AKP ភ្នំពេញ ថ្ងៃទី០៨ ខែតុលា ឆ្នាំ២០២៥-- ឯកឧត្តម សុខ ប៊ុនថា រដ្ឋលេខាធិការនៃក្រសួងសង្គមកិច្ច អតីតយុទ្ធជន និងយុវនីតិសម្បទា (ស.អ.យ) ឯកឧត្ដម អ៊ុ សុផាន់ណារ៉ា អគ្គនាយកសេវាសង្គមកិច្ច នៅថ្ងៃទី០៨ ខែតុលា ឆ្នាំ២០២៥ បានអញ្ជើញជាអធិបតីបើកវគ្គបណ្ដុះបណ្ដាលស្ដីពីការពង្រឹងសមត្ថភាពក្នុងការគាំទ្រដែលមានការយល់ដឹងអំពីការប៉ះទង្គិចផ្លូវចិត្តដល់មន្រ្តីអនុវត្តថ្នាក់ក្រោមជាតិ ក្នុងការជួយដល់ក្រុមជនរងគ្រោះ និងងាយរងគ្រោះ។

កិច្ចប្រជុំនេះមានគោលបំណង៖ ទី១. ពង្រឹងសមត្ថភាពក្នុងការគាំទ្រដែលមានការយល់ដឹងអំពី ការប៉ះទង្គិចផ្លូវចិត្តដល់មន្រ្តីអនុវត្តថ្នាក់ក្រោមជាតិ ក្នុងការជួយដល់ក្រុមជនរងគ្រោះ និងងាយរងគ្រោះ ទី២. បញ្ជ្រាប បណ្ដុះបណ្ដាល និងចែករំលែកបទពិសោធន៍អំពី ការប៉ះទង្គិចផ្លូវចិត្តដល់មន្ត្រីអនុវត្តថ្នាក់ក្រោមជាតិ ក្នុងការជួយ និងផ្ដល់សេវាដល់ក្រុមជនរងគ្រោះ និងងាយរងគ្រោះ និងទី៣. ស្តាប់មតិចូលរួមពីមន្ត្រីអនុវត្តផ្ទាល់ទៅលើបញ្ហាប្រឈម និងរកដំណោះស្រាយ។

កិច្ចប្រជុំនេះមានការអញ្ជើញចូលរួមពីលោកជំទាវ តិមា វិច្ឆិកាល អភិបាលរងនៃគណៈអភិបាលរាជធានីភ្នំពេញ មន្រ្តីសាលារាជធានីភ្នំពេញ អភិបាលរងខណ្ឌទាំង១៤ ប្រធាន អនុប្រនាយកដ្ឋានគាំពារជនរងគ្រោះ ប្រធានមន្ទីរស.អ.យរាជធានីភ្នំពេញ ប្រធានការិយាល័យសង្គមកិច្ច និងសុខុលមាលភាពសង្គមខណ្ឌទាំង១៤ ប្រធានគ.ក.ស.ក ខណ្ឌទាំង១៤ សរុបអ្នកចូលរួមប្រមាណ៥២នាក់៕

ដោយ ណយ នឿន (ប្រភព៖ ក្រសួងសង្គមកិច្ច)