AKP ភ្នំពេញ ថ្ងៃទី១០ ខែវិច្ឆិកា ឆ្នាំ២០២៥--ឯកឧត្តម កែវ រស់ អគ្គលេខាធិការ សហព័ន្ធកីឡាវាយសីកម្ពុជា បានលើកឡើងថា កម្មវិធីប្រកួតកីឡាវាយសី SHUTTLE TIME JUNIOR MINI TOURNAMENT ដែលបង្កើតឡើងដោយសហព័ន្ធកីឡាវាយសីកម្ពុជា ក្រោមគម្រោងថវិកាគាំទ្រពីសហព័ន្ធកីឡាវាយសីអាស៊ី (BA) មានគោលបំណងបំផុសឱ្យកុមារាកុមារីកាន់តែចូលចិត្ត និងស្រឡាញ់កីឡាវាយសី

ឯកឧត្តមអគ្គលេខាធិការបានពន្យល់ថា កម្មវិធី SHUTTLE TIME JUNIOR MINI TOURNAMENTនេះ ដើមឡើយមិនផ្តោតសំខាន់លើការប្រកួតនោះទេ ពោលសហព័ន្ធបង្កើតឡើង ដើម្បីបណ្តុះនិស្ស័យឱ្យកុមារាកុមារីចូលចិត្តកីឡាវាយសី។ ប៉ុន្តែការបង្កើតឡើងនៅក្នុងឆ្នាំ២០២៥ កម្មវិធីមួយនេះបានបង្កើតកាន់តែធំក្រៅពីផ្តល់នូវចំណេះដឹងដល់ក្មេងៗ ក៏មានការប្រកួតប្រជែងនៅលើទីលាន ដោយបានបែងចែកជា២ប្រភេទអាយុ គឺកុមារាកុមារីអាយុក្រោម១១ឆ្នាំ និងក្រោម១៣ឆ្នាំ។ ការប្រកួតប្រជែងនេះទៀត សហព័ន្ធក៏ផ្តល់នៅប្រាក់រង្វាន់ដល់ម្ចាស់ជ័យលាភីពីចំណាត់លេខ១ដល់៣ទាំង៤វិញ្ញាសាដោយមានមេដាយ និងថវិកាមួយចំនួនជាអនុស្សាវរីយ៍ដើម្បីលើកទឹកចិត្តចំពោះការខិតខំប្រឹងប្រែង។

ឯកឧត្តម កែវ រស់ បានគូសបញ្ជាក់ទៀតថា តាមរយៈការប្រកួតប្រជែងក្នុងកម្មវិធី SHUTTLE TIME JUNIOR MINI TOURNAMENTនេះ ម្ចាស់ជ័យលាភីចាប់ពីចំណាត់ថ្នាក់លេខ១ដល់លេខ៣ទាំង៤វិញ្ញាសា សហព័ន្ធនឹងសម្លឹងមើលអ្នកដែលមានទេពកោសល្យ និងមានឧបនិស្ស័យចូលចិត្តស្រឡាញ់កីឡាវាយសីខ្លាំងមកប្រកួតនៅចុងឆ្នាំមួយទៀត ដើម្បីចម្រាញ់យកកីឡាករកីឡាការិនីល្អៗមកហ្វឹកហាត់ជាជម្រើសក្រុមថ្នាលបំពាក់បំប៉នជំនាញកីឡាវាយសីដោយគ្រូរបស់សហព័ន្ធសម្រួចឆ្ពោះទៅត្រៀមកីឡាយុវជនអាស៊ីដែលកម្ពុជាទទួលធ្វើជាម្ចាស់ផ្ទះក្នុងឆ្នាំ២០៣១។ 

ជាមួយគ្នានោះ ឯកឧត្តម កុសល សុវណ្ណវិសាល អនុប្រធានសហព័ន្ធកីឡាវាសីកម្ពុជាបានអបអរសាទរចំពោះម្ចាស់ជ័យលាភី សម្រាប់ការប្រកួតដ៏ស្វិតស្វាញ និងសប្បាយរីករាយនេះ។ ឯកឧត្តមលើកទឹកចិត្តដល់ជ័យលាភី នាពេលនេះត្រូវបន្តដុសខាត់សមត្ថភាព ដើម្បីអភិវឌ្ឍន៍ក្លាយជាកីឡាករ កីឡាការិនីវាយសីសក្តានុពល សម្រាប់ប្រទេសកម្ពុជានាពេលអនាគត។ ចំពោះអ្នកដែលមិនទាន់បានជាប់ជ័យលាភីក្នុងការប្រកួតក៏បន្តប្រែងប្រែងហ្វឹកហាត់បន្ថែមទៀត ដើម្បីប្រជែងយកជ័យជម្នះក្នុងការប្រកួតក្រោយៗទៀត។

ឯកឧត្តមអនុប្រធានសហព័ន្ធកីឡាវាយសីក៏បានជំរុញលើកទឹកចិត្តឱ្យកុមារាកុមារី ដែលជាកីឡាការិនីវ័យក្មេងត្រូវមានឆន្ទៈចង់ក្លាយខ្លួនជាកីឡាករកីឡាការិនីវាយសីដ៏ខ្លាំងសម្រាប់ប្រទេសកម្ពុជា ដ្បិតនៅពេលដែលយើងក្លាយជាម្ចាស់ជើងឯកសម្រាប់ការប្រកួតអន្តរជាតិមិនត្រឹមទទួលកិត្តិយសដល់ខ្លួនឯង និងក្រុមគ្រួសារប៉ុណ្ណោះនោះទេ ពោលប្រទេសជាតិយើងក៏មានមុខមាត់ដែរ៕

ដោយ ហេង ណាលីន