AKP ភ្នំពេញ ថ្ងៃទី១៣ ខែតុលា ឆ្នាំ២០២៥-- ឯកឧត្តម គីម វីរៈ អគ្គលេខាធិការគណៈកម្មាធិការជាតិគ្រប់គ្រងគ្រោះមហន្តរាយនៃព្រះរាជាណាចក្រកម្ពុជា និងជាប្រធានគណៈកម្មាធិការគ្រប់គ្រងគ្រោះមហន្តរាយអាស៊ានឆ្នាំ២០២៥ បានថ្លែងថា ខណៈដែលតំបន់អាស៊ាននៅតែបន្តប្រឈមមុខនឹងហានិភ័យកាន់តែស្មុគស្មាញ និងគ្រោះថ្នាក់ដែលទាក់ទងនឹងអាកាសធាតុ ព្រមទាំងការរំខានផ្នែកបច្ចេកវិទ្យា និងផ្នែកសុខភាពសាធារណៈ ភាពធ្ងន់ធ្ងរនៃគ្រោះមហន្តរាយនេះទាមទារឱ្យមានការខិតខំប្រឹងប្រែងរក្សាស្ថិរភាព និងឯកភាពក្រោមគោលការណ៍ “អាស៊ានតែមួយ ការឆ្លើយតបតែមួយ”។ ការថ្លែងបញ្ជាក់របស់ឯកឧត្តម គីម វីរៈ យ៉ាងដូច្នេះធ្វើឡើងក្នុងកិច្ចប្រជុំគណៈកម្មាធិការគ្រប់គ្រងគ្រោះមហន្តរាយអាស៊ានលើកទី៤៧ និងកិច្ចប្រជុំពាក់ព័ន្ធនៅរាជធានីភ្នំពេញ នាព្រឹកថ្ងៃទី១៣ ខែតុលា ឆ្នាំ២០២៥ ក្នុងនាមកម្ពុជាធ្វើជាម្ចាស់ផ្ទះនៃកិច្ចប្រជុំ។

ក្នុងនាមគណៈកម្មាធិការជាតិគ្រប់គ្រងគ្រោះមហន្តរាយនៃព្រះរាជាណាចក្រកម្ពុជា និងក្នុងតួនាទីជាប្រធានគណៈកម្មាធិការអាស៊ានស្តីពីការគ្រប់គ្រងគ្រោះមហន្តរាយ ឯកឧត្តម គីម វីរៈ បានសម្តែងសេចក្តីសោមនស្សរីករាយ ក្នុងការស្វាគមន៍យ៉ាងកក់ក្តៅចំពោះវត្តមានប្រទេសជាសមាជិកអាស៊ាន តំណាងលេខាធិការអាស៊ាន និងប្រទេសទីម័រឡេស្តេជាអ្នកសង្កេតការណ៍ ដែលបានចូលរួមក្នុងកិចប្រប្រជុំលើកទី៤៧នៃគណៈកម្មាធិការអាស៊ានស្តីពីការគ្រប់គ្រងគ្រោះមហន្តរាយ និងកិច្ចប្រជុំពាក់ព័ន្ធ ដែលនេះបង្ហាញការបន្តប្តេជ្ញាចិត្តលើកិច្ចសហប្រតិបត្តិការ និងការរួមចំណែកដ៏មានតម្លៃក្នុងការជំរុញរបៀបវារៈនៃការគ្រប់គ្រងគ្រោះមហន្តរាយរួមរបស់អាស៊ានក្នុងឆ្នាំនេះ ដោយឯកឧត្តមបានចាត់ទុកថា កិច្ចប្រជុំនេះគឺជាវេទិកាដ៏មានតម្លៃមួយ ដើម្បីពិនិត្យមើលវឌ្ឍនភាពសម្រាប់ការពង្រឹងកិច្ចសហប្រតិបត្តិការក្នុងតំបន់ ការផ្តល់ហិរញ្ញប្បទាន សកម្មភាពរំពឹងទុក និងការរួមបញ្ចូលវិទ្យាសាស្ត្រ ទិន្នន័យ និងបច្ចេកវិទ្យានៅគ្រប់កម្រិតនៃការគ្រប់គ្រងហានិភ័យគ្រោះមហន្តរាយ ខណៈដែលកិច្ចព្រមព្រៀងអាស៊ានស្តីពីការគ្រប់គ្រងគ្រោះមហន្តរាយ និងការឆ្លើយតបជាបន្ទាន់ និងកម្មវិធីការងារជាបន្តបន្ទាប់កំពុងមានការរីកចម្រើនគួរឱ្យកត់សម្គាល់ក្នុងការពង្រឹងយន្តការត្រៀមការឆ្លើយតប និងស្តារឡើងវិញ។ 

ក្នុងនាមជាប្រធានគណៈកម្មាធិការគ្រប់គ្រងគ្រោះមហន្តរាយអាស៊ានឆ្នាំ២០២៥ ឯកឧត្តម គីម វីរៈ បានគូសបញ្ជាក់ថា កម្ពុជាប្តេជ្ញាចិត្តឥតងាករេក្នុងការពង្រឹងសាមគ្គីភាព ការសម្របសម្រួល និងការទទួលខុសត្រូវរួមនៅទូទាំងរដ្ឋសមាជិកអាស៊ានទាំងអស់ ជាពិសេសការសង្គ្រោះជីវិត និងការពារមនុស្សដោយមិនគិតពីមូលហេតុនៃគ្រោះមហន្តរាយ។ ឯកឧត្តមសង្ឃឹមថា ក្រោយកិច្ចប្រជុំសមាជិកអាស៊ាន និងដៃគូទាំងអស់បន្តធ្វើការជាមួយគ្នា ដើម្បីធានាថាសហគមន៍អាស៊ាន ជាពិសេសអ្នកដែលងាយរងគ្រោះបំផុត មានសុវត្ថិភាពជាងមុន មានភាពធន់ជាងមុន និងរៀបចំបានប្រសើរជាងមុនសម្រាប់បញ្ហាប្រឈមគ្រោះមហន្តរាយនានានាពេលខាងមុខ៕

ដោយ៖ ចាន់ សុភឿន