AKP កំពង់ចាម ថ្ងៃទី០៨ ខែតុលា ឆ្នាំ២០២៥-- ឯកឧត្តម អ៊ុន ចាន់ដា អភិបាលខេត្តកំពង់ចាមបានណែនាំដល់មន្ត្រីជំនាញ មន្ទីរអង្គភាពពាក់ព័ន្ធ និងអភិបាលក្រុង-ស្រុក ត្រូវធ្វើរបាយការណ៍ឱ្យច្បាស់លាស់ ត្រឹមត្រូវអំពីផលរងគ្រោះ និងផលប៉ះពាល់នៃទឹកជំនន់ ដើម្បីដាក់ជូនស្នើសុំទៅគណៈកម្មការគ្រប់គ្រងគ្រោះមហន្តរាយ ដើម្បីធ្វើការស្ដារឡើងវិញ។ ឯកឧត្តមអភិបាលខេត្តបានលើកឡើងដូច្នេះក្នុងកិច្ចប្រជុំត្រួតពិនិត្យស្ថានភាពផលប៉ះពាល់ទឹកជំនន់ទន្លេមេគង្គ នៅព្រឹកថ្ងៃទី០៨ ខែតុលា ឆ្នាំ២០២៥ នៅសាលប្រជុំសាលាខេត្តក្រោមការចូលរួម ពីអភិបាលរងខេត្ត និងថ្នាក់ដឹកនាំមន្ទីរអង្គភាពពាក់ព័ន្ធជាច្រើនទៀត។

បើតាមរបាយការណ៍របស់លោក គន់ សុភា អភិបាលរងខេត្តទទួលបន្ទុកគ្រប់គ្រងគ្រោះមហន្តរាយ បានឱ្យដឹងថា ផលប៉ះពាល់នៃគ្រោះទឹកជំនន់ទន្លេមេគង្គ និងទឹកភ្លៀងនៅក្នុងភូមិសាស្ត្រខេត្តកំពង់ចាម ដោយគិតមកត្រឹមថ្ងៃទី០៧ ខែតុលា ឆ្នាំ២០២៥ មានស្រុកចំនួន៨ ឃុំចំនួន៤៧និង១៤១ភូមិ ប្រជាពលរដ្ឋជាង៤,០០០គ្រួសារ នៅផ្ទះជាង ៣,០០០ ខ្នង និងប្រជាពលរដ្ឋចំនួន ៦២គ្រួសារ ត្រូវបានជម្លៀសមកទីទួលសុវត្ថិភាពចំនួន៦២គ្រួសារ។ ចំពោះហេដ្ឋារចនាសម្ព័ន្ធ សាធារណៈ ទឹកជំនន់ បានធ្វើឱ្យបាក់ច្រាំងទន្លេ១៧លើក មានប្រវែងជាង៥,០០០ម៉ែត្រ និងប៉ះពាល់ដល់ហេដ្ឋារចនាសម្ព័ន្ធ ផ្លូវថ្នល់កៅស៊ូ ផ្លូវបេតុង និងផ្លូវដី សរុបប្រវែង ១៣០,៩៩០ ម៉ែត្រ ផងដែរ លើផលដាំណាំកសិកម្មចំពោះដំណាំស្រូវ ប្រមាណជាង៥០០០ហិកតា រងផលប៉ះពាល់ជាងក្នុងនោះជាង២០០ហិកតា ទទួលបានភាពល្អប្រសើរឡើងវិញរីឯដំណាំរួមផ្សំ បានរងផលប៉ះពាល់ជាង៦០០ហិកតា។

ឯកឧត្តម អ៊ុន ចាន់ដា បានណែនាំដល់អាជ្ញាធរគ្រប់លំដាប់ថ្នាក់ ត្រូវបន្តតាមដាន និងរៀបចំផែនការស្ដារការខូចខាតនៅក្រោយទឹកសម្រក ដើម្បីធ្វើផែនការស្តារឡើងវិញនូវផលប៉ះពាល់ដោយគ្រោះទឹកជំនន់ និងអប់រំប្រជាពលរដ្ឋត្រូវមានការប្រុងប្រយ័ត្នខ្ពស់ចំពោះសុខភាព និងកូនចៅរបស់ខ្លួនចំពោះទឹកជំនន់ និងត្រូវចេះថែទាំសុខភាពរបស់ខ្លួនឱ្យបានល្អ ក្នុងករណីមានបញ្ហាលើសុខភាពត្រូវមកកាន់មណ្ឌលសុខភាព ឬមន្ទីរពេទ្យដែលនៅជិតនោះ៕

ដោយ ឆាយ ម៉ុត