេបបទអំពីប្រទេសឬតំបន់ដែលប្រើប្រាស់ភាសានោះ ឱ្យបានស៊ីជម្រៅ និងជាក់លាក់ច្បាស់លាស់។

 ឯកឧត្ដមបណ្ឌិតសភាចារ្យបានបន្តថា បាឋកថាដ៏មានសារៈសំខាន់នេះមានការនិមន្តចូលរួមពីសំណាក់ព្រះសង្ឃ មន្ត្រីរាជការ អ្នកសិក្សាស្រាវជ្រាវ និងនិស្សិតសរុបចំនួន ១៣៤ អង្គ នាក់ ដែលបានចូលរួមស្វែងយល់ និងចោទសួរយ៉ាងផុសផុល៕

ដោយ ណយ នឿន (ប្រភព៖ រាជបណ្ឌិត្យសភាកម្ពុជា)