AKP កំពង់ធំ ថ្ងៃទី១៤ ខែតុលា ឆ្នាំ២០២៥-- ឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ កាលពីរសៀលថ្ងៃទី១៣ ខែតុលា ឆ្នាំ២០២៥ បានដឹកនាំកងកម្លាំង រួមជាមួយអាជ្ញាធរដែនដី និងសប្បុរសជននានា បានសាងសង់ជម្រកស្នាក់នៅបានរួចរាល់ និងប្រគល់ជូនគ្រួសារវីរយុទ្ធជនការពារព្រំដែនកម្ពុជា-ថៃនៅភូមិកប់ថ្លុក ឃុំដំរីស្លាប់ ស្រុកកំពង់ស្វាយ ខេត្តកំពង់ធំ។

ឧត្ដមសេនីយ៍ទោ សោម ស៊ុន បានបញ្ជាក់ថា ជម្រកស្នាក់នៅដែលទើបបានសាងសង់រួចរាល់នៅពេលនេះ មានទំហំ ៤ម៉ែត្រគុណ៦ម៉ែត្រ សាងសង់ពីឈើជញ្ជាំង និងដំបូលប្រក់ស័ង្កសី រនាបក្រាលក្តារ មានកម្ពស់ជាង២ម៉ែត្រ ផុតពីដីដែលជាការចូលរួមចំណែកពីសប្បុរសជននានា ដើម្បីសាងសង់ជូនលោកស្រី កាន ឡឹង អាយុ៣៥ឆ្នាំ មានកូនតូចៗនៅក្នុងបន្ទុកចំនួន ៦នាក់ ជាភរិយារបស់លោក ភឿន ភីន វីរយុទ្ធជនកងការពារព្រំដែនកម្ពុជា-ថៃ លេខ៤០៣ គ្មានផ្ទះសម្រាប់ស្នាក់នៅ ដោយកន្លងទៅជាច្រើនឆ្នាំមកហើយ បានទៅរស់នៅជាមួយស្វាមីក្នុងទីតាំងបន្ទាយ រហូតមកដល់ពេលផ្ទុះសង្គ្រាម ឈ្លានពានពីពួកចោរសៀម ទើបបានវិលត្រឡប់មកកាន់ស្រុកកំណើតវិញ។ បច្ចុប្បន្នស្វាមីគាត់កំពុងជាប់ដៃការពារបូណភាពទឹកដី នៅព្រំដែនកម្ពុជា-ថៃ ទិសយោធភូមិភាគទី៤។

ក្នុងឱកាសប្រគល់ជម្រកស្នាក់នៅថ្មីនេះ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានឧបត្ថម្ភស្បៀងអាហារ គ្រឿងឧបភោគបរិភោគ ភេសជ្ជៈ មុង ភួយ កន្ទេល ខ្នើយ និងសម្ភារប្រើប្រាស់មួយចំនួនជូនលោកស្រី កាន ឡឹង ផងដែរ។ 

លោកស្រី កាន ឡឹង បានសម្ដែងក្ដីរំភើបចិត្តរកអ្វីប្រៀបផ្ទឹមពុំបាន ដែលបានទទួលជម្រកស្នាក់នៅថ្មីសម្រាប់កូនៗ ដែលកន្លងមកសុំផ្ទះបងប្អូនស្នាក់នៅ អស់រយៈពេលជាងបីខែកន្លងមកហើយ និងសូមថ្លែងអំណរគុណដ៍ជ្រាលជ្រៅជាទីបំផុតចំពោះឧត្ដមសេនីយ៍ទោ សោម ស៊ុន និងសហការី អាជ្ញាធរដែនដី និងសប្បុរសជនទាំងអស់ដែលបានជួយឧបត្ថម្ភដល់គាត់ ដែលកំពុងមានជីវភាពលំបាកខ្វះខាតនៅពេលនេះ៕

ដោយ ស៊ុម វណ្ណា