AKP ភ្នំពេញ ថ្ងៃទី០៤ ខែធ្នូ ឆ្នាំ២០២៥--ក្នុងគោលបំណងធានាឱ្យបាននូវការអភិវឌ្ឍឥតឈប់ឈរនូវវិស័យពាណិជ្ជកម្ម និងការកសាងភាពធន់ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានចែករំលែកនូវទស្សនៈផ្ទាល់ខ្លួនមួយចំនួន រួមទាំងទស្សនៈ និងអនុសាសន៍ដ៏ខ្ពង់ខ្ពស់បំផុតរបស់ សម្តេចធិបតីនាយករដ្ឋមន្ត្រី ចំនួន៨ចំណុច ដើម្បីក្រសួង ពាណិជ្ជកម្ម ក្រសួង-ស្ថាប័ន វិស័យឯកជន និងគ្រប់តួអង្គពាក់ព័ន្ធ ចូលរួមអនុវត្ត។

ការចែករំលែករបស់ ឯកឧត្តម ស៊ុន ចាន់ថុល នេះ ធ្វើឡើង ក្នុងកម្មវិធីសម្ពោធ“ពិព័រណ៍ពាណិជ្ជកម្មកម្ពុជា” លើកទី១៨ ឆ្នាំ២០២៥ នាថ្ងៃទី៤ ខែធ្នូ ឆ្នាំ២០២៥នេះ នៅមជ្ឈមណ្ឌល ភីអេច ហ្គ្រេនហល បុរីប៉េងហួត បឹងស្មោ រាជធានីភ្នំពេញ ដោយទី១-បន្តអនុវត្តអភិក្រម “ពង្រឹងទីផ្សារចាស់ ពង្រីកទីផ្សារថ្មី”, ពង្រឹងទីផ្សារ ចាស់ សំដៅថែទាំអតិថិជនដែលមានស្រាប់ ព្រោះជាអ្នកផ្សព្វផ្សាយដ៏ល្អបំផុត។ បើទីផ្សារចាស់ ម៉ូយចាស់ សម្រេចដើរចេញហើយ នោះនឹងពិបាកទៅរកម៉ូយថ្មីដូចគ្នា ព្រោះគាត់នឹងទៅប្រាប់អ្នករកស៊ី និងអ្នកវិនិយោគដូចគ្នាតៗគ្នា អំពីបទ ពិសោធន៍អាជីវកម្ម។ ដូចនេះ ចំណុចគន្លឹះ គឺត្រូវរក្សា ក៏ដូចជាពង្រឹងទីផ្សារ និង ម៉ូយចាស់ៗ។ ចំណែកឯអភិក្រមពង្រីកទីផ្សារថ្មីវិញ សំដៅបន្តធ្វើសមាហរណកម្ម ស៊ីជម្រៅទៅក្នុងសេដ្ឋកិច្ចតំបន់ និងសកល ហើយបន្តស្វែងរកទីផ្សារថ្មីៗ ធានាយ៉ាងណាឱ្យផលិតផលកម្ពុជា មានទីផ្សារសមស្រប ទាំងក្នុងស្រុក និងអន្តរជាតិ។
ទី២-ទាញយកប្រយោជន៍ជាអតិបរមា ពីកិច្ចព្រមព្រៀងពាណិជ្ជកម្មសេរី នានាដែលកម្ពុជាសម្រេចបាន និងកិច្ចព្រមព្រៀងពាណិជ្ជកម្មបដិការសម្រាប់ការនាំចេញទៅកាន់ទីផ្សារសហរដ្ឋអាម៉េរិក។

ទី៣-ស្នើវិស័យឯកជន និងដៃគូអភិវឌ្ឍន៍ ពិចារណាចូលរួមសហការជាមួយ ក្រុមការងារជំរុញការនាំចេញ និងអង្គភាពពាក់ព័ន្ធ នៃក្រសួងពាណិជ្ជកម្ម ក្នុងការ បន្តរៀបចំបេសកកម្មពាណិជ្ជកម្ម, ព្រឹត្តិការណ៍ពិព័រណ៍ក្នុង និងក្រៅប្រទេស, កម្មវិធីផ្គូផ្គងធុរកិច្ច, វេទិកាធុរកិច្ច,កម្មវិធី Roadshow នៅតាមប្រទេសគោលដៅ និងប្រទេសនៅសហភាពអឺរ៉ុប ដើម្បីបង្កើនលទ្ធភាព និងបើកច្រកទីផ្សារថ្មីៗបន្ថែម ទៀតសម្រាប់ការនាំចេញផលិតផលកម្ពុជា។
ទី៤-ជំរុញការទាក់ទាញវិនិយោគផ្ទាល់ពីបរទេសបន្ថែមទៀត លើឧស្សាហកម្ម ប្រតិគមន៍ (Backward Linkage) ដែលនឹងជួយទ្រទ្រង់នូវឧស្សាហកម្ម សក្តានុពលនាពេលបច្ចុប្បន្ន ឱ្យមានភាពធន់ នៅពេលកម្ពុជាចាកចេញពីចំណាត់ ក្រុមប្រទេសអភិវឌ្ឍន៍តិចតួច (LDC) នៅឆ្នាំ២០២៩ ខាងមុខនេះ។
ទី៥-ក្រសួងពាណិជ្ជកម្ម និងក្រសួង-ស្ថាប័នពាក់ព័ន្ធ គួរពិចារណារៀបចំ ព្រឹត្តិការណ៍ពិព័រណ៍បែបនេះបន្ថែមទៀត ដើម្បីផ្សព្វផ្សាយឱ្យបានកាន់តែទូលំទូលាយ និងគាំទ្រផលិតផលក្នុងស្រុក ដែលនឹងជួយបង្កើនចំណូល ឱកាសការងារ និងឈានទៅការពង្រីកមូលដ្ឋានផលិតកម្មរបស់វិស័យឯកជនកម្ពុជា។

ទី៦-លើកទឹកចិត្តឱ្យវិស័យឯកជនជំរុញការផលិត ដោយគិតគូរអំពីគុណភាព សុវត្ថិភាព និងសោភ័ណភាពនៃការវេចខ្ចប់តាមស្តង់ដា ដើម្បីទទួលបានការគាំទ្រ នៅលើទីផ្សារក្នុងស្រុក និងជាជំហានៗ ឈានទៅរកការនាំចេញ និងម៉្យាងទៀត សូមពិចារណាពង្រីកមូលដ្ឋានផលិតកម្មឱ្យបានសមស្រប ដើម្បីឆ្លើយតបទៅនឹង តម្រូវការទីផ្សារបច្ចុប្បន្ន។
ទី៧-ក្នុងបរិការណ៍ដែលកំពុងមានការគាំទ្រផលិតក្នុងស្រុក ឯកឧត្តម ឧបនាយករដ្ឋមន្ត្រី បានអំពាវនាវ ដល់បងប្អូនអាជីវករ ក្រុមហ៊ុន សហគ្រាស សូមប្រកាន់ខ្ជាប់នូវភាពស្មោះត្រង់ក្នុង ការប្រកបអាជីវកម្ម ផ្តល់សេវាកម្ម លក់ដូរ និងគោលការណ៍សុចរិតភាព និង សច្ចភាពចៀសវាងជាកំហិត និងលុបបំបាត់ឱ្យខានតែបាននូវការក្លែងបន្លំគុណភាព និងប្រភព ដើម្បីរក្សាបានកេរ្តិ៍ឈ្មោះ ពាណិជ្ជនាម និងការគាំទ្រពីអ្នកប្រើប្រាស់។
ទី៨-បន្តជំរុញបញ្ចប់ការរៀបចំយុទ្ធសាស្ត្រពាណិជ្ជកម្ម សម្រាប់ការចាកចេញ ដោយរលូនពីចំណាត់ក្រុមប្រទេសអភិវឌ្ឍន៍តិចតួច សំដៅធានាបាននូវផលប៉ះពាល់ ជាអប្បរមា រក្សាបានភាពធន់ និងការអភិវឌ្ឍប្រកបដោយចីរភាព បន្ទាប់ពីការចាកចេញរបស់កម្ពុជានៅឆ្នាំ២០២៩ និងសម្រេចឱ្យបាននូវចក្ខុវិស័យក្លាយជាប្រទេស មានចំណូលមធ្យមកម្រិតខ្ពស់នៅឆ្នាំ២០៣០ និងចំណូលខ្ពស់នៅឆ្នាំ២០៥០៕
ដោយ៖ គង់ សិរីរ័ត្ន, រូបថត៖ សួស សាវី