AKP ភ្នំពេញ ថ្ងៃទី១៤ ខែតុលា ឆ្នាំ២០២៥-- ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តមរដ្ឋមន្រ្តី ថោ ជេដ្ឋា ប្រធានអាជ្ញាធរទន្លេសាប ឯកឧត្តម សរ គឹមសាន្ត អគ្គលេខាធិការអាជ្ញាធរទន្លេសាប នារសៀលថ្ងៃទី១៣ ខែតុលា ឆ្នាំ២០២៥ បានដឹកនាំក្រុមការងារមន្រ្តីបច្ចេកទេសអាជ្ញាធរទន្លេសាបដែលទទួលបន្ទុកសហការរៀបចំកំណត់ក្របខ័ណ្ឌយុទ្ធសាស្ត្រសម្រាប់អាងបឹងទន្លេសាប នៃកម្មវិធីការអនុវត្តវាយតម្លៃសន្តិសុខទឹក ក្រោមកិច្ចសហប្រតិបត្តិការជំនួយគាំទ្រពីធនាគារពិភពលោក(WB),  ICEM, DFAT AWP  បានរៀបចំកិច្ចប្រជុំពិគ្រោះយោបល់ស្តីពីការវិភាគសន្តិសុខទឹកនៅអាងទន្លេសាប ក្នុងភូមិសាស្ត្រខេត្តកំពង់ធំ និងខេត្តព្រះវិហារជាមួយ អាជ្ញាធរមូលដ្ឋានខេត្ត មន្ទីរជំនាញ និងស្រុកពាក់ពន្ធ័  ដែលមានសមាជិកចូលរួម សរុបប្រមាណ ៤៦នាក់ នៅសាលប្រជុំខេត្តកំពង់ធំ។

ឯកឧត្តម សរ គឹមសាន្ត បានលើកឡើងថា កិច្ចប្រជុំពិភាក្សានេះ មានគោលបំណង៣សំខាន់គឺ៖ ទី១. ពិគ្រោះយោបល់ជាមួយភាគីពាក់ព័ន្ធ ដើម្បីបង្ហាញលទ្ធផលនៃរបាយការណ៍ ស្ថានភាពអាងទន្លេសាប ប្រមូលមតិយោបល់ និងសម្របសម្រួលលើវិស័យអាទិភាព ទី២. ប្រមូលការយល់ដឹងពីទីវាលផ្ទាល់ និងធាតុចូលរបស់ភាគីពាក់ព័ន្ធ ដើម្បីជូនដំណឹងពីការវាយតម្លៃ និងការណែនាំ និងទី៣. កំណត់តំបន់ដែលមានបញ្ហាចម្បងៗ (Keys Hotspots) សម្រាប់ធ្វើការវិនិច្ឆ័យសន្តិសុខទឹកក្នុងអាងបឹងទន្លេសាបក្នុងភូមិសាស្រ្តខេត្តកំពង់ធំ និងខេត្តព្រះវិហារ។

សូមជម្រាបជូនថា នៅជុំវិញអាងបឹងទន្លេសាបដែលជាទីជម្រករបស់ប្រជាពលរដ្ឋប្រមាណ៥លាននាក់ ជាចំណុចកណ្តាលដ៏មានសារៈសំខាន់នៃការអភិវឌ្ឍសង្គម-សេដ្ឋកិច្ច និងសន្តិសុខទឹករបស់ប្រទេសកម្ពុជា។ បច្ចុប្បន្ននេះ អាងទន្លេសាបកំពុងប្រឈមទៅនឹងបញ្ហាជាច្រើនដែលបណ្តាលមកពីបម្រែបម្រួលរបបទឹកតាមរដូវ ការប្រើប្រាស់ទឹក រួមទាំងបញ្ហាបរិស្ថាននានាដែលកំពុងប្រឈមមុខត្រូវដោះស្រាយហើយបានកំណត់ជាការងារអាទិភាពដែលប្រមុខរាជរដ្ឋាភិបាលបានដាក់ចេញ៕

ដោយ ណយ នឿន (ប្រភព៖ អាជ្ញាធរទន្លេសាប)