AKP បន្ទាយមានជ័យ ថ្ងៃទី១៤ ខែតុលា ឆ្នាំ២០២៥--ភាពតានតឹងនៅតាមបណ្តោយព្រំដែនកម្ពុជា-ថៃ ក្នុងខេត្តបន្ទាយមានជ័យ បានឡើងកម្តៅជាថ្មីម្តងទៀត កាលពីថ្ងៃទី១៣ ខែតុលា ឆ្នាំ២០២៥ ដោយកម្លាំងយោធាថៃបានបន្តសកម្មភាពឈ្លានពានចូលក្នុងទឹកដីកម្ពុជា ដោយប្រើប្រាស់គ្រឿងចក្រឈូសឆាយដីរបស់ប្រជាពលរដ្ឋខ្មែរនៅ ភូមិព្រៃចាន់ ឃុំអូរបីជាន់ ស្រុកអូរជ្រៅ។ លើសពីនេះ ប្រជាពលរដ្ឋ រួមទាំងទារក កុមារ និងមនុស្សចាស់នៅភូមិព្រៃចាន់ និងភូមិជោគជ័យ ក៏បានបន្តរងការរំខានផ្លូវចិត្តយ៉ាងធ្ងន់ធ្ងរ អស់រយៈពេល ៤យប់ជាប់គ្នា តាមរយៈការចាក់សំឡេងយាយីខ្លាំងៗ ពេញមួយយប់។

កាលពីព្រឹកថ្ងៃទី១៣ ខែតុលា ឆ្នាំ២០២៥ យោធាថៃបានបន្តសកម្មភាពដ៏គឃ្លើនរបស់ខ្លួន ដោយបានប្រើប្រាស់គ្រឿងចក្រធុនធ្ងន់ចូលទៅ ឈូសឆាយដីធ្លី ដែលជាកម្មសិទ្ធិរបស់ប្រជាពលរដ្ឋកម្ពុជា នៅក្នុងតំបន់មានជម្លោះព្រំដែន ស្ថិតនៅភូមិព្រៃចាន់។ សកម្មភាពនេះបានកើតឡើងបន្ទាប់ពីយោធាថៃបានរំលោភបំពានដាក់ បន្លាលួស ហ៊ុមព័ទ្ធយកដីពលរដ្ឋកម្ពុជាកាលពីពេលកន្លងមក។

យោងតាមរបាយការណ៍របស់អាជ្ញាធរមូលដ្ឋាន សកម្មភាពឈូសឆាយនេះបានចាប់ផ្តើមពីម៉ោង១០៖២០នាទី ដល់ម៉ោង១១៖៣០នាទីព្រឹក និងបានបន្តរហូតដល់ម៉ោង៥ល្ងាច ថ្ងៃដដែល។ អាជ្ញាធរកម្ពុជាចាត់ទុកសកម្មភាពប្រើប្រាស់គ្រឿងចក្រឈូសឆាយនេះថាជាការ រំលោភបំពានយ៉ាងធ្ងន់ធ្ងរ ដល់ដែនអធិបតេយ្យភាព និងបូរណភាពទឹកដីរបស់កម្ពុជា ហើយជាការមិនគោរពដល់កិច្ចព្រមព្រៀងទ្វេភាគីស្ដីពីព្រំដែន ដែលធ្វើឱ្យស្ថានការណ៍នៅតាមបណ្ដោយព្រំដែនកាន់តែមានភាពតានតឹង។ បន្ថែមពីលើការឈ្លានពានផ្នែករូបវន្ត (ភាគីថៃក៏បានបន្តប្រើប្រាស់ទម្រង់នៃ ការបំភិតបំភ័យ និងយាយីផ្លូវចិត្ត មកលើប្រជាពលរដ្ឋខ្មែរនៅភូមិព្រៃចាន់ និងភូមិជោគជ័យ។ ក្នុងយប់ថ្ងៃទី១៣ ខែតុលា ឆ្នាំ២០២៥ នេះ គឺត្រូវជា យប់ទី៤ជាប់គ្នា ដែលភាគីថៃបានចាក់ សំឡេងរំខានលឺខ្លាំងៗ ពេញមួយយប់ ដូចជា សំឡេងខ្មោច ឆ្កែព្រុស ឆ្កែលូ សំឡេងខ្យល់ និងសំឡេងយន្តហោះ ជាដើម។ សកម្មភាព ចាក់សំឡេងយាយី ទាំងនេះ បានបង្កការរំខានយ៉ាងធ្ងន់ធ្ងរដល់ផ្លូវចិត្តរបស់ប្រជាពលរដ្ឋដែលរស់នៅតាមព្រំដែន ជាពិសេសប៉ះពាល់ដល់ ទារក កុមារ និងមនុស្សចាស់ ដែលតម្រូវឱ្យមានការដេកពួន និងសម្រាក។ ក្រសួងការពារជាតិកម្ពុជាបានចាត់ទុកការចាក់សំឡេងទាំងនេះថាជាការបំពានយ៉ាងធ្ងន់ធ្ងរលើ បទដ្ឋានមនុស្សធម៌ និងជាទម្រង់នៃសង្គ្រាមផ្លូវចិត្ត។

