AKP ភ្នំពេញ ថ្ងៃទី១៣ ខែតុលា ឆ្នាំ២០២៥-- ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា  និងជាប្រធានក្រុមការងារថ្នាក់ជាតិចុះជួយស្រុកកងមាស ខេត្តកំពង់ចាម បានថ្លែងអំណរគុណដល់មាតាបិតា អាណាព្យាបាល លោកគ្រូ អ្នកគ្រូ និងក្រុមការងារគ្រប់លំដាប់ថ្នាក់ ដែលបានយកចិត្តទុកដាក់ជួយជ្រោមជ្រែងដល់សិស្សានុសិស្សទាំងអស់ រហូតដល់ការសិក្សារបស់ពួកគេទទួលបានលទ្ធផលល្អប្រសើរដែលបានបង្ហាញឱ្យឃើញតាមរយៈការប្រឡងសញ្ញាបត្រមធ្យមសិក្សាទុតិយភូមិ កាលពីពេលថ្មីៗកន្លងទៅនេះ។ ការថ្លែងអំណរគុណរបស់ឯកឧត្តមបណ្ឌិតសភាចារ្យ ហង់ជួន ណារ៉ុន ធ្វើឡើងក្នុងពិធីសំណេះ សំណាលជាមួយសិស្សនិទ្ទេស A ចំនួន ១៥នាក់ ស្រី ៥នាក់ ក្នុងស្រុកកងមាស នាថ្ងៃទី១២ ខែតុលា ឆ្នាំ២០២៥។

ឯកឧត្ដមបណ្ឌិតសភាចារ្យ ឧបនាយករដ្ឋមន្ត្រី បានថ្លែងថា លទ្ធផលនេះបានសរបញ្ជាក់ឱ្យឃើញពីការខិតខំប្រឹងប្រែងបង្ហាត់បង្រៀនអស់ពីកម្លាំងកាយកម្លាំងចិត្ដ ការយកចិត្តទុកដាក់របស់លោកគ្រូ អ្នកគ្រូ គណៈគ្រប់គ្រងសាលា ការលើកទឹកចិត្តពីមាតាបិតា អាណាព្យាបាល និងការខិតខំប្រឹងប្រែងផ្ទាល់ខ្លួនរបស់ក្មួយៗសិស្សានុសិស្ស និងសូមឱ្យសិស្សានុសិស្សពិចារណាឱ្យបានម៉ត់ចត់ក្នុងការជ្រើសរើសយកមុខវិជ្ជាណាដែលស្របតាមចំណង់ចំណូលចិត្ត និងទីផ្សារការងារដើម្បីជាទុនដ៏សំខាន់ក្នុងការកសាងជីវភាពរស់នៅផ្ទាល់ខ្លួន គ្រួសារ និងការចូលរួមអភិវឌ្ឍន៍ប្រទេសជាតិ ជាពិសេសត្រូវអភិវឌ្ឍន៍ជំនាញទន់របស់ខ្លួន ដើម្បីពង្រឹងភាពជាពលរដ្ឋក្នុងសង្គមប្រកបដោយសីលធម៌ គុណធម៌ និងសុជីវធម៌ ក្នុងការចូលរួមចំណែកអភិវឌ្ឍន៍មូលធនមនុស្សសម្រាប់ប្រទេសជាតិ។

ឯកឧត្ដមបណ្ឌិតសភាចារ្យ ហង់ជួន ណារ៉ុន បានលើកទឹកចិត្តដល់ក្រុមការងាររាជរដ្ឋាភិបាលចុះមូលដ្ឋាន និងអាជ្ញាធរគ្រប់លំដាប់ថ្នាក់សហការគ្នាបន្តជួបសំណេះសំណាលជាមួយសិស្ស ដែលជាប់និទ្ទេសផ្សេងៗទៀតនៅតាម ក្រុង ស្រុក ដើម្បីជំរុញលើកទឹកចិត្តក្នុងការបន្តការសិក្សារៀនសូត្ររបស់ពួកគេ និងកសាងខ្លួនជាពលរដ្ឋល្អក្នុងសង្គម។ ដើម្បីជាការលើកទឹកចិត្ត ឯកឧត្តមបណ្ឌិតសភាចារ្យ ហង់ជួន ណារ៉ុន បានប្រគល់កុំព្យូទ័រយួរដៃដល់ សិស្សនិទ្ទេស A ទាំង១៥នាក់ ក្នុងម្នាក់ៗ ១គ្រឿងផងដែរ៕

ដោយ៖ ចាន់ សុភឿន (ប្រភព៖ ក្រសួងអប់រំ)