AKP ភ្នំពេញថ្ងៃទី ១១ ខែតុលា ឆ្នាំ ២០២៥– ពិព័រណ៍ “ផ្ទះបាយ និងផ្ទះបាយពាណិជ្ជកម្ម និង B2C” បានដាក់បង្ហាញអំពីបច្ចេកវិទ្យា និងឧបករណ៍ថ្មីៗ ក្នុងវិស័យផោជនីយកម្ម ដើម្បីលើកកម្ពស់ផលិតភាព ប្រសិទ្ធភាព និងស្តង់ដារសុវត្ថិភាពចំណីអាហារនៅកម្ពុជា។

ថ្លែងនៅក្នុងពិធីបើកពិព័រណ៍ Home & Commercial Kitchen និង B2C នៅថ្ងៃទី១១ ខែតុលា ឆ្នាំ២០២៥ លោក អ៊ារីក លីម  នាយកប្រតិបត្តិ ADVANTAGE ក្រោម Universal Alliance Co., Ltd. បានលើកឡើងថា ពិព័រណ៍ថ្ងៃនេះ នឹងបង្ហាញឧបករណ៍ថ្មីៗក្នុងវិស័យផោជនីយកម្ម ដើម្បីជួយឱ្យប្រជាជនកម្ពុជាអាចប្រើប្រាស់បច្ចេកវិទ្យា ដើម្បីធ្វើឱ្យជីវិតកាន់តែងាយស្រួល និងប្រសើរឡើង។

លោកបានមានប្រសាសន៍ថា៖ “ការទទួលយកបច្ចេកវិទ្យា និងបច្ចេកវិទ្យាបញ្ញាសិប្បនិម្មិត (AI) ដើម្បីបង្កើនចំណេះដឹង និងសិក្សាដោយលឿនក្នុងពេលវេលាខ្លី គឺមានសារៈសំខាន់សម្រាប់អាជីវកម្មដែលចង់រត់ទៅមុខ និងទទួលបានភាពជោគជ័យ។ ប្រសិនបើវិស័យទេសចរណ៍ចង់រីកចម្រើន យើងក៏ត្រូវការសេវាកម្មគាំទ្រដែលអាចឆ្លើយតបទៅនឹងតម្រូវការអ្នកទេសចរណ៍ដែលសំខាន់បំផុត ផ្នែកអាហារ និងសុវត្ថិភាពអាហារ”។ 

លោកបានលើកឡើងថា ឧស្សាហកម្មហាឡាលមានទីផ្សាពិភពលោក រាប់ពាន់លានដុល្លារ ហើយកម្ពុជាគួរតែសាកល្បងចូលរួមដើម្បីទាញយកទ្រព្យសម្បត្តិ ដូចដែលម៉ាឡេស៊ីបានធ្វើមួយចំនួនឆ្នាំមុន។

ឯកឧត្តម ទូត សាហារ៉ុឌីន អុន ឯកអគ្គរាជទូតនៃប្រទេសម៉ាឡេស៊ី បានថ្លែងថា ខណៈពេលដែលហាឡាលគឺជាតម្រូវការជាមុនសម្រាប់ប្រជាជនម៉ូស្លីមក្នុងគ្រប់ទិដ្ឋភាពទាំងអស់ វាក៏និយាយអំពីសុវត្ថិភាព និងគុណភាពអាហារផងដែរ។ 

ឯកឧត្តមបានមានប្រសាសន៍ថា៖ “វាតំណាងឱ្យស្តង់ដារសកលដែលបង្ហាញពីការជឿទុកចិត្ត តម្លាភាព និងការដាក់បញ្ចូល។ គំនិតផ្តួចផ្តើមនេះ បង្ហាញពីបទពិសោធន៍របស់ម៉ាឡេស៊ីក្នុងឧស្សាហកម្មហាឡាល ដែលអាចគាំទ្រចក្ខុវិស័យរបស់កម្ពុជាក្នុងការពង្រីកទីផ្សារទេសចរណ៍ថ្មីៗ តាមរយៈយុទ្ធនាការទេសចរណ៍មិត្តភាពមូស្លីមរបស់ខ្លួន ដើម្បីទាក់ទាញភ្ញៀវទេសចរមូស្លីមមកពីតំបន់មជ្ឈិមបូព៌ា និងតំបន់ផ្សេងៗទៀត”។ 

ជាមួយគ្នានេះ ឯកឧត្តជឿជាក់ថា កិច្ចសហប្រតិបត្តិការនេះ អាចបើកទំព័រថ្មីមួយក្នុងវិស័យទេសចរណ៍ និងឧស្សាហកម្មម្ហូបអាហារនៅកម្ពុជា ដែលផ្តល់អត្ថប្រយោជន៍ដល់អាជីវកម្ម និងបង្កើតឱកាសសម្រាប់សហគមន៍មូលដ្ឋានផងដែរ។

អាហារខ្មែរ ហាឡាល ពិសេស ដោយ MasterChef Chan Kanha និង Bangi Resort ម៉ាឡេស៊ី ត្រូវបានរៀបចំដាក់បង្ហាញ។ ជាមួយគ្នានេះ អ្នកផលិត និងចិញ្ចឹមសត្វ ក៏បានចូលរួមដើម្បីឱ្យម្ចាស់សណ្ឋាគារ ភោជនីយដ្ឋាន សាកសួរ និងពិភាក្សាជាមួយអ្នកជំនាញបច្ចេកវិទ្យាផ្ទះបាយ ដើម្បីប្រើបច្ចេកវិទ្យាផលិតអាហារដែលមានគុណភាពល្អ រហ័ស និងសុវត្ថិភាព។ 

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានសម្គាល់ឃើញថា ការបើកពិព័រណ៍នៅកម្ពុជានេះ មិនត្រឹមតែបង្ហាញអំពីបច្ចេកវិទ្យាផ្ទះបាយដែលលើកកម្ពស់ផលិតភាព ប្រសិទ្ធភាព និងស្តង់ដារសុវត្ថិភាពចំណីអាហារដល់ឧស្សាហកម្មបដិសណ្ឋារកិច្ចប៉ុណ្ណោះទេ ប៉ុន្តែថែមទាំងពាក់ព័ន្ធទៅនឹងសុវត្ថិភាពម្ហូបអាហារ ដែលរួមចំណែកជាវិជ្ជមានដល់វិស័យទេសចរណ៍ បដិសណ្ឋារកិច្ច និងការអភិវឌ្ឍផ្នែកធ្វើម្ហូបនៅកម្ពុជា។

ឯកឧត្តមបានមានប្រសាសន៍ថា៖ “វាឆ្លើយតបទៅនឹងតម្រូវការពិភពលោកដែលកំពុងកើនឡើង សម្រាប់បទពិសោធន៍ធ្វើដំណើរដែលស្របតាមតម្លៃអ៊ីស្លាម ដោយផ្តោតលើ al-alhuf កន្លែងស្នាក់នៅសមរម្យ គ្រឿងបរិក្ខារខ្ពស់ និងបរិស្ថានដែលងាយស្រួលសម្រាប់គ្រួសារ”។ 

គួរបញ្ជាក់ថា Universal Alliance Co., Ltd. ទទួលបានសិទ្ធិក្នុងការរៀបចំ និងនាំ United World Halal Day មកកម្ពុជាឆ្នាំក្រោយ (ខែមីនា ឆ្នាំ២០២៦) ដែលនឹងនាំមកជាប្រទេសអ៊ីស្លាមចំនួន ៥៧ ប្រទេស៕

ដោយ៖ ស្រីពេជ្រ