ទោះបីជាប្រឈមមុខនឹងសកម្មភាពឈ្លានពាន និងការយាយីផ្លូវចិត្តពីសំណាក់កម្លាំងយោធាថៃក៏ដោយ ក៏ប្រជាពលរដ្ឋក្នុង ភូមិព្រៃចាន់ និងភូមិជោគជ័យ បានបង្ហាញនូវ ស្មារតីតស៊ូមិនចុះញ៉ម គួរឱ្យកោតសរសើរ។ ពួកគេបាន ឈរជើងយ៉ាងរឹងមាំ នៅតំបន់ព្រំដែន ជាពិសេសនៅក្បែរខ្សែបន្លាលួស និងទីតាំងដែលមានការឈូសឆាយ ដើម្បី ការពារទឹកដី និងភូមិឋានរបស់ខ្លួន។

ការតស៊ូរបស់ពលរដ្ឋទាំងនេះមិនត្រឹមតែជាការការពារដីធ្លីដែលពួកគេបានអាស្រ័យផលតាំងពីយូរលង់ណាស់មកហើយប៉ុណ្ណោះទេ ប៉ុន្តែថែមទាំងជាការបង្ហាញនូវ ភាពក្លាហាន ក្នុងការការពារ បូរណភាពទឹកដី ពីការប៉ុនប៉ងឈ្លានពាន។ ពួកគេបានធ្វើការតវ៉ាដោយអហិង្សា និងបានចូលរួមជាមួយកងកម្លាំងយោធា និងអាជ្ញាធរមូលដ្ឋាន ក្នុងការឃ្លាំមើល និងរាយការណ៍ពីសកម្មភាពមិនប្រក្រតីរបស់ភាគីថៃ។ នេះជាសញ្ញានៃ មនសិការស្នេហាជាតិ និងការប្តេជ្ញាចិត្តដ៏ខ្ពស់របស់ពលរដ្ឋក្នុងការ ការពារអធិបតេយ្យភាពជាតិ ទោះបីជាត្រូវរងការបំភិតបំភ័យផ្លូវចិត្តក៏ដោយ។

ការដោះស្រាយដោយសន្តិវិធី និងការប្តេជ្ញាចិត្តការពារទឹកដីរដ្ឋបាលខេត្តបន្ទាយមានជ័យ និងអាជ្ញាធរពាក់ព័ន្ធកម្ពុជា បានអះអាងពីការប្តេជ្ញាចិត្តខ្ពស់ក្នុងការ ការពារបូរណភាពទឹកដី និងអធិបតេយ្យភាពជាតិ។ យ៉ាងណាមិញ អាជ្ញាធរកម្ពុជានៅតែប្រកាន់ខ្ជាប់នូវ ភាពអត់ធ្មត់ខ្ពស់ និងគោលការណ៍ ដោះស្រាយបញ្ហាដោយសន្តិវិធី តាមរយៈយន្តការទ្វេភាគីដែលមានស្រាប់ រួមទាំងយន្តការគណៈកម្មការព្រំដែនចម្រុះ (JBC) និងអនុស្សរណៈនៃការយោគយល់គ្នាឆ្នាំ២០០០។ ក្រៅពីនេះ កម្ពុជាក៏បានអំពាវនាវឱ្យមានការអន្តរាគមន៍ពីក្រុមអន្តរជាតិ (IOT) និងអង្គការសិទ្ធិមនុស្ស ដើម្បីចុះពិនិត្យ និងវាយតម្លៃលើសកម្មភាពរំលោភបំពានរបស់ភាគីថៃ៕

ដោយ ឈុន សារ៉ាត