AKP បន្ទាយមានជ័យ ថ្ងៃទី១៤ ខែតុលា ឆ្នាំ២០២៥--ឯកឧត្ដម អ៊ិន ចន្ថា រដ្ឋលេខាធិការក្រសួងអភិវឌ្ឍន៍ជនបទ បានអះអាងថា ការកែលម្អផ្លូវជនបទគឺជាកិច្ចការអាទិភាព ដែលនឹងជួយសម្រួលដល់ការធ្វើដំណើររបស់ប្រជាពលរដ្ឋ ជំរុញសកម្មភាពសេដ្ឋកិច្ចមូលដ្ឋាន កាត់បន្ថយភាពក្រីក្រ និងលើកកម្ពស់គុណភាពជីវិតប្រជាជន នៅតាមជនបទឱ្យកាន់តែប្រសើរឡើង។

ការលើកឡើងនេះបានធ្វើឡើងក្នុងឱកាសឯកឧត្តមដឹកនាំក្រុមការងារអន្តរក្រសួង រួមមានតំណាងក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ចុះពិនិត្យការងារថែទាំផ្លូវជាប្រចាំ និងថែទាំខួបផ្លូវជនបទ ក្នុងផែនការឆ្នាំ២០២៥ ចំនួន១០ខ្សែ ស្ថិតក្នុងក្រុង-ស្រុកចំនួន៥នៃខេត្តបន្ទាយមានជ័យ កាលពីរសៀលថ្ងៃចន្ទ ទី១៣ ខែតុលា ឆ្នាំ២០២៥។

លោកស្រី កែវ ពេជ្ជតា អនុប្រធានមន្ទីរអភិវឌ្ឍន៍ជនបទខេត្តបន្ទាយមានជ័យ បានរាយការណ៍ថា មន្ទីរបានទទួលអនុវត្តការងារថែទាំផ្លូវជាប្រចាំ និងថែទាំខួបផ្លូវជនបទ ក្នុងផែនការឆ្នាំ២០២៥ សរុបចំនួន ១០ខ្សែ នៅក្នុងក្រុង-ស្រុកចំនួន ៥ របស់ខេត្ត ក្នុងនោះការថែទាំផ្លូវជាប្រចាំ មានចំនួន៨ខ្សែ ប្រវែង៦៣.៣៦០ ម៉ែត្រ (គម្រោង DRR-RM-២០២៥-No ០៣០) ដែលមានទទឹងខ្នងលើចាប់ពី៥ ម៉ែត្រ ដល់៧ម៉ែត្រ ក្រាលកៅស៊ូពីរជាន់ និងក្រាលល្បាយក្រួស ស្ថិតនៅក្នុងក្រុងសិរីសោភ័ណ ស្រុកព្រះនេត្រព្រះ ស្រុកស្វាយចេក និងស្រុកអូរជ្រៅ។ ការថែទាំខួបផ្លូវជនបទមានចំនួន២ខ្សែ ប្រវែង ៩.៤០០ ម៉ែត្រ ទទឹងខ្នងលើក្រាលល្បាយគ្រួស៥ម៉ែត្រ កម្រាស់២០សង់ទីម៉ែត្រ ស្ថិតនៅក្នុងស្រុកព្រះនេត្រព្រះ និងស្រុកថ្មពួក។

ឯកឧត្ដម អ៊ិន ចន្ថា បានគូសបញ្ជាក់អំពី តួនាទីស្នូលនៃផ្លូវជនបទដែលជាសរសៃឈាមសេដ្ឋកិច្ចក្នុងការតភ្ជាប់តំបន់ផលិតកម្មទៅកាន់ទីផ្សារ។ ផ្លូវជនបទដែលបានកែលម្អប្រកបដោយគុណភាព នឹងកាត់បន្ថយចំណាយពេលវេលា និងថវិកា របស់បងប្អូនប្រជាពលរដ្ឋក្នុងការដឹកជញ្ជូនកសិផល ដូចជាស្រូវ បន្លែ និងដំណាំផ្សេងៗ ទៅកាន់ទីផ្សារ។ នេះជាការបង្កើនប្រាក់ចំណូលគ្រួសារ កាត់បន្ថយភាពក្រីក្រ និងធានាបាននូវលទ្ធភាពទទួលបានសេវាសាធារណៈដូចជា មន្ទីរពេទ្យ សាលារៀន កាន់តែរហ័សទាន់ពេលវេលា។ ផ្លូវថ្នល់ល្អគឺជាមធ្យោបាយដ៏សំខាន់ក្នុងការទាក់ទាញការវិនិយោគ និងបង្កើតឱកាសការងារថ្មីៗនៅតាមតំបន់ជនបទ ដែលជាមូលដ្ឋានគ្រឹះពង្រឹងសេដ្ឋកិច្ចជាតិទាំងមូល។

លោក រស់ វណ្ណា ជាប្រជាកសិកររស់នៅស្រុកព្រះនេត្រព្រះ បានសម្ដែងក្តីរីករាយជាខ្លាំងចំពោះគម្រោងកែលម្អផ្លូវនេះ។ លោកបានថ្លែងទាំងទឹកមុខញញឹមថា «កាលពីមុន ផ្លូវពិបាកខ្លាំងណាស់ ពិសេសរដូវវស្សា ដឹកស្រូវលក់ស្ទើរតែមិនរួច គិតថ្លៃដឹកជញ្ជូនក៏ថ្លៃ ហើយខាតពេលច្រើន។ តែឥឡូវ ផ្លូវល្អហើយ ពួកខ្ញុំអាចដឹកជញ្ជូនបានឆាប់រហ័ស ហើយតម្លៃដឹកជញ្ជូនក៏ចុះថោកជាងមុនដែរ ដែលជួយឱ្យជីវភាពរបស់ពួកខ្ញុំបានធូរស្រាលច្រើន»។

ចំណែកឯអ្នកនាង ស៊ុន ស្រីពេជ្រ ជាអ្នកលក់ដូរនៅតាមដងផ្លូវក្នុងស្រុកអូរជ្រៅ ក៏បានឱ្យដឹងដែរថា «តាំងពីគេជួសជុលផ្លូវរួចមក មានអ្នកធ្វើដំណើរច្រើនជាងមុន ភ្ញៀវក៏ចូលទិញអីវ៉ាន់ខ្ញុំច្រើនដែរ។ ការលក់ដូររបស់ខ្ញុំរលូនល្អ ទាំងនេះដោយសារផ្លូវស្រួលធ្វើដំណើរ»។

ឯកឧត្ដម អ៊ិន ចន្ថា បានគូសបញ្ជាក់ជាថ្មីពីសមិទ្ធផលដ៏ធំធេងទាំងនេះថា អាចប្រព្រឹត្តទៅបានគឺដោយសារគុណបំណាច់នៃ "សុខសន្តិភាព" ដែលកើតចេញពីការលះបង់ដ៏ធំធេងរបស់ សម្ដេចតេជោ ហ៊ុន សែន ជាបិតាសន្តិភាព ស្ថាបនិកមគ្គុទេសក៍ឯក និងប្រតិបត្តិករនយោបាយឈ្នះ-ឈ្នះ។ ជាមួយគ្នានេះ ឯកឧត្តមបានលើកឡើងពីការបន្តវេនដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបាននិងកំពុងបន្តខិតខំប្រឹងប្រែងឥតឈប់ឈរដើម្បីបុព្វហេតុជាតិ និងប្រជាជន៕

ដោយ ឈុន សារ៉ាត