AKP កោះកុង ថ្ងៃទី២២ ខែវិច្ឆិកា ឆ្នាំ២០២៥--
 ក្រសួងមហាផ្ទៃ អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន និងរដ្ឋបាលខេត្តកោះកុង សហការរៀបចំពិធីផ្សព្វផ្សាយពីគោលនយោបាយ យន្តការ និងផែនការប្រយុទ្ធប្រឆាំងគ្រឿងញៀនដល់មន្រ្តីរាជការស៊ីវិល កងកម្លាំងនគរបាលក្របខ័ណ្ឌក្រសួងមហាផ្ទៃ  អាជ្ញាធរក្រុង ស្រុក ឃុំ សង្កាត់ សរុប ១៦៤នាក់ ក្នុងនោះ ស្រី ១៨ នាក់ នាថ្ងៃទី២១ ខែវិច្ឆិកា ឆ្នាំ២០២៥ នៅសាលមហោស្រពខេត្តកោះកុង ។ ពិធីផ្សព្វផ្សាយនេះ ប្រព្រឹត្តទៅដោយមានការអញ្ជើញចូលរួមពីឯកឧត្តម ឧត្តមសេនីយ៍ឯក នាក់ យុទ្ធា ប្រធានលេខាធិការដ្ឋានគណៈកម្មាធិការសម្របសម្រួល ជំរុញ អនុវត្តន៍ និងត្រួតពិនិត្យការងារប្រយុទ្ធប្រឆាំងគ្រឿងញៀន ក្រសួងមហាផ្ទៃ  ឯកឧត្តម ឧត្តមសេនីយ៍ឯក ថោង សុគន្ធា អគ្គលេខាធិការរង នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន និងឯកឧត្តម ហាក់ ឡេង អភិបាលរង និងជាប្រធានលេខាធិការដ្ឋានគណៈកម្មាធិការត្រួតពិនិត្យគ្រឿងញៀនខេត្តកោះកុង រួមទាំងមានការចូលរួមពីតំណាងសាលាដំបូង ព្រះរាជអាជ្ញាខេត្ត កងកម្លាំងប្រដាប់អាវុធទាំងបី មន្ទីរអង្គភាពជុំវិញខេត្ត។ 

ឯកឧត្តម ហាក់ ឡេង បានថ្លែងអំណរគុណដល់អាជ្ញាធរជាតិប្រយុទ្ធប្រឆាំងគ្រឿងញៀននិងគណៈកម្មាធិការសម្របសម្រួល ជំរុញ អនុវត្តន៍ និងត្រួតពិនិត្យការងារប្រយុទ្ធប្រឆាំងគ្រឿងញៀននៃក្រសួងមហាផ្ទៃ និងបានលើកឡើងពីបទល្មើសគ្រឿងញៀនដែលបន្តកើតមានទាំងការលួចលាក់កែច្នៃ វេចខ្ចប់ ជួញដូរ និងប្រើប្រាស់ភាគច្រើនជាប្រភេទ ICE (ទឹកកក) ដែលជាសញ្ញាគ្រោះថ្នាក់ធ្ងន់ធ្ងរ។ 
ក្នុងឱកាសនោះ ឯកឧត្តម ឧត្តមសេនីយ៍ឯក នាក់ យុទ្ធា ប្រធានលេខាធិការដ្ឋាន បានលើកឡើងពីនិន្នាការគ្រឿងញៀនបន្តកើនឡើង ទាំងការជួញដូរ និងការប្រើប្រាស់។ ឯកឧត្តម ឧត្តមសេនីយ៍ឯកបានបញ្ជាក់ថា ជាការឆ្លើយតបរាជរដ្ឋាភិបាលបានបង្កើតច្បាប់ និងលិខិតបទដ្ឋាននានាដើម្បីទប់ស្កាត់ និងកាត់បន្ថយការរីករាលដាលគ្រឿងញៀននៅកម្ពុជា «សម្អាតចកចេញពីផ្ទៃបឹង» ពង្រឹងការប្រយុទ្ធប្រឆាំងគ្រឿងញៀននៅតាមក្រសួង ស្ថាប័ន និងរដ្ឋបាលថ្នាក់ក្រោមជាតិដើម្បីធានាសុវត្ថិភាព និងធនធានមនុស្ស។ 

ជាមួយគ្នានេះដែរ ឯកឧត្តម ឧត្តមសេនីយ៍ឯក ថោង សុគន្ធា បានបញ្ជាក់ពីកិច្ចសហការអនុវត្តន៍ការងារប្រយុទ្ធប្រឆាំងគ្រឿងញៀនតាមផែនការសកម្មភាពដែលដាក់ចេញដោយអាជ្ញាធរជាតិប្រយុទ្ធប្រឆាំងគ្រឿងញៀន និងរាជរដ្ឋាភិបាល ព្រមទាំងបានលើកពីយុទ្ធសាស្រ្តនិងវិធានការឆ្លើយតបនានា ក្នុងនោះ ការងារផ្សព្វផ្សាយ អប់រំឱ្យមានការយល់ដឹងច្បាស់ និងការចូលរួមឱ្យកាន់តែសកម្មពីប្រជាពលរដ្ឋគឺជាការងារអាទិភាព និងបានចែករំលែក ពីយុទ្ធសាស្ត្រ និងយន្តការប្រយុទ្ធប្រឆាំងគ្រឿងញៀន ចំណេះដឹងជាមូលដ្ឋានអំពីគ្រឿងញៀន ច្បាប់ស្តីពីការត្រួតពិនិត្យគ្រឿងញៀន ការទាញនិងប្រើប្រាស់កម្មវិធីទូរសព្ទដៃ NoDrug ដើម្បីជាចំណេះដឹង ព័ត៌មាន កម្សាន្ត អប់រំ ព្យាបាល ជាពិសេសការរាយការណ៍រាល់គ្រប់ករណីបទលើ្មសគ្រឿងញៀនជូនដល់អាជ្ញាធរមានសមត្ថកិច្ច៕

ដោយ៖ រិទ្ធី ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